ՄԵԾԻ ՏԱՆՆ ԿԻԼԻԿԻՈՅ ԿԱԹՈՂԻԿՈՍՈՒԹԵԱՆ ՄԱՍՆԱԿՑՈՒԹԻՒՆԸ ԵԿԵՂԵՑԻՆԵՐՈՒ ՀԱՄԱՇԽԱՐՀԱՅԻՆ ԽՈՐՀՈՒՐԴԻ 11-ՐԴ ՀԱՄԱԺՈՂՈՎԻՆ

0 0
Read Time:2 Minute, 6 Second

 

Եկեղեցիներու Համաշխարհային Խորհուրդի (Ե.Հ.Խ.) 11-րդ համաժողովը կայացաւ Օգոստոս 31-էն մինչեւ Սեպտեմբեր 8, Գերմանիոյ Քարլսրուհէ քաղաքին մէջ, մասնակցութեամբ Խորհուրդի անդամ աւելի քան 350 եկեղեցիներու շուրջ 4000 պատուիրակներու։ Համաժողովը կը կրէր «Քրիստոսի Սէրը Աշխարհը Կը Մղէ Հաշտութեան Եւ Միասնութեան» խորագիրը։ Օրհնութեամբ Արամ Ա. Վեհափառ Հայրապետին, Մեծի Տանն Կիլիկիոյ Կաթողիկոսութեան պատուիրակութիւնը համաժողովին իր գորօն մասնակցութիւնը բերաւ 12 պատուիրակներով.- Գերշ. Տ. Կոմիտաս Արք. Օհանեան, Գերշ. Տ. Սեպուհ Արք. Սարգիսեան, Գերշ. Տ. Գեղամ. Արք. Խաչերեան, Գերշ. Տ. Նարեկ Արք. Ալեէմէզեան, Գերշ. Տ. Մասիս Եպս. Զօպուեան, Գերպ. Տ. Հրանդ Ծ. Վրդ. Թահանեան, փրոֆ. Թենի Փիրի-Սիմոնեան, Սեդա Խըտըշեան, Դոկտ. Նորա Գապագեան-Պայրագտարեան, Վանա Կիտցինեան, Թամար Գանարեան եւ Արազ Գոճայեան։

Ե.Հ.Խ.ի Համաժողովը գերագոյն ժողովն է Խորհուրդին, որ իւրաքանչիւր 8 տարին անգամ մը կը գումարէ իր նիստերը։ Վերջին համաժողովը տեղի ունեցաւ 2013 թուականին, Փուզանի մէջ, Հարաւային Քորէա, եւ թագաժահրի համաճարակին պատճառով 11-րդ համաժողովը տարուան մը ուշացումով գումարուեցաւ այս տարի, Գերմանիոյ եկեղեցիներու միասնական հրաւէրով։

Մասնակիցները, պատգամաւորնեը, ներկայացուցիչները, երիտասարդները, ուսանողները, հիւրերը եւ դիտորդները համաժողովին իրենց մասնակցութիւնը բերին զանազան լիակատար նիստերու, միջ-եկեղեցական զրոյցներու, պաշտամունքներու, վարժանիստերու եւ դաւանական ու տարածաշրջանային ժողովներու։ Համաժողովի ընթացքին արծարծուեցաւ ու վաւերացուեցաւ նորընտիր Կեդրոնական Վարչութեան մանտաթը, ինչպէս նաեւ ընտրուեցաւ նոր Կեդրոնական Վարչութիւնը։

Համաժողովի լիակատար նիստերու ընթացքին թէ՛ յանձնախումբերու ժողովներուն մէջ մեր Սուրբ Աթոռին պատուիրակութիւնը պարզեց հայ եկեղեցւոյ ու ազգին արդար պահանջները։ Մեծի Տանն Կիլիկիոյ Կաթողիկոսութեան պատուիրակութեան անդամները մաս կազմեցին հետեւեալ յանձնախումբերուն.- Հանրային Հարցերու (դոկտ. Ն. Գապագեան-Պայրագտարեան, դիւանի անդամ), Թեկնածութեան (Թ. Գանարեան), Ծրագիրի Ուղեցոյցի (փրոֆ. Թ. Փիրրի-Սիմոնեան), Տնտեսութեան (Ս. Խտըշեան) եւ Պատգամի (Հրանդ Ծ. Վրդ. Թահանեան)։ Նշենք, որ հայր Հրանդ կրօնքի եւ հաւատքի ազատութեան վերաբերեալ միջ-եկեղեցական նիստին ատենապետութիւնը վարեց. նիստին կողմէ յառաջացած տեղեկագիրը Ե.Հ.Խ.-ի յառաջիկայ ութ տարուան ուղեցոյցին մաս պիտի կազմէ։

Կարեւորութեան հարկ է նշել, որ Արամ Ա. Վեհափառ Հայրապետը, որ երկու յաջորդական ընտրաշրջանի համար ատենապետած է Ե.Հ.Խ.-ի Կեդրոնական ու Գործադիր Վարչութիւնները, միաձայնութեամբ ընտրուեցաւ Կեդրոնական Վարչութեան նախագահներէն մէկը՝ ներկայացնելով Արեւելեան Ուղղափառ Եկեղեցիները եւ Միջին Արեւելքը։

Աւելին, Նարեկ Արք. Ալեէմէզեան եւ Հրանդ Ծ. Վրդ. Թահանեան ընտրուեցան Ե.Հ.Խ.-ի Կեդրոնական Վարչութեան անդամներ։

Յատկանշական է, որ պատուիրակութեան անդամներէն եւ Հանրային Հարցերու Յանձնախումբի դիւանի անդամ դոկտ. Գապագեան-Պայրագտարեանի ջանքերով եւ խորհրդակցաբար Վեհափառ Հայրապետին, համաժողովը որդեգրեց Արցախի հարցին վերաբերալ բանաձեւ։ Բանաձեւին մէջ, որ արդէն իսկ հրապարակուեցաւ, համաժողովը բարձրացուց հայ ռազմագերիներու վերարաձի հարցը, հայկական կրօնական ու մշակութային վայրերու եւ կոթողներու աւերման ու բնաջնջման խնդիրը, կոչ ուղղեց ԵՈՒՆԵՍՔՕ-ին եւ միջազգային ընտանիքին պատշաճ միջոցներ որդեգրելու պաշտպանելու եւ պահպանելու համար զանոնք, ինչպէս նաեւ՝ Ե.Ա.Հ.Կ.-ի Մինսքի խմբակին, որպէսզի յանձնառու ըլլայ քայլեր առնելու Արցախի հակամարտութեան արդար եւ խաղաղ լուծման։

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles