0
0
ՀԱՅՐԵՆԻՔ
Խմբագրական
Հոկտեմբեր 30, 2012
Բոլորովին տարբեր է ներկայ իրավիճակը, բաղդատած չորս տարի առաջուայ, ուր ամերիկահայութիւնը ամէնուրէք միասնաբար գործեց ի նպաստ այն թեկնածուին, որ բազմիցս խոստացած էր Հայոց Ցեղասպանութեան ճանաչման համար գործել եւ այդ գծով ալ աշխատանք տանիլ Սպիտակ Տան անմիջական շրջափակէն ներս, սակայն խոստումները մնացին խոստում, հեռու քաղաքական իրապաշտ իրադարձութիւններէն եւ անցուդարձերէն, որոնք բազմիցս կրնային ըլլալ վճռական եւ անկիւնադարձային:
Սակայն նախագահ Օպամա չկատարեց իր խոստումը: Ընդհակառակը, ան ընդդիմացաւ Հայոց Ցեղասպանութեան վերաբերեալ Քոնկրէսի բանաձեւի ընդունման գործընթացին: Բնականաբար, Անգարայի մէջ ելոյթ ունենալով երբեք չարծարծեց Ցեղասպանութեան հարցը: Նաեւ, կրաւորական գործունէութիւն ցուցաբերեց իր ընտրութենէն տարի մը ետք, ճնշում բանեցնելով Հայաստանի վրայ` Թուրքիոյ հետ տխրահռչակ արձանագրութիւնները ստորագրելու համար, աւեին ոչ մէկ աշխատանք տարաւ վերացնելու համար Անգարայի կատարած շրջափակումը` Հայաստանի վրայ:
Գործելաձեւը միեւնոյնն էր Հայաստան – Ատրպէյճան յարաբերութիւններու գծով, ուր ան շրջանցելով Միացեալ Նահանգներու ծերակուտականներուն կողմէ դրուած կասեցումը, միակողմանի որոշումով նշանակեց Ազերիամէտ, նաեւ ազերի կնոջ մըն ալ կողակից Մաթիու Պրայզան` Պաքուի մօտ Միացեալ Նահանգներու դեսպան: Ասոր կողքին եւ համատեղ, ան անտեսեց Արցախի ինքնորոշման սատարելու իր նախընտրական խոստումը:
Կարելի է պարագան նոյնը նկատել, Հանրապետական թեկնածու Միթ Ռոմնիի որդեգրած անտարբերութեան առնչութեամբ: Ընտրութիւններու սեմին իսկ, ան կը խուսափի ամերիկահայութեան հետ որեւէ շփումէ, հաւանաբար հաշիւներ կատարելով թէ այս կամ այն տարբեր գաղութներ աւելի թիւ կը հաշուեն եւ ազդեցիկ են: Ան այնքան մը անտարբերութիւն կը ցուցաբերէ որ, նոյնիսկ արհամարահանքի հասցուցած է իր դիրքորոշումը:
Սակայն մէկդի դրած այդ նախագահական ընտրութիւններուն օրը բնորոշող Նոյեմբեր 6 թուականը, տեղին է նկատի ունենալ թէ այդ օր նաեւ պիտի կատարուին տեղական կամ դաշնակցային մակարդակի ընտրութիւններ, որոնց գծով ամերկահայը ունի իր կարծիքն ու նաեւ յօգուտ հայութեան մասնակցող հայ կամ հայամետ թեկնածուն:
Հոս տեղին է շեշտել թէ անտարբեր պիտի ըլլանք Սպիտակ Տան յառաջիկայ չորս տարուայ վարձակալին գծով, սակայն տեղական թէ դաշնակցային մակարդակի վրայ, պիտի գործէ ամերիկահայուն քուէն, որուն ցուցակէն ներս դրականօրէն նկատի առնուած են այն թեկնածուները, որոնք յաւելեալ աջակցութիւն ցուցաբերած են Հայաստանի եւ Արցախի առնչութեամբ, նաեւ, հայութիւնը հետաքրքրող եւ յուզող հարցերու վերաբերեալ դրական կեցուածք եւ դիրքորոշում որդեգրած են:
Հետեւաբար 2008-ի բաղդատած տարբերութիւնը` անտարբերութիւնն է, սակայն ո՛չ բոլոր մակարդակներու վրայ:
