ՄԵՏԱԼՆԵՐԸ ԱՐՑԱԽԻՆ ՆՈՒԻՐՈՂ ՄԵՐ ԱԽՈՅԵԱՆՆԵՐԸ

0 0
Read Time:2 Minute, 9 Second

Nazig 2

Արցախի սահմաններուն վրայ, հայ զինուորն ու կամաւորը Ապրիլի առաջին օրերուն սխրանքներ արձանագրեցին, ազերի յելուզակները ետ մղեցին գրաւեալ տարածքներէ եւ հայկական դրօշը վերահաստատեցին Թալիշի, Մատաղիսի ու շրջակայ դիրքերու վերեւ։
Քանի մը օր ետք, հայ մարզիկներ հայկական դրօշը ծածանեցին Նորվեկիոյ մէջ, ծանրաբարձութեան Եւրոպայի ախոյեանութեան մրցումներուն (10էն 16 Ապրիլին). անոնք շահեցան ոսկեայ, արծաթեայ ու պրոնզեայ մետալներ, հնչեցուցին մեր քայլերգը եւ ազդարարեցին, որ պատրաստ են քանի մը ամիս ետք, Ռիոյի մէջ տեղի ունենալիք Ողիմպիականներուն եւս կրկնելու հայկական սխրանքը։
Մետալակիրները երիտասարդներ ու երիտասարդուհիներ են. հոգեխռով էր մանաւանդ յաղթականներուն այն յայտարարութիւնը, թէ իրենց մետալները կը նուիրեն Արցախին ու անոր սահմանները պաշտպանող զինուորներուն։ Անոնք կը կոչուին, տղոց խումբերուն մէջ՝ Անդրանիկ Կարապետեան, Տիգրան Մարտիրոսեան, Կոր Մինասեան, իսկ աղջկանց խումբերուն մէջ՝ Նազիկ Աւդալեան եւ Հռիփսիմէ Խուրշուտեան։ Մետալակիրներուն կողքին, ոչ արհամարհելի արդիւնքներ արձանագրեցին նաեւ երիտասարդներ՝ Վանիկ Աւետիսեան, Աղասի Աղասեան, Առաքէլ Միրզոյեան, Սիմոն Մարտիրոսսեան, եւ երիտասարդուհիներ՝ Իզապելլա Եայլայեան, Քրիստինէ Պետրոսեան, Սօնիա Պօղոսեան եւ Արփինէ Տալլալեան։ Ո՞վ գիտէ. վերջիններն ալ կրնան վաղը իրենց անունները արձանագրել մետալակիրներու ցանկին։
Ի դէպ, չենք ուզեր անտեսել այն հայ ծանրաբարձները, որոնք իրենց անունները արձանագրեցին այս մրցաշարքին, թէեւ կը կրէին Ռուսիոյ, Ուքրանիոյ, Ռումանիոյ եւ այլ երկիրներու շապիկները։
Հայաստանը ներկայացնող այս երիտասարդներն ու երիտասարդուհիները առաջին անգամը չէ, որ իրենց անունները կþարձանագրեն ախոյեաններու տոմարներուն վրայ։ Այս հանգրուանին, ուշագրաւը այն է, որ անոնք իրենց յաղթանակներով մասնակից-հաղորդակից են արցախեան ճակատումներուն։
Կþարժէ, որ իւրաքանչիւր հայ աւելի մօտէն ծանօթանայ այս հերոսներուն ու հերոսուհիներուն, որոնք բարձր կը պահեն այն դրօշները, որոնք քանի մը տասնամեակ առաջ բարձրացուած էին Եուրի Վարդանեանի, Օքսէն Միրզոյեանի եւ աշխարհահռչակ այլ ախոյեաններու կողմէ, այն հերոսներուն՝ որոնք կը խաղային աշխարհի մրցանիշներուն հետ։ Անոնք կը մրցէին խորհրդային դրօշի տակ, սակայն հայ էին ուղն ու ծուծով։
Ժամանակակից ախոյեաններէն կþարժէ առանձնացնել գոնէ մէկը՝ գիւմրեցի Նազիկը, որուն պատմութիւնը կարելի է նկատել կրկնակի սխրանք։
Նորվեկիայէն Հայասատան վերադարձին, պատկերասփռուած հարցազրոյցի մը պահուն, ան յիշեցուց, որ աշխարհի 2009ի ախոյեանութիւնը նուաճելէն տարի մը ետք, 2010ին, Երեւան-Գիւմրի ճամբուն վրայ ինքնաշարժի ծանր արկած մը ունեցած էր. անոր ողնասիւնը ծանրօրէն վնասուած էր. վիրաբոյժները ստիպուած էին մետաղեայ ցպիկներով վերակազմել զայն։ Բոլորը կþափսոսային, որ երիտասարդուհիին մարզական կեանքը կանխահասօրէն աւարտին հասած էր։ Ան Հայաստանի անկախ հանրապետութիւնը ներկայացնող աշխարհի առաջին ախոյեանուհին է։
Ախոյեանները դիւրութեամբ տեղի չեն տար։ Ան վերականգնած է, ամուսնացած, մայր դարձած է (մայր է նաեւ Հռիփսիմէն) ու վերսկսած՝ փորձերուն, անտեսելով բժիշկներուն արգելքները։ Եւ ահա, ան վերստին կը դառնայ ախոյեան, կը նուաճէ Եւրոպայի ոսկի մետալը՝ մինչեւ 69 քլկ. ծանրութեան դասակարգին մէջ, ապացուցելով, որ միայն անունով նազիկ է, իսկ կամքն ու մկանները պողպատեայ են։
…Կար ժամանակ, երբ մեր երիտասարդներն ու պատանիները քայլ առ քայլ կը հետեւէին Եուրիներու, Օքսէններու եւ այլ հայ հերոսներու նուաճումներուն, կþապրէին ազգային հպարտութիւն։ Այսօր, այս երիտասարդները նո՛յնքան հպարտանքի աղբիւր են երիտասարդներուն ու ողջ հայութեան համար։
Սպասենք անոնց ողիմպիական նուաճումներուն…
Ս. ՄԱՀՍԷՐԷՃԵԱՆ

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles