0
0
Հ․Օ․Մ․-ի Տիթրոյթի «Սիպիլ» մասնաճիւղի աւանդական դարձած «Մայրերու Օր»-ուան ձեռնարկը տեղի ունեցաւ Շաբաթ, 13 Մարտին, «Պաքքօ» ճաշասրահէն ներս։ Իբրեւ աւանդոյթ ձեւակերպուած Տիթրոյթի Հ․Օ․Մ․-ի իւրաքանչիւր մասնաճիւղի տարեկան ձեռնարկները կը միտին լուսարձակի տակ առնել, յիշել ու յիշեցնել, վերակենդանացնել եւ երիտասարդ սերունդներուն փոխացնել հայկական աւանդական տօներն ու առ այդ ստեղծուած ժողովրդական ծիսական տօնախմբութիւնները։ Այսպէս օրինակ՝ «Շաքէ» մասնաճիւղին վիճակուած էր «Միջինք»-ը, «Ցոլիկ» մասնաճիւղին՝ «Համբարձում»-ը, «Սիպիլ» մասնաճիւղին՝ «Մայրերու Օր»ը, «Մարօ» մասնաճիւղին՝ «Աւագ շաբթուան ընթրիք»-ը։
Մայիսի երկրորդ շաբաթը յիշատակուող «Մայրերու Օր»-ը առիթ հանդիսացած է Տիթրոյթի հայ մայրերը, մեծ մայրերն ու զիրենք ջերմապէս շնորհաւորող հարազատները համախմբել մէկ յարկի տակ եւ յարգանքի տուրք մատուցել հայ մօր անմնացացորդ նուիրումին։ Թագաժահրի պատճառով այս համախմբումը եւս չեղարկուած էր նախորդ տարիներուն… Ճաշասրահը խճողուած էր հանդիսականներով, ջերմ մթնոլորտը ապահովուած էր գեղարուեստական կոկիկ յայտագրով՝ կիթառահար Թոմի Զաքարեանի եւ քանոնահար Արա Թոփուզեանի մատուցած երաժշտական ընտիր կտորներով։
Մասնաճիւղի վաստակաւոր ընկերուհի Հերմինէ Մանուկեան բարի գալուստ մաղթեց ներկաներուն, անդրադարձաւ հայ մօր կրկնակի պարտաւորութեանց եւ հայու տիպարը կերտելու անփոխարինելի դերակատարութեան։ Այնուհետեւ, յիսունամեայ ծառայութեան համար ոսկեայ մետալով պարգեւատրեց մասնաճիւղի վաստակաշատ ընկերուհի Մարի Աւետեան-Ճորճը։ Հրամցուած համեղ ճաշին եւ քաղցրաւենիքին առընթեր վիճակահանութեան տոմսերը ներկաներուն մատուցեցին բազմաթիւ եւ բազմազան նուէրներ ու անակնկալներ…
