0 0
Read Time:1 Minute, 56 Second

p1 khemp  new
ՀԱՅՐԵՆԻՔ

Խմբագրական

Յունիս 16, 2015

Թուրքիոյ սուլթանամէտ նախագահը չափ ու սահմանն իսկ կորսնցուցած է, այնքան մը որ այլեւս Արեւմտեան Աշխարհի իր ամենամօտիկ դաշնակիցներն անգամ զզուած են իր եսակեդրոն ընթացքէն եւ կիրարկած ծաւալողապաշտ քաղաքականութենէն:
Ինքզինք, ոչ թէ միայն Թուրքիոյ նախագահ, այլ իսլամական աշխարհի մարգարէ նկատելով, ան որոշած է միջամուխ ըլլալ եւ ներկայ գտնուիլ ամէն տեսակի հաւաքներու, ժողովներու եւ ձեռնարկներու:
Այս ծիրէն ներս, ան ժամանած էր Միացեալ Նահանգներ եւ պատճառը՝ Մ.Ա.Կ.-ի հետ առնչուող գիտաժողով մը չէր, ո՛չ այլ Ուաշընկթընի մէջ, քաղաքական բնոյթ ունեցող հանդիպում մը:
Յունիս 10-ին, Ռեճէպ Թայիպ Էրտողան ժամանած էր Քենթաքի նահանգը, որ հռչակաւոր է նժոյգ ձիերով, եւ ձիարշաւներով: Այս բնագաւառէն բոլորովին հեռու եւ տարբեր պատճառներով, «Սուլթան» Էրտողանի ժամադրավայրն էր տեղւոյն Լուիվիլ քաղաքը: Ան որոշած էր մասնակցիլ հանրածանօթ կռփամարտիկ՝ Մոհամէտ Ալի Քլէյի թաղման արարողութեան, սակայն ո՛չ իբրեւ պարզ սգակիր մը, ո՛չ ալ, իբրեւ Թուրքիոյ Հանրապետութեան նախագահ, այլ իբրեւ Իսլամական աշխարհի մարգարէական պատուիրակ: Անոր մարմաջն էր, թաղման արարողութեան առթիւ, խօսք առնող պաշտօնական անձնաւորութիւններէն մէկը ըլլալ: Մեծամիտ Էրտողան, նոյնիսկ իր հետ բերած էր Մեքքէի սրբավայրէն բուռ մը հող եւ Քորանի
պարբերութիւններ կրող կերպասի կտոր մը:
Ան երազներ ունէր եւ կը կարծէր թէ իր կրօնական աղաւաղուած հասկացողութիւնը նոյն ձեւով կը կիրարկուէր …հեռաւոր Միացեալ Նահանգներու կեդրոնական շրջանէն ներս:
Ցաւօք սրտի Սուլթան Էրտողան քաջատեղեակ չէր թէ հոն՝ Լուիվիլի մէջ կրօնքի հասկացողութիւնը բոլորովին տարբեր է եւ յատկապէս Քլէյի նման հաւատացեալներու նման, բոլորովին այլ իմաստ ու բնոյթ ունի:
Աւելի՛ն, ան կը կարծէր թէ, իր ներկայութեամբ ամենուրէք «կարմիր գորգ» պիտի բացուէր, եւ այսպէս մեծամոլութեամբ, իր վրայ պիտի կեդրոնացնէր բոլորին ուշադրութիւնը:
Այդպէս չեղաւ…:
Արդարեւ, աշխարհի թիւ մէկ կռփամարտիկի թաղման կազմակերպող յանձնախումբը լաւապէս տեղեակ էր թէ, Էրտողան այլ հաշիւներ ունէր եւ կրօնքը պիտի գործածէր իբրեւ քաղաքական զէնք: Նոյնիսկ Քլէյի ընտանեկան պարագաներն ալ գիտէին թէ, Անգարայէն ժամանած, այդ պեխաւոր մարդուն մտքին ետին կային մութ եւ նենգամիտ գաղափարներ:
Դեռ աւելին, քիչ մնաց որ Էրտողանի թիկնապահներն ալ կռփամարտի եւ ըմբշամարտի մրցումներու դիմէին, սպասուածին նման յարգուած չըլլալնուն պատճառով:
Եւ այսպէս, Սուլթանը տեսնելով թէ, անծանօթ Լուիվիլի մէջ նոյնքան անծանօթ մըն ալ ինքն է, որոշեց գլխիկոր հեռանալ եւ վերադառնալ Անգարա:
Լուիվիլի մէջ, Էրտողան միայն անծանօթ անձնաւորութիւն մը չէր, այլ անընդունելի տիպար մը՝ «փերսոնա նոն կրաթա» մը:
Յարգելով հանդերձ ամէն արհեստ եւ արհեստաւոր, արեւելեան հին ասացուածքը կ՛ըսէ.- «Կօշկակար՝ կօշիկէդ վեր մի՛ ելլար»:
…Անգամ մը եւս Էրտողան յանդգնած էր այդ մէկը կատարելու եւ ռինկերէն հեռու, ենթարկուած էր բոլորովին տարբեր տեսակի «նաք աութ»ի մը:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles