Յունիս 20-ի Արտահերթ Ընտրութիւններ․- Հ.Յ.Դ. – Հ․Հ․ Երկրորդ Նախագահ Ռ. Քոչարեան – «Վերածնուող Հայաստան» Դաշինք

0 0
Read Time:4 Minute, 6 Second

ԵՐԵՒԱՆ․- Անցեալ շաբաթավերջին, Հայ Յեղափոխական Դաշնակցութեան եւ «Վերածնուող Հայաստան» կուսակցութեան մասնակցութեամբ ու Հայաստանի Հանրապետութեան երկրորդ նախագահ Ռոպերթ Քոչարեանի գլխաւորութեամբ, հիմնադրուեցաւ «Հայաստան» դաշինքը` յառաջիկայ ընտրութիւններուն մասնակցելու համար:
Կիրակի, Մայիս 9-ին, Երեւանի «Կրանտ հոթել» պանդոկին մէջ տրուեցաւ քաղաքական համագործակցութեան մեկնարկը: Հանդիսաւոր արարողութեան ելոյթով հանդէս եկաւ Հայաստանի երկրորդ նախագահ Ռոպերթ Քոչարեանը եւ պարզաբանեց, թէ ինչո՛ւ ինքը եւ Հ․Յ․Դ․ եւ «Վերածնուող Հայաստան» կուսակցութիւնները կը նախաձեռնեն այս դաշինքին:
«Երկիրը կանգնած է ծայրայեղ մարտահրաւէրներու առջեւ եւ այդ մարտահրաւէրները հիմնականին մէջ կապուած են անվտանգութեան սպառնալիքներու հետ: Երկիրը ունի կառավարման եւ տնտեսական ճգնաժամ: Երկրին մէջ ակնյայտ է նաեւ ինքնութեան ճգնաժամ: Պէտք են ուժեր, պէտք են մարդիկ, որոնք բաւարար չափով փորձառութիւն ունին այսպիսի մարտահրաւէրներ յաղթահարելու համար: Ինչո՞ւ ես. ունիմ կառավարման մեծ փորձ ճգնաժամային իրավիճակի մէջ, ունիմ կուտակած փորձառութիւն եւ գիտելիքներ անվտանգութեան պաշտպանութեան համակարգին մէջ, ունիմ փորձառութիւն տնտեսական ճգնաժամ յաղթահարելու իմաստով: Եւ ինչպէս կը տեսնէք, ներկայ վտանգները եւ կուտակած փորձառութիւնն ու գիտելիքները գրեթէ կը համընկնին:
Ինչո՞ւ Հ․Յ․Դաշնակցութիւնը… Որովհետեւ ասիկա այն կուսակցութիւնն է, որ ամբողջ աշխարհին մէջ պայքարած է եւ կը պայքարի հայերու ինքնութիւնը պահպանելու համար: Ասիկա այն կուսակցութիւնն է, որուն հետ ունիմ երկարատեւ համագործակցութիւն: Դաշնակցութիւնը եղած է կառավարութեան անդամ իմ նախագահութեան տարիներուն, նոյնիսկ, երբ քոալիսիոն դեռ ձեւաւորուած չէր: Փորձառութեան արդիւնաւէտ արդիւնքները կան եւ բոլորդ այդ արդիւնքներուն ականատեսը եղած էք:
Ինչո՞ւ «Վերածնուող Հայաստան», որ ծնած է Սիւնիքի մէջ եւ հիմա կը տարածուի ամբողջ Հայաստանի մէջ, որովհետեւ Սիւնիքը այսօր ներկայ սպառնալիքներու կեդրոնն է Հայաստանի մէջ: Սիւնիքէն կախեալ է` մենք պիտի մնա՞նք իբրեւ գործօն այս շրջանին մէջ, թէ՞ պիտի դառնանք կցորդ: Այստեղ վտանգները լուրջ են, եւ կը կարծեմ Սիւնիքը այսօր մեր պայքարի խորհրդանիշը կը հանդիսանայ», նշեց Հայաստանի երկրորդ նախագահը:
Հ․Յ․Դ․ Հայաստանի Գերագոյն մարմինի ներկայացուցիչ Իշխան Սաղաթէլեան իր ելոյթին մէջ շեշտեց, թէ կը վերահաստատուի ճիշդ 6 ամիս առաջ սկսած իրենց պայքարի յաղթական աւարտի անհրաժեշտութիւնը` շեշտելով, որ գործող իշխանութիւնը պէտք է հեռանայ: «Յառաջիկայ ընտրութիւնները սովորական չեն: Ասիկա մեր կեանքի ամենէն պատասխանատու ու ճակատագրական ընտրութիւնն է», նշեց ան եւ աւելցուց, որ ասիկա պետութիւն ունենալ-չունենալու ընտրութիւն է:

«Վերածնուող Հայաստան» կուսակցութեան նախագահ Վահէ Յակոբեան մանրամասնօրէն խօսեցաւ Սիւնիքի դէմ ուղղուած սպառնալիքներուն եւ խնդիրներուն մասին` նշելով, որ Սիւնիքը Հայաստանի այն մեկնակէտն է, որ կը սկսի, բայց չ’աւարտիր Հայաստանի եւ Արցախի անվտանգութիւնը:
«Հայաստան» դաշինքի հիմնադրութեան հանդիսաւոր արարողութենէն ետք Հայաստանի Հանրապետութեան երկրորդ նախագահ Ռոպերթ Քոչարեանի գլխաւորութեամբ, դաշինքի պատասխանատու առաջնորդները երթով միացան Ազատութեան հրապարակին վրայ հաւաքուած քաղաքացիներուն:
Իր ելոյթին ընթացքին նախագահ Քոչարեան յիշեցուց, որ այսօր Շուշիի ազատագրման օրն է. «Այսօր այս հարթակէն մենք յետհաշուարկ կը սկսինք Շուշին յանձնած իշխանութեան հետ` իշխանութեան մնալու առումով: Անոնց մնացած է 42 օր, վաղը պիտի մնայ 41 օր, միւս օրը 40 օր եւ այդպէս շարունակ: Ուրեմն ամէն օր ընկերային ցանցերուն վրայ դրէք օրերու այդ յետհաշուարկը: Ասիկա պէտք է դառնայ ամբողջ հանրապետութեան աճող սպասելիքը: Վստահ եղէք, որ ամէն ինչ լաւ պիտի ըլլայ», ըսաւ Քոչարեան:
Իսկ Հ․Յ․Դ․ Հայաստանի Գերագոյն մարմինի ներկայացուցիչ Իշխան Սաղաթէլեան իր ելոյթին ընթացքին ըսաւ, թէ այսօր հայ ժողովուրդի յաղթանակի օրն է, Շուշիի ազատագրման օրն է, սակայն այսօր յաղթանակի խորհրդանիշ Շուշին գերութեան մէջ է: «Դուք լաւ գիտէք անոր մեղաւորն ու պատասխանատուն: Մեր երկիրը ճգնաժամի մէջ է: Մենք վերջին 6 ամիսներուն միասին պայքարած ենք այդ դաւաճանը հեռացնելու համար: Այժմ պայքարը տեղափոխուած է նոր փուլ: Ժողովուրդը աղէտի հասցուցած մարդը պիտի փորձէ յառաջիկայ ընտրութիւններուն խաբելով ժողովուրդը, սուտի, կեղծիքի ատելութեան անուան տակ վերարտադրուիլ: Եկէք բոլորս միասին այս հրապարակին մէջ պայմանաւորուինք, որ ատիկա պիտի չարտօնենք: ․․․Դուք այսօր Հայաստանի յաղթողներուն կողքին էք, յաղթանակ կերտած մարդոց կողքին էք: Մենք Հայաստանին պիտի բերենք նոր յաղթանակներ: Մենք կու գանք Հայաստանի մէջ ապահովելու ազգային արժանապատուութիւն, համերաշխութիւն, ապահովելու զարգացում եւ ընկերային արդարութիւն, կու գանք կերտելու ապրելու Հայաստան, կու գանք համախմբելու Հայաստանի, սփիւռքի, ամբողջ հայութեան ներուժը յանուն հայ ժողովուրդի ապագային: Մենք կ’երաշխաւորենք պաշտպանուած սահմաններ, անվտանգ հայրենիք: Մենք կ’երաշխաւորենք, որ Հայաստանի քաղաքացիի կեանքին մէջ տեղի պիտի ունենան զգալի եւ տեսանելի փոփոխութիւններ: Մենք կ’երաշխաւորենք արդարութիւն, ազատութիւն, համերաշխութիւն», յայտնեց Սաղաթէլեան:
Հանրահաւաքի ընթացքին խօսք առաւ նաեւ «Վերածնուող Հայաստան» կուսակցութեան նախագահ Վահէ Յակոբեան, շեշտելով, թէ․ «Նիկոլի իշխանութեան վերարտադրումը կործանում է Հայաստանի համար: Մեկնելով ասկէ` Հ․Յ․Դաշնակցութիւնը, Հայաստանի երկրորդ նախագահ Ռոպերթ Քոչարեանը, «Վերածնուող Հայաստան» կուսակցութիւնը որոշած են հանդէս գալ միասնական ճակատով եւ ձեւաւորել «Հայաստան» դաշինքը»։
Նշենք, թէ Հ․Յ․Դ․ Գերագոյն Մարմինը պատշաճ յայտարարութեամբ մը, այս դաշինքին առնչութեամբ յայտարարութիւն մը հրապարակած եև, տեղեկացնելով, թէ․ –
Մեր ինքնութեան եւ պետականութեան պահպանումը, երկրի անվտանգութեան ապահովումը պահանջում են ազգային ուժերի և գործիչների համախմբում ու միասնական պայքար՝ ուղղուած գործող իշխանութեանը հեռացնելուն՝ կանխելու համար ընտրութիւնների անուան տակ նրանց հնարաւոր վերարտադրութիւնը։
Հ․Յ․Դ․ Հայաստանի Գերագոյն մարմինը, Հ․Յ․Դ․ Հայաստանի կազմակերպութեան 24-րդ Գերագոյն ժողովի կողմից տրուած լիազօրութիւնների շրջանակում, տարբեր քաղաքական ուժերի եւ գործիչների հետ ունեցած քննարկումների արդիւնքում անհրաժեշտ է համարել առաջիկայ խորհրդարանական հնարաւոր ընտրութիւններին մասնակցել միասնական ճակատով։
Հիմք ընդունելով ներկայ քաղաքական իրավիճակին տրուած գնահատականները, ճգնաժամը յաղթահարելու և երկիրը զարգացման հուն տեղափոխելու փորձը, ինչպէս նաև Հայաստանի ապագայի տեսլականի ընդհանրութիւնները՝ Հ․Յ․Դ․ Հայաստանի Գերագոյն մարմինը որոշել է Հ․Հ․ երկրորդ նախագահ Ռոպերթ Քոչարեանի և «Վերածնուող Հայաստան» կուսակցութեան հետ հանդէս գալ դաշինքով։
Դաշինքը պատրաստակամ է ստանձնել ամբողջական պատասխանատուութիւն՝ համազգային միասնականութեամբ և համատեղ ջանքերով ձևաւորել նոր որակի իշխանութիւն, լուծել երկրի առջև ծառացած լրջագոյն մարտահրաւէրները, կասեցնել պետականութեան փլուզումը, կերտել Հայաստանի երաշխաւորուած ապագան։
Հռչակագրի մասին մանրամասնութիւններ․-

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles