ՅՈՅՆԵՐՈՒ ՀԵՏ ՄԵՐՁԵՑՄԱՆ ՏԱՒՈՒԹՕՂԼՈՒԻ ԶՈՅԳ ԵՐԵՍՆԵՐԸ

0 0
Read Time:2 Minute, 35 Second

p7 davutoglou samaras

Հռիփսիմէ
«Ազատ Օր»
Աթէնք – Յունաստան

 

Աթէնքի մէջ կիրքերը բորբոքեցուցած Թուրքիոյ վարչապետ Ահմետ Տաւութօղլուի այցելութիւնը աւարտեցաւ, իր ետին ձգելով քննադատութիւններու, ենթադրութիւններու եւ հետեւումներու ատաղձ:
Թուրք պաշտօնատարի այցելութեան նպատակներն ու հեռանկարները քննարկելու իմաստով կ՚արժէ կանգ առնել երեք հիմնական կէտերու վրայ.-
– Թրակիա այցելութեան պարագան
– Կիպրոսի եւ Յունաստանի հետ ծովային սահմաններու հետ կապուած հարցերը եւ յատկապէս Կիպրոսի բնական պաշարներու «համա»օգտագործման թրքական պնդումներու պարագան:
– Յոյն հատուածներու հետ մերձեցման փորձերը:
Քննելով այս երեք պարագաները, մէկ հիմնական հասարակ յայտարար կարելի է տեսնել: Յայտնի է, թէ Անգարա գերագոյն ճիգ կը թափէ, որպէսզի իր դիմագրաւած խնդրայարոյց օրակարգերուն մէջ նոր ոճ մտցնելու տպաւորութիւնը ստեղծէ՝ ձեւականօրէն իբր թէ «յառաջ երթալու» գաղափարը տարածելով: Այսուհանդերձ Աթէնք լրջօրէն վրդոված եւ խորապէս մտահոգուած է՝ Անգարայի իրական մտադրութիւնները քննելով այս հարցերուն կապակցութեամբ: Յոյն-թրքական տնտեսական եւ առեւտրային երկկողմ յարաբերութիւններու զարգացման ուղղուած գերագոյն խորհուրդի կայացումը Աթէնքի մէջ, լարուածութիւնը մեղմացնելու ծառայող նախաձեռնութիւն մը պիտի ըլլար, եթէ ճշմարիտ ու անկեղծ ըլլային թրքական կողմի կեցուածքները: Ոչ միայն այդպէս չեղաւ, այլ Կիպրոսի ինքնիշխանութեան խախտումներու փորձերէն ստեղծուած ճնշուած ու ծանր կլիման, դեռ աւելի պիտի բարդանար Թրակիա ծրագրուած այցելութեամբ, մանաւանդ եթէ 10 նախարարներով Թրակիայի մէջ շրջագայող Տաւութօղլուի այցելութեան օրերուն՝ կիպրական սահմանային գիծերը շարունակաբար խախտէր թրքական հետազօտական Պարպարոս նաւը: p7 davoutoglu athens
Հարցերէն լաւատեղեակ ընթերցողը հոս պիտի առարկէր, ըսելու համար թէ արդեօ՞ք առաջին անգամը պիտի ըլլար, որ թրքական կողմը Թրակիա պիտի այցելէր «անձնական այցելութիւն» պիտակը օգտագործելով: Ոչ անշուշտ: Սակայն 10 նախարարներէ բաղկացած բարձրապաշտօն պատուիրակութեան պաշտօնական այցելութիւնը՝ պարզ գրգռութենէ մը շատ աւելի անդին գացող տարբերակ պիտի ըլլար, որ նոր կացութիւններ պիտի պարտադրէր Յունաս- տանին, այնպիսի ժամանակամիջոցի մը, երբ մահմետական փոքրամասնութեան պատկանող քուէները դիւրաւ պիտի հասցէագրուէին, Յունաստանի ապագային համար քաղաքական ու ազգային լուրջ հետեւանքներ կրող ընտրութիւններու նախօրեակին:
Այս հարցերու լոյսին տակ, հետաքրքրութեամբ կը կարդանք յունական մամուլի այն լուրը, թէ Պոլսեցիներու եւ Իմվրոսցիներու միութեանց ներկայացուցիչներ սիրալիր հանդիպում մը ունեցած են «Հիլթըն» հիւրանոցին մէջ իջեւանած Ահմետ Տաւութօղլուի հետ, աշխուժօրէն ներկայացնելով ժառանգական իրենց իրաւունքներու տիրանալու կամ հատուցման արժանանալու պահանջները:
Վարչապետ Տաւութօղլու փութացած է երաշխաւորելու թէ Իմվրոսի մէջ գալ տարի կանոնաւորպէս պիտի գործեն յունական վարժարանները, հաւաստիացնելով թէ այլ հնարաւորութիւններ եւս պիտի տրուին, որպէսզի երկրին մէջ շարունակէ գոյատեւել յոյն-ուղղափառ տարրը՝ արդարութեան եւ մարդու իրաւունքներու հիմնարար ազատութիւններու յարգման մթնոլորտի մէջ:
Ինչքա՜ն յառաջդիմութիւն, նկատել պիտի տար կասկածամիտ ընթերցողը, որ պիտի փութար աւելցնելու թէ յայտնի է որ Թուրքիա շատ լաւ կը գիտակցի իր խոցելի կէտերուն:p7 samaras-davutoglu
Այդ խոցելի կէտերուն մէջ պարտաւոր կը զգայ «յառաջընթաց» ցոյց տալու, եթէ կ՚ուզէ որպէս ղեկավար ու հաւասարակշռող ուժ դիտուի եւրոպական համայնքին կողմէ: Բայց ոչ միայն արտաքին, այլ նաեւ՝ ազգային արժանապատուութեան պահանջով հնչող ներքին՝ իր հասարակութենէն եկող բողոքի ձայներուն գոհացում տալու համար:
Թէ ի՛նչ պատրաստ է ի՛րապէս տալու Թուրքիան, կախեալ է այդ «յառաջդիմութիւն»ը ցոյց տալու իր մարմաջի աստիճանէն: Եթէ երէկ Անգարա անվնաս կը նկատէր մի քանի հայկական եկեղեցիներու մէջ տարին անգամ մը հայկական պատարագ թոյլատրելու պարագան, ու այսօր աշխարհին առջեւ կը ձեւացնէ, թէ Հայաստանի հետ հաշտեցման գործընթաց մը հունի մէջ է, թէ Յունաստանի հետ իր հարցերը լուծելու լաւ պայմաններ կը ստեղծէ, պէտք չէ զարմանալ վաղը, եթէ Թուրքիա նոյն «բարեացակամ» մօտեցումը ցուցաբերէ Հայաստանի հետ սահմանները վերաբանալու մասին, կամ Հայոց Ցեղասպանութեան մէջ մեր «ցաւը» կիսելու աւելի աշխուժ կեցուածքով…:
Հայոց Ցեղասպանութեան 100ամեակին նախորդող զգուշաւորութեան ու ճնշուածութեան այս ժամանակաշրջանին գործենք այնպէ՛ս, որ պետական մակարդակի վրայ մեր ազգային հարցերը օրակարգային պահանջք դառնան:

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles