0
0
ԵՐԵՒԱՆ․- Ապրիլ 15-ին Հ․Յ․Դ․ Հայաստանի Գերագոյն մարմինը հրապարակեց հետեւեալ հաղորդագրութիւնը.-
Հայրենակիցնե՛ր,
Երկրում արտակարգ դրութիւն է, որը ենթադրում է համարժէք կեցուածք բոլորի` թէ՛ իշխանութիւնների, թէ՛ քաղաքական դաշտի, թէ՛ հասարակութեան կողմից: Համաճարակի, դրա հետեւանքով առաջացած բազմաթիւ առկայ ու սպասելի առողջապահական, տնտեսական, ընկերային եւ այլ մարտահրաւէրների լուծումը պահանջում է բոլոր ուժերի ու կարելիութիւնների համախմբում: Միայն համախմբման ու փոխօգնութեան ճանապարհով մենք` որպէս պետութիւն ու ժողովուրդ, կը կարողանանք յաղթահարել այս տագնապը:
Այս գիտակցութեամբ ու համոզմունքով է Հայ յեղափոխական դաշնակցութիւնը արտակարգ պայմաններում գործում արտակարգ դրութեամբ` հնարաւորին օգնութիւնը ցուցաբերելով մեր հայրենակիցներին եւ իրավիճակի յաղթահարման իր առաջարկները ներկայացնելով կառավարութեանը:
Ցաւօք, համախմբուելու եւ հիմնախնդիրները միասնաբար յաղթահարելու այս գիտակցութիւնն իշխանութեան կողմից առայժմ ո՛չ միայն չի կարեւորւում ու չի կազմակերպւում, այլեւ հակառակը` շարունակւում է հասարակութիւնը պառակտելու հին, արատաւոր ու խիստ վտանգաւոր գործելաոճը: Իշխանութեան քաղաքական շահախնդրութիւններն արդէն անցնում են զուտ մարդկային, բարոյական ու արժեհամակարգային բոլոր սահմանները:
Ամենայն հայոց կաթողիկոսը հանդէս եկաւ Հայաստանի Հանրապետութեան երկրորդ նախագահ Ռոպերթ Քոչարեանի խափանման միջոցը համաճարակի այս պայմաններում փոխելու` զուտ մարդկային, բարեսիրական, բարոյական ու միանգամայն արդարացուած յորդորով: Ցաւօք, այդ մարդասիրական յորդորը տակաւին ո՛չ միայն պաշտօնական պատասխանի չի արժանացել, այլեւ կազմակերպուած կերպով սանձազերծուել է տգեղ ու անբարոյական քարոզարշաւ հայոց հայրապետի ու Հայ առաքելական սուրբ եկեղեցու դէմ:
Հ․Յ․Դ․ Հայաստանի Գերագոյն մարմինը յայտարարում է.
Հայ առաքելական սուրբ եկեղեցու դէմ հերթական այս արշաւը անթոյլատրելի է ու խիստ վտանգաւոր` դա նենգ ու թշնամական հարուած է պետութեանն ու ժողովրդին:
Իշխանութիւններից պահանջում ենք յստակ դիրքորոշում յայտնել այս կապակցութեամբ եւ համապատասխան վերաբերմունք դրսեւորել նմանօրինակ կեցուածք ցուցաբերած քաղաքական, պետական, հանրային գործիչների հանդէպ:
Հայ առաքելական սուրբ եկեղեցու եւ ազգային արժէքների դէմ ցանկացած ոտնձգութիւն մեր կողմից արժանանալու է համարժէք պատասխանի:
Հ․Յ․Դ․ ՀԱՅԱՍՏԱՆԻ ԳԵՐԱԳՈՅՆ ՄԱՐՄԻՆ
15 ապրիլ 2020
