0
0
Հայ Օգնութեան Միութեան Կեդրոնական Վարչութիւնը յայտարարեց, որ Հ.Օ.Մ.-ի Հարիւրամեակի նշումին համար իր կազմակերպած ձեռնարկներուն առաջինը տեղի պիտի ունենայ 10 Մարտ, 2010-ին՝ Նիւ Եորքի Գառնըկի դահլիճէն ներս:
»Հ.Օ.Մ.-ի 26 երկիրներու մէջ գործող միաւորները ամիսներէ ի վեր սկսած են Հ.Օ.Մ.-ի Հարիւրամեակը նշող ձեռնարկներու կազմակերպման: Կեդրոնական Վարչութիւնը, ի°ր կարգին, մի քանի համահայկական տարողութեամբ ձեռնարկներ կը կազմակերպէ, որոնց առաջինը՝ Նիւ Եորքի մէջ, որպէս Հ.Օ.Մ.-ի ծննդավայրը«,- բացատրեց Հ.Օ.Մ.-ի Կեդրոնական Վարչութեան ատենապետուհի Վիգի Մարաշլեանը:
Պետական, կազմակերպութիւններու եւ հայկական եկեղեցւոյ ներկայացուցիչներու կողքին, Նիւ Եորքի մէջ Հ.Օ.Մ.-ի Հարիւրամեակի նշումի ձեռնարկին իրենց մասնակցութիւնը պիտի բերեն Գառնըկի Ընկերակցութեան Տնօրէն Վարդան Գրիգորեանը, արուեստագիտուհի Ալիսա Նաքաշեան-Հոլսպըրկը եւ օփերայի երգիչներ Եղիշէ Մանուչարեանն ու Վիքթորիա Աւետիսեանը: Ձեռնարկի ընթացքին Հ.Օ.Մ.-ի »Արարատ« մրցանակի տուչութիւն տեղի պիտի ունենայ: Օրուան գլխաւոր բանախօսը Կիներու Համաշխարհային Դրամատան նախագահ Մարի-Էլեն Իսկենտէրեանը պիտի ըլլայ:
»Հ.Օ.Մ.-ի Հարիւրամեակը սոսկ նշումէն անդին կը փափաքինք տանիլ եւ այս առիթով կÿուզենք քննական ակնարկ մը նետել մեր անցնող մէկ դարու պատմութեան վրայ, յառաջիկայ հարիւրամեակի մեր գործունէութիւնը արդի պայմաններուն յարմարող ամուր հիմերու վրայ դնելու համար թէ° մեր ժողովուրդի կարիքներու վերլուծումի, թէ° մեր ու ընդհանրապէս հայ կնոջ կարողականութեան ուսումնասիրութեան եւ թէ աշխատանքի արդի ձեւերու որդեգրման տեսակէտէն: Այս նպատակով, Գառնըկի դահլիճի ձեռնարկին յաջորդ օրը, Մարտ 11-ին, Նիւ Ճըրզիի մէջ կազմակերպած ենք սեմինար մը, որու քննարկումներուն իրենց մասնակցութիւնը պիտի բերեն միջազգային կազմակերպութիւններու եւ ակադեմական կառոյցներու մէջ պատասխանատու պաշտօններ վարող հայ կիներ«,- շարունակեց Վիգի Մարաշլեանը:
Ա.Մ.Ն. Արեւելեան շրջանի Հ.Օ.Մ.-ականներու եւ համակիրներու կողքին, միութեան Հարիւրամեակի Նիւ Եորքի ձեռնարկին մասնակցելու կու գան Ա.Մ.Ն. Արեւմտեան շրջանէն, Գանատայէն, Հարաւային Ամերիկայէն, Ֆրանսայէն, Յունաստանէն ու Լիբանանէն աւելի քան երկու հարիւր միութենականներ:
Միութեան Հարիւրամեակի նշումի կամ այդ առիթով կազմակերպուած ձեռնարկներու շարքին են Օգոստոսին՝ Հ.Օ.Մ.-ի Եւրոպական Երկրորդ Նաւապտոյտը, Հոկտեմբերին՝ դէպի Տէր Զօր ուխտագնացութիւն մը, Հալէպի մէջ սեմինար մը, դարձեալ Հոկտեմբերին՝ Հայաստանի մէջ ձեռնարկներու շարք մը, Հ.Օ.Մ.-ի հարիւրամեայ պատմութեան նուիրուած հատորի մը լոյս ընծայումը եւ ֆիլմերու պատրաստութիւն: 2010 տարուան ընթացքին Հ.Օ.Մ.-ի Հարիւրամեակի ձեռնարկներ կը կազմակերպեն միութեան բոլո°ր շրջանները, Հիւսիսային Ամերիկայէն մինչեւ Աւստրալիա եւ Եւորպայէն ու Միջին Արեւելքէն մինչեւ Արցախ:
Հ.Օ.Մ.-ի Հարիւրամեակի աշխարհասփիւռ ձեռնարկներու մանրամասնութիւններուն կարելի է ծանօթանալ Հ.Օ.Մ.-ի կայքէջէն՝ www.ars1910.org հասցէով:
