0
0
Արեւելեան Ա.Մ.Ն.-ի Կեդրոնական Կոմիտէն կ՛ողջունէ Հայաստանի մէջ ստեղծուած խաղաղ աւարտը: Գրեթէ երկու շաբաթ տեւողութիւն ունեցող ցոյցերէ ետք, նորընտիր վարչապետ Սերժ Սարգսեան ենթարկուեցաւ ծողովուրդի կամքին եւ ներկայացուց իր հրաժարականը: Դժուարութեամբ իրականացուեցաւ այս գործընթացը: Ցուցարարները իրենց տիպար ընթացքով եւ ոչ-խափանարարական գործելաձեւով, յաւելեալ ոգեւորութիւն ստեղծեցին: Այս դէպքերը ցոյց կու տան, թէ համեմատած իր դրացի երկիրներուն, Հայաստանի ժողովրդավարութեան արմատները ամրակուռ ու պինդ են:
Երեսուն տարի առաջ ալ, հետեւողական ցոյցեր, պատճառ դարձած էին, որ Հայաստանի ժողովուրդը ընթանայ դէպի ժողովրդավարութիւն: Մինչ այդ, տարիներու ընթացքին, հակառակ պարտադրուած օրէնքներուն, երիտասարդ սերունդը կրցած էր կառչած մնալ ժողովրդավարութեան կանոններուն:
Հ.Յ.Դաշնակցութիւնը եղած է եւ կը մնայ ի նպաստ ժողովրդավար Հայաստանի համար գործող կուսակցութիւն: Այս պատմութիւնը կերտած ժամերէն ետք, Հայաստանի Հանրապետութիւնը ժրաջան եւ հետեւողական աշխատանքի կարիքն ունի, շտապօրէն բարեփոխումներ կատարելու համար, պայքարելով փտածութեան, օլիկարխիայի, աղքատութեան եւ գաղթին դէմ: Նոր ղեկավարութիւն մը պէտք է ստանձնէ երկրին ղեկը, նոր մօտեցումով եւ նոր գաղափարներով:
Պէտք է վստահինք, որ մեր հայրենի բնակչութեան բոլոր խաւերը՝ ունեւորն ու չքաւորը, երիտասարդն ու տարեցը հարկ է, որ մասնակից դառնան Ապագայի Հայաստանի կերտման գործընթացին մէջ: Աչալուրջ եւ զգոյշ պէտք է ըլլանք, որպէսզի այս արձանագրուած յաղթանակը, միայն ի նպաստ խմբակի մը չըլլայ:
Արեւելեան Ա.Մ.Ն.-ի Կեդրոնական Կոմիտէ
Պոսթըն – Մասաչուսէց
