0
0
Յարգելի՛ քաղաքացիներ
Հետեւելով Հայաստանի Հանրապետութեան նախագահի ընտրութեան օրուայ ընթացքին, տեղամասերում քուէարկութեան ամփոփմանը, վերլուծելով ստացուած տեղեկատուութիւնը եւ Կենտրոնական ընտրական յանձնաժողովի յայտարարած նախնական արդիւնքները` Հ.Յ.Դ. Հայաստանի Գերագոյն մարմինը ներկայացնում է իր գնահատականները:
Հայաստանի քաղաքացիները փետրուարի 18-ին ապացուցեցին, որ իրենց համբերութիւնը սահման ունի, որ իրենք շատ աւելի լաւ կեանքի եւ իշխանութեան են արժանի, որ անհնար է մարդկանց մէջ մեռցնել արդարութեան, ազատութեան ձգտումը:
Ժողովրդի ընդվզումը երկրում առկայ քաղաքական, ընկերային, տնտեսական իրական վիճակի եւ բարոյական մթնոլորտի պատասխանն էր: Պատասխանն էր իշխանութեան եւ նրա` վերեւից ներքեւ ներկայացուցիչների ինքնագոհ այն պահուածքի, թէ իրենք հասարակութեան բացարձակ մեծամասնութեան վստահութիւնն ու աջակցութիւնն ունեն: Ակնյայտ դարձաւ, որ ժողովրդի գերակշիռ մասը գործող համակարգը չի ընդունում:
Խորհրդարանական ընտրութիւններին իշխանութեան կիրառած վարչական-ֆինանսական անսահմանափակ միջոցներին այս անգամ շատ տեղամասերում գումարուեցին նաեւ համակարգուած խախտումները ձայների հաշուարկման ժամանակ: Խոստացուած ամենալաւ ընտրութիւնները հերթական շատ վատն էին: Արդիւնքների ամփոփումն ապացուցեց մեր այն համոզումը, որ ընտրութիւնները կանխորոշուած են, միջազգային դիտորդների գնահատականը` կանխատեսելի:
Յարգելի՛ քաղաքացիներ, ստեղծուած յետընտրական իրավիճակը, հնարաւոր զարգացումները հսկայական պատասխանատուութիւն եւ դժուար որոշումներ են պարտադրում ե՛ւ գործող իշխանութեանը, ե՛ւ հիմնական մրցակից թեկնածուին, ե՛ւ ընդդիմադիր ուժերին, ե՛ւ հասարակութեան աշխուժ հատուածին: Փետրուարի 18-ին մեր ժողովրդի դրսեւորած կամքը պէտք չէ ոտնահարուի: Հ.Յ. Դաշնակցութիւնը ժողովրդի կողքին է, համատեղ ուժերով լուծումներ գտնելու կողմնակից: Մենք պարտաւոր ենք գիտակցել պահի լրջութիւնը եւ ելքեր որոնել: Սա ծանր, բայց անխուսափելի աշխատանք է, որ պարտաւոր ենք անել միասին: Մենք պարտաւոր ենք արժանի լինել մեր ժողովրդին: Միայն այս ճանապարհով, միայն յստակ ձեւակերպուած քաղաքական օրակարգով է հնարաւոր երկիրը տեղապտոյտից ու նահանջից փոխադրել կայուն զարգացման հուն եւ մեր քաղաքացիների համար անվտանգ, արժանապատիւ ապագայ երաշխաւորել:
Հ.Յ.Դ. ՀԱՅԱՍՏԱՆԻ ԳԵՐԱԳՈՅՆ ՄԱՐՄԻՆ
Փետրուար, 20 , 2013
