ՄԻ՛ՇՏ ՊԱՏՐԱՍՏ

0 0
Read Time:1 Minute, 36 Second

hmem

ՀԱՅՐԵՆԻՔ
Խմբագրական
Յունիս 22, 2016

Ա.Մ.Ն. Արեւելեան Շրջանի Հ.Մ.Ը.Մ.-ի ընտանիքը, անգամ մը եւս հաւաքուած պիտի տօնէ Նաւասարդեան խաղերը:
Վայր.- հովերու քաղաք՝ Շիքակօ:
Սկաուտներ եւ մարզիկներ՝ հոծ թիւով համակիրներու հովանիին տակ պիտի տողանցեն եւ մրցին:
Այս հաւաքը յաւելեալ առիթ մըն է, որ ամենայն բծախնդրութեամբ թրծուած Հ.Մ.Ը.Մ.-ական սկաուտն ու մարզիկը բարձրանան ու բարձրացնեն իրենց անմիջական շրջապատը, գաղութն ու ժողովուրդը:
Այս դաստիարակութիւնն է, որ կը զօրացնէ Հ.Մ.Ը.Մ.-ը, եւ զայն կը վերածէ աշխոյժ եւ գործօն միութեան մը:
Այս մրցումները պարզ մարզական ելոյթներ ու ճակատումներ չեն, այլ թէ՛ մարզիկը եւ թէ՛ հանդիսատեսը կը փոխադրեն քայլ մը աւելի անդին:
Կիրարկելով իր ստացած դաստիարակութիւնը, Հ.Մ.Ը.Մ.-ականը, այս մրցումներուն պիտի մնայ կարգապահ, քաղաքավար եւ նկարագրով, բարոյականով ու մտքով մաքուր հայորդի:
Հետեւաբար տեղին է կրկնել թէ, Հ.Մ.Ը.Մ.-ի առաքելութիւնը միայն ու միայն մարմնակրթանքն ու առ հասարակ մարզանքը չէ, այլ անոր պարտականութիւնն է թրծել ապագայ սերունդ, ուր կը ժայթքին հայաստեղծ նկարագիրն ու հայակերծ ապրումները:
Հ.Մ.Ը.Մ.-ականին յաջողութիւնն ու յաղթանակը միայն իրեն չպատկանիր, այլ միեւնոյն ժամանակ՝ իր միութեան:
Եւ այդ իսկ պատճառով, մարզական բարձր ոգիով պայքարելու այդ կամքն է որ ուժ, կորով եւ մանաւանդ հաւատք պիտի ներշնչէ, ամրացնելով իւրայատուկ Հ.Մ.Ը.Մ.-ականի նկարագիրն ու հոգին:
Ճիշտ է դաշտին վրայ, կայ յաղթականն ու պարտեալը:
Հ.Մ.Ը.Մ.-ականը նոյնքան վեհանձնութեամբ կ՛ընդունի թէ՛ յաղթանակ եւ թէ՛ պարտութիւն:
Այսպէս, Հ.Մ.Ը.Մ.-ական մարզիկը կը դաւանի «՚Առողջ Միտքը, Առողջ Մարմնի Մէջ» կարգախօսը, եւ դեռ աւելին՝ յառաջանալով, կը միտի ամէն գնով ծառայել Հայաստանի եւ հայութեան:
Հ.Մ.Ը.Մ.-ականը միշտ ալ պատրաստ է զինուորագրուելու եւ ծառայելու Հայաստանի եւ հայ ժողովուրդին: Այս մէկը մարտահրաւէր մըն է, հակառակ ստեղծուած բազմատեսակ փշաթելերուն եւ դժուարութիւններուն:
Ի վերջոյ, Հ.Մ.Ը.Մ.-ականը կը հաւատայ Հայ Դատին, Հայաստանին եւ անշուշտ Արցախին:
Եւ այս գաղափարներով, նպատակներով եւ ապրումներով է, որ պիտի ժամանէ հովերու քաղաք, բարձր պահելու համար իր միութեան դրօշը:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post «Խոճան Գիտցածը Կը Կարդայ»… Էրտողանի Կարդացածը Ի՞նչ Է
Next post ՀԱՅԱՍՏԱՆԻ ՄԷՋ, ՓՐԱՆԿԻՍԿՈՍ ԿԸ ՅԱՆԴԳՆԻ ԱՐՀԱՄԱՐՀԵԼ ԷՐՏՈՂԱՆ ԽԱԼԻՖԱՆ

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles