0
0
ՅԱԿՈԲ ՎԱՐԴԻՎԱՌԵԱՆ
Նիւ Եորք
Սուրիահայութեան օգնութեան հասնելու համար տարուած աշխարհատարած ջանքերուն եկաւ միանալ նաեւ Նիւ Եորքի համայնքը: Արդարեւ, հովանաւորութեամբ Ամերիկայի Հայաստանեայց Եկեղեցւոյ եւ մասնակցութեամբ զանազան կազմակերպութիւններուն Ապրիլ 6, 2013, Շաբաթ օր երեկոյեան տեղի ունեցաւ սուրիահայութեան ի նպաստ կազմակերպուած երաժշտահանդէսը, որուն մասնակցեցան տասնեակ մը երիտասարդ արուեստագէտներ: “Ֆելիշըն“ գոլէճի մեծ սրահը լեցուն էր 700 հայորդիներով:
Բացման աղօթքը կատարեց Ս. Խաչ եկեղեցւոյ հովիւ Վազգէն Ծ. Վրդ. Գարայեան:
Օրուան հանդիսավարն էր Լոս Անճելըսէն ծանօթ լրագրող եւ “USA Armenia Life Magazine“ի հրատարակիչ Աբօ Ճապարեան, որ շեշտեց Սուրիոյ մեր հարազատներուն օգտակար ըլլալու անհրաժեշտութիւնը. “անոնք կը ներկայացնեն հարազատ ժառանգորդները տեղահանութեամբ եւ ցեղասպանութեամբ Սուրիական անապատը աքսորուած հայութեան“:
Օրուան հրամայական խորհուրդը ներկայացուց մեր գաղութի աւագ սերունդի ազգայիններէն, դարձեալ լրագրող Կարպիս Գազանճեան եւ շնորհակալութիւն յայտնեց կազմակերպիչ յանձնախումբին երիտասարդ անդամներուն, որոնք երկու ամիսներէ ի վեր աշխատանքի լծուած են եւ արդէն կոկիկ գումար մը ապահոված են նուիրատուութիւններէ եւ յայտարարութիւններէ:
Ասմունքով ելոյթ ունեցաւ “Հայաստանի Ձայնը“ հեռուստաընկերութեան հաղորդումներու վարիչը` Կարինէ Քոչարեան:
Գեղարուեստական յայտագրով ելոյթներ ունեցան Հ.Բ.Ը.Մ.-ի “Անդրանիկ“, Համազգային “Նայիրի“ եւ Հայ Տունի “Աղթամար“ պարախումբերը: Երգով հանդէս եկան Անթուանէթ Քասսաս, Ալին Գորիկըն, Թերեզա Յակոբեան, Կարօ Կոմիտաս, Էտուարտօ Տիամենթէ, Նշան Ջաղացպանեան եւ Ժագ Յակոբեան: Ջութակով Տիանա Վասիլեան անգամ մը եւս հմայեց իր ունկնդիրները, իսկ Անի Մուրատեան դաշնակի վրայ ունեցաւ իր յայտագիրը:
Աւարտին խօսք առաւ Հայր Անուշաւան Եպս. Դանիէլեան, որ քաջալերեց ներկաները աւելիով օգտակար ըլլալու Միջին Արեւելքի մեր այդ աւանդական գաղութին:
Գնահատելի է աշխատանքը երիտասարդաց յանձնախումբին եւ այս ձեռնարկը նախաձեռնող ու համադրող ազգայինին` Ճորճ Խորոզեանին, որ նախկին հալեպահայ ըլլալով ան, իր ուսերուն վրայ համարեայ դրած էր այս գործին ամբողջ ծանրութիւնը:
