0
0
ՈՒԱՇԻՆԿԹԸՆ.- Նախագահ Պարաք Օպամա, Գերագոյն Ատեանին յղուած նամակով մը, կոչ ըրած է, որ չքննէ Հայկական Ցեղասպանութեան օրերուն ապահովագրութիւն գնած հայորդիներու իրաւունքներուն վերաբերող հարցը:
Այս նամակը որ Ուրբաթ, Մայիս 10 թուակիր է, պատրաստուած է կառավարութեան փաստաբանին կողմէ:
Նշենք, թէ Միացեալ Նահանգներու Շրջանային իններորդ ատեանը բեկանած էր Գալիֆորնիոյ նահանգային այն օրէնքը, որ ապահովագրական ընկերութիւններէն իրենց իրաւունքներուն վերատիրանալու արտօնութիւն կու տար ապահովագրութիւն գնողներու ժառանգորդներուն: Գերագոյն ատեանը Հոկտեմբեր 2012ին դիմած էր Օպամայի կառավարութեան` անոր դրական կարծիքն ու արդար մօտեցումը խնդրելով:
Գերագոյն Ատեանին յղուած 27 էջնոց նամակին մէջ, Օպամայի կառավարութիւնը կը շեշտէ, թէ Գալիֆորնիան իր իրաւասութիւններէն դուրս օրէնքներ սահմանած է` աւելցնելով, թէ Ուաշինկթըն անյարմար կը նկատէ Օսմանեան շրջանին պատահած քաղաքական բնոյթով դատեր քննարկութեան ենթարկելը: Դատը անցած է իրաւական երկար ու բարդ ճամբայէ մը, որուն ընթացքին Շրջանային 9րդ ատեանը երեք տարբեր ու հակասական վճիռներ արձակած է. անոնցմէ վերջինը` Փետրուար 23, 2012ին, որ կը բեկանէր Գալիֆորնիոյ օրէնքը: Այս որոշումէն ետք, դատը փոխանցուած էր Գերագոյն Ատեան:
Ամերիկայի Հայ Դատի յանձնախումբի գործադիր վարիչ Արամ Համբարեան դատապարտեց Օպամայի այս քայլը` զայն Թուրքիոյ վարչակազմին ձօնուած նուէր մը նկատելով, մանաւանդ որ այս վերջինը պաշտօնական այցելութիւն մը պիտի տայ Միացեալ Նահանգներ: Համբարեան աւելցուց, թէ այս քայլը նպատակ ունի ոտնակոխել իրենց իրաւունքներուն վերատիրանալու ամերիկացի քաղաքացիներուն իրաւունքը եւ կը խորացնէ Ցեղասպանութեան ուրացման արշաւին մէջ Օպամայի կառավարութեան մեղսակցութիւնը:
Համբարեան եզրակացուց, թէ հակառակ Օպամայի կառավարութեան այս որոշումին, Հայ Դատը պիտի շարունակէ հետապնդել այս հարցը` պահանջելով հայերու իրաւունքներուն արդար հատուցումը:
Յաւելեալ տեղեկութեանց համար, այցելել www.anca.org/legal/insuranceclaims կայքէջը:
