Յառաջիկայ Փուլին Հայեցակարգը․- Ինչպիսի՞ Հայաստան Եւ Ինչպէ՞ս

0 0
Read Time:5 Minute, 0 Second

Սիրելի՛ հայրենակիցներ

Արցախը, Հայաստանի անկախութիւնը վտանգուած են:

Ապազգային, ապիկար իշխանութեան պատճառով:

Այս վիճակը պարտաւոր ենք շտկել: Հնարաւո՞ր է, այո՛: Ինչպէ՞ս: Ելքը անվտանգութիւն-համերաշխութիւն-կայունութիւն-առաջընթաց շղթայով ուժեղ Հայաստանի կերտումն է:

Ուժեղ Հայաստան կերտելու համար նախ պէտք է հեռացնենք սրանց: Եւ բերենք մի իշխանութիւն, որը`

Կ՛ապահովի թուրք-ատրպէյճանական արտաքին յարձակումների զսպումը` արդիականացնելով Հայաստանի ու Արցախի միասնական անվտանգութեան համակարգը: Այն հիմնուած է ռազմավարական գործընկեր երկրների ներգրաւման, հայոց զինուած ուժերի վերակառուցման, նոր որակի միջազգային դիւանագիտութեան վրայ:

Կը վերահաստատի Արցախի ժողովրդի անվտանգութեան եւ ինքնորոշման իրաւունքի երաշխաւոր լինելու` Հայաստանի Հանրապետութեան յանձնառութիւնը` բացառելով Արցախի որեւէ կարգավիճակ Ազրպէյճանի կազմում եւ առանց Հայաստանի հետ յուսալի ցամաքային կապի Արցախի անքլաւային վիճակ: Գործուն քայլերը ուղղուած են լինելու 1994 թուականի ԵԱՀԿ-ի ձեւաչափով եւ նպատակներով բանակցային գործընթացի վերականգնմանը:

Կը բացառի Հայաստանի ինքնիշխանութեան եւ տարածքային ամբողջականութեան հաշուին հաղորդակցութեան ուղիների ապաշրջափակման անուան տակ միջանցքների տրամադրումը:

Ատրպէյճանի կողմից ուժի կիրառման եւ ուժի կիրառման սպառնալիքի ներքոյ չի իրականացնի սահմանազատում եւ սահմանագծում:

Հայաստան-Թուրքիա յարաբերութիւններում կը բացառի որեւէ համաձայնութիւն, որը հարցականի տակ կը դնի հայ ժողովրդի հայրենազրկման եւ ցեղասպանութեան իրողութիւնը, ինչպէս նաեւ հայութեան հոգեւոր-մշակութային ժառանգութեան կրողը լինելու իրաւունքը:

Առաջնահերթ կարեւորութիւն կը տայ պարենային անվտանգութեանը եւ պետական պահուստի խնդիրներին:

Կարեւորագոյն խնդիր կը դիտարկի հայ ռազմագերիների, պատանդառուածների ու պահուող այլ անձանց վերադարձը:

Կը վարի արհեստավարժ եւ յստակ չափորոշիչներով քատրային քաղաքականութիւն` ապահովելով կառավարման համակարգային ճգնաժամի յաղթահարումը: Պետութեան կառավարումից ի սպառ բացառուելու են ամբոխահաճութիւնը, սուտը, կեղծիքը, անգործութիւնը, անպատասխանատուութիւնը, փտածութեան բացայայտ եւ թաքնուած ցանկացած դրսեւորում: Խրախուսուելու է աշխատասիրութիւնը, պետական եւ ազգային մտածելակերպը, անհատական եւ հաւաքական պատասխանատուութիւնը: Կը ձեւաւորուի գործունակ եւ արդիւնաւէտ պետական կառավարման նոր կառուցուածք: Առաջնահերթ կարգով վերականգնուելու են գիւղատնտեսութեան եւ մշակոյթի նախարարութիւնները, վերակառուցուելու է իրաւապահ համակարգը` դրանք ամբողջութեամբ ծառայեցնելով քաղաքացուն: Քաղաքում եւ գիւղում բնակուող մարդու բարեկեցութիւնը լինելու է վարուող ոլորտային քաղաքականութեան, պաշտօնատար անձի գործունէութեան գնահատման չափանիշ: Տնտեսական աճը ուղղակիօրէն պէտք է արտացոլուի կենսամակարդակի վրայ` ապահովելով եկամուտների կայուն աճ: Մարդկանց վարկային եւ պարտքային բեռը պէտք չէ զրկի նրանց արժանապատիւ ապրելու հնարաւորութիւնից:

Սիրելի՛ հայրենակիցներ,

Վերականգնելու ենք ներքին համերաշխութիւնը, հասնելու ենք համահայկական ներուժի մէկտեղմանը` վերացնելով խորացող ատելութիւնը, պառակտուածութիւնը եւ անտարբերութիւնը: Կը բացառուեն մեր կեանքում անցեալի եւ ներկայի արատաւոր բարքերը` երկիրը զերծ պահելով ցնցումներից:

Սիրելի՛ հայրենակիցներ, այս ծիրին մէջ ուզում եմ անդրադառնալ մի հարցի` այս օրերին յաճախ տրուող. շատ է խօսւում` հանրահաւաքի վայրում յայտնւում են մարդիկ, որոնք անընդունելի են եւ… զզուելի, նախկինում պաշտօն զբաղեցրած:

Սփիւռքի, Հայ առաքելական սուրբ եկեղեցու եւ ազգային միւս կառոյցների անմիջական ներգրաւմամբ կը ձեւաւորեն ներքին ու արտաքին մարտահրաւէրները դիմագրաւելու համահայկական յստակ օրակարգեր:

Այդպիսի իշխանութիւն ձեւաւորելու համար անհրաժեշտ է.

Ազգային համաձայնութեան/ժամանակաւոր կառավարութիւն: Սա նշանակում է` դերակատար քաղաքական ուժերը ստանձնում են հաւաքական պատասխանատուութիւն` ձեւաւորելով պետութեան կառավարման իւրայատուկ «ազգային հաւաքական», որը կը բացառի մէկ անձի ներքոյ իշխանութեան կեդրոնացումը:

Սրանց հեռացնելուց յետոյ կը հրապարակենք այն 250 բարձրակարգ մասնագէտների անունները, որոնք յառաջիկայ տարիներին կը լինեն մեր կառավարման համակարգի ու պետական վարչամեքենայի յենասիւնը: Նրանցից չի պահանջուելու ո՛չ կուսակցականութիւն, ո՛չ հաւատարմութիւն ինչ-որ մէկ անձի, ո՛չ ղազագիր: Նրանք ուսապարկի կարգավիճակ չեն ունենալու, այդ մարդիկ ունակ էլ չեն այդպիսի վարքագծի: Նրանցից շատ-շատերին դուք ճանաչում էք, նրանք մեր մէջ են: Նրանք արդէն 4 տարի ու այսօր էլ պայքարում են յանուն մեր երկրի ազատութեան, յանուն ամուր պետականութեան, յանուն Արցախի, յանուն հզօրացման ու թուրքին մեր երկրից քշելու: Նրանք գրեթէ բոլորն այստեղ են, պայքարի թոհուբոհում, հրապարակում, փողոցներում կամ ազատ մամուլի եթերում: Նրանք իսկական հայրենասէրներ են, արհեստավարժներ, որոնց գործունէութեամբ կարող է հպարտանալ ցանկացած պետական համակարգ ցանկացած երկրում:

Բացառել կարեւորագոյն հարցերի վերաբերեալ վարչապետի միանձնեայ որոշումների կայացումը: Վարչապետը պաշտպանութեան եւ անվտանգութեան հարցերով կարող է որոշումներ գործադրել միայն անվտանգութեան խորհրդի հետ միաձայնութեամբ: Վարչապետի գերլիազօրութիւնները սահմանափակուելու են, ներդրուելու են իրական խորհրդարանական կառավարման մեքանիզմներ: Ընդունուելու է նոր օրէնք անվտանգութեան խորհրդի եւ կառավարութեան կառուցուածքի ու գործունէութեան վերաբերեալ:

Պէտք է արագ ձեւաւորել զինուած ուժերի բարձրագոյն հրամանատարական կազմ, ուժեղացնել դիւանագիտական անձնակազմը` համակարգ վերադարձնելով արհեստավարժ քատրերին, նուազագոյնի հասցնելով քաղաքական նշանակումները:

Ժամանակաւոր կառավարութիւնը

1.- Անմիջապէս կը ձեւաւորուի քաղաքական ու մասնագիտական իմաստով բարձրակարգ բանակցային խումբ, որը ոչ թէ վախի, պարտուողականութեան ու թրքամէտութեան դիրքերից, այլ բացառապէս մեր ազգային-պետական շահերից ելնելով կը բանակցի Ազրպէյճանի, հարկ եղած դէպքում` նաեւ Թուրքիայի հետ: Կը բանակցի յստակ ու լաւ մշակուած հայեցակարգով: Խումբ, որը երբեք ոչ մի ազգային հարցի նշաձող չի իջեցնի: Նշեմ նաեւ Արցախում տեղակայուած ռուս խաղաղապահների դերի նուազեցումն անթոյլատրելի է:

2.- Հետեւողական քայլերով մենք կը վերացնենք ատելութեան մթնոլորտը երկրում, մարդիկ այլեւս չեն հետապնդուի իրենց քաղաքական հայեացքների համար, իսկ օրէնքը հաւասար է լինելու բոլորի համար` անկախ կարգավիճակից:

.Հայաստանը կրկին դառնալու է ներդրումների համար գրաւիչ երկիր, իսկ Երեւանը կրկին դառնալու է համայն հայութեան մայրաքաղաքը:

Իրավիճակի կայունացումից յետոյ (ենթադրաբար 1-1.5 տարի յետոյ) կազմակերպուելու են ազատ, արդար, մրցակցային արտահերթ ընտրութիւններ: Ինչպէ՞ս հասնել դրան:

Ազգակործան վարչախմբին իշխանութիւնից զրկելը ենթադրում է երկու փուլ` երկիշխանութեան առաջացում եւ գործող իշխանութիւնների հեռացում: Երկիշխանութիւնն արդէն կայանում է, որի դրսեւորումներն են`

1.- ձեւաւորուել է լայն համախմբում` հանրային տարբեր շերտերի ու շրջանակների աջակցութեամբ: Այս հրապարակը դարձել է գործօն,

2.- թէ՛ երկրի ներսում, թէ՛ արտաքին աշխարհի համար փաստուել է, որ Նիկոլը երկիրը նոր զիջումների տանելու համար օրինական իրաւագիր չունի,

3.- հանրային ճնշմամբ իշխանութիւնները ստիպուած արդէն փորձում են քողարկել իրենց հայրենադաւ ծրագրերը,

 

4.- իշխանութեան միակ յենարանը մնացել է ոստիկական բիրտ ուժը,

5.- երկրում քաղաքական ճգնաժամ է: 2021 թուականի ընտրութիւնները ոչ մի հարց չեն լուծել:

Յստակ կարող ենք արձանագրել, որ իշխանութիւնների հեռացման համար անհրաժեշտ բոլոր պայմաններն առկայ են`

Իշխանութիւնն անկարող է կասեցնել ժողովրդային շարժումը.

Ըստ այդմ` մեր յառաջիկայ խնդիրներն են`

1.- Ի ցոյց դնել, որ փաստացի իշխանութիւնը հրապարակներում է:

2.- Ի ցոյց դնել, որ իշխանութիւնն անկարող է ժողովրդի ցասումի առջեւ: Այլ խօսքով` ժողովուրդը պէտք է դառնայ իրողութեան լիարժէք տէրը, թելադրի իր կամքը` փակելով ու բացելով ինչ ուզի եւ երբ ուզի: Սա վերջնականապէս ակնյայտ կը դարձնի Նիկոլի փաստացի իշխանազրկումը, որից յետոյ Նիկոլի հրաժարականը կը դառնայ անխուսափելի:

Ի՞նչ է պէտք դրա համար: Ընդամէնը մի բան, սիրելի՛ հայրենակիցներ, մեծացնել անհնազանդութեան ցոյցերու ծաւալները, մասնակիցների քանակը եւ դառնալ իրադրութեան տէրը. սա է յառաջիկայ օրերին մեր առջեւ դրուած խնդիրը:

Ես այստեղից դիմում եմ Հայաստանի, Արցախի, սփիւռքի քաղաքական ուժերին, հասարակական ուժերին, ընկերային բոլոր շերտերին, մասնագիտական շրջանակներին, կարող անհատներին, հոգեւոր-մշակութային-կրթական, պիզնեսի, Այ. Թի., ռազմական գործիչներին, բոլորին` Հայաստանն ամէնքինս է: Կանգնենք կողք-կողքի: Մենք կարող ենք լուծել ցանկացած խնդիր:

Այստեղ կուսակցական պայքար չկայ, արտօնեալ խմբեր ու անհատներ չկան, այստեղ համաժողովրդական ընդվզում է` յանուն իւրաքանչիւրիս արժանապատուութեան, յանուն ազգային ինքնութեան, յանուն արդար, ուժեղ, համերաշխ պետութեան, յանուն Արցախի, Հայաստանի:

Վստահէ՛ք, մասնակցէ՛ք, մենք յաղթելու ենք:

 

Իշխան Սաղաթէլեան

«Դիմադրութիւն» Շարժում

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles