Մամլոյ Ասուլիս` Հ.Յ.Դ. Նորընտիր Բիւրոյի Ներկայացուցիչներու

0 0
Read Time:4 Minute, 9 Second

 


ԵՐԵՒԱՆ․- Հինգշաբթի, Մարտ 10-ին Հ.Յ.Դ. Բիւրոյի գրասենեակին մէջ տեղի ունեցաւ Հ.Յ.Դ. նորընտիր Բիւրոյի ներկայացուցիչ Յակոբ Տէր Խաչատուրեանի եւ Հ.Յ.Դ. Բիւրոյի քաղաքական ներկայացուցիչ Արմէն Ռուստամեանի մամլոյ ասուլիսը:

«Հ.Յ.Դ. 34-րդ Ընդհանուր ժողովը գումարուեցաւ այնպիսի շրջանի մը մէջ, երբ Հայաստանն ու Արցախը ճգնաժամ կ՛ապրին: Վերջին երեք տարիները մեր պատմութեան մէջ դժուարագոյն տարիներն էին, մեծ մարտահրաւէրներու առջեւ կանգնեցաւ ամբողջ հայ ժողովուրդը», նշեց Հ.Յ.Դ. նորընտիր Բիւրոյի ներկայացուցիչ Յակոբ Տէր Խաչատուրեան:

«Այդ ցնցումը ստեղծեց յուսահատութեան ալիք, պարտուածի հոգեբանութիւն, որ պէտք է թօթափել, ամէն գնով փակել այդ էջը եւ անցնիլ առաջ: Մեզի կը սպասեն նոյնքան դժուար, եթէ ոչ աւելի, տարիներ, որոնք կրնան ճակատագրական ըլլալ: Այդ առումով Հ.Յ.Դ. Ընդհանուր ժողովը նշեց, որ այս իշխանութիւններուն վարած ապազգային քաղաքականութիւնը յանգեցուցած է ու կը յանգեցնէ յաւելեալ պառակտումներու, այդ պառակտումը տեղափոխուած է սփիւռք, ինչ որ շատ ցաւալի է: Մենք պատրաստ ենք մեր բաժինը ընելու եւ յայտարարած ենք, որ անհրաժեշտութիւն է համահայկական կառոյցներուն, մեր երկու կաթողիկոսութիւններուն հետ ստեղծել այնպիսի ֆորում, որ նաեւ նպաստէ սփիւռքի ամրապնդման, հիասթափութեան մթնոլորտը ցրելուն», ըսաւ ան:

Յակոբ Տէր Խաչատուրեան անդրադարձաւ թուրք-ատրպէյճանական խնդիրին:

«Թուրքիան իրականացուցած է իր երազանքներուն մէկ մասը` թափանցել Հարաւային Կովկաս: Հիմա Թուրքիոյ ախորժակը սրած է, եւ այս խորապատկերին վրայ Հայաստան-Թուրքիա յարաբերութիւններու կարգաւորման հարցին պէտք է մօտենալ չափազանց զգուշաւորութեամբ, որովհետեւ այդ մօտեցումները երբեք պէտք չէ խանգարեն եւ ի վնաս ըլլան մեր համահայկական շահերուն` անտեսելով հայ ժողովուրդի անժամանցելի պահանջատիրական իրաւունքները, ինչպէս նաեւ Հայաստանի ու Արցախի անվտանգութիւնը, տարածքային ամբողջականութիւնը», ըսաւ ան:

Ան ընդգծեց, որ Հ.Յ.Դ.-ն անհրաժեշտ կը նկատէ պայքարի նոր մօտեցումներու, նոր ձեւերու յառաջացումը. «Մենք մեր միջոցներուն արդիականացման խնդիրը ունինք, եւ այդ ուղղութեամբ պիտի աշխատինք աշխարհով մէկ»:

Այսօրուան իշխանութիւնները հանդէս չեն գար իբրեւ Արցախի եւ արցախահայութեան անվտանգութեան երաշխաւոր: Ասիկա շատ ցաւալի երեւոյթ է, որովհետեւ անցեալին միշտ շեշտած ենք, որ այդ երաշխաւորութիւնը պէտք է տայ Հայաստանը: Նոյնիսկ նշած ենք, որ եթէ անկախութեան ճանաչման ընթացքը չկարենայ ամբողջականացնել Հայաստանը, պէտք է նուազագոյնը ունենայ ռազմաքաղաքական դաշինք Արցախի հետ: Այսօր իշխանութիւնները երբեմն նոյնիսկ կը խուսափին այդ հարցէն, կը խուսափին նոյնիսկ Հայ դատի հետապնդումէն` փորձելով այդ պատասխանատուութիւնը դնել միայն սփիւռքի ուսերուն», ըսաւ Տէր Խաչատուրեան:

«Երբ կը խօսինք մեր շրջան Արեւմուտքի ներթափանցման մասին իբրեւ ազդակ, այդ ազդակը կը նշանակէ Թուրքիոյ աւելի ներքաշում շրջանին մէջ, ինչ որ մեզի համար մերժելի է». ըսաւ Յակոբ Տէր Խաչատուրեան:

«Ատրպէյճանն ալ երկակի խաղ կը խաղայ. բնական է, որ Ռուսիան չ՛ուզեր կորսնցնել ատրպէյճանը, բայց նաեւ ակնյայտ է, որ անիկա ուղղակի կապի մէջ է Ուքրանիոյ իշխանութիւններուն հետ, եւ փոխադարձաբար Ուքրանիոյ իշխանութիւնները արցախեան պատերազմի ժամանակ զինամթերք հասցուցած են ատրպէյճան: Այս պատճառով պէտք է զգուշաւորութեամբ մօտենալ այս խնդիրին, որովհետեւ ինչ ալ ըլլայ ելքը` անպայմանօրէն պիտի ունենայ իր ազդեցութիւնը շրջանին վրայ», ըսաւ Յակոբ Տէր Խաչատուրեան:

Անդրադառնալով ներքաղաքական զարգացումներուն` ան ըսաւ, որ Հ.Յ.Դ.-ի գործունէութիւնը չի սահմանափակուիր օրէնսդրական նախաձեռնութիւններով:

«Դուք լաւ գիտէք, որ Ընդհանուր ժողովի նախօրէին 26-27 փետրուարին համահայկական ընդգրկումով ցոյցեր տեղի ունեցան սփիւռքի մէջ: Ատիկա կապուեցաւ Հայաստան-Թուրքիա յարաբերութիւններուն, Սումկայիթի ջարդին եւ արցախեան գոյամարտին հետ: Ասիկա եղաւ 12 երկիրներու մէջ: Կասկած չկայ, որ այսօր իրողութիւնները քիչ մը տարբեր են, որովհետեւ պարտուողական հոգեբանութեան մէջ ինկած է մեր ժողովուրդը արցախեան պատերազմէն ետք, եւ ասիկա է մեծագոյն հարցը, որ այս իշխանութիւնները կը բանակցին, երբ պարտուած կողմ են: Այն պարագային, որ մենք ունէինք անխոցելիութեան զգացում, երբ յաղթող կողմ էինք: Այսօր այդ հոգեբանական կամուրջը պէտք է անցնինք, որ վերականգնենք մեր անժամանցելի իրաւունքները», ըսաւ Հ.Յ.Դ. Բիւրոյի ներկայացուցիչը:

«34-րդ ժողովը կը մնայ մեր պատմութեան մէջ ո՛չ միայն իբրեւ Ընդհանուր ժողով, այլ նաեւ Արտակարգ ժողով, որովհետեւ կը գումարուէր աննախադէպ սրուած եւ լարուած իրավիճակի մը մէջ. իր խօսքին մէջ», նշեց Արմէն Ռուստամեան:

«Հայաստանին եւ հայութեան սպառնացող վտանգները այն աստիճանի ծանր են եւ ծաւալը այնքան մեծցած է, որ այստեղ իսկապէս խօսքը մեր լինելիութեան հետ կապուած հարցերու առումով մեր գործողութիւններու մասին է», ըսաւ ան:

Արմէն Ռուստամեան նշեց, որ Դաշնակցութիւնը, իր առաքելութեան համապատասխան, ըլլալով այն բաց շիշը զգացող կուսակցութիւնը, թէ ուրկէ՛ կու գան մեր հիմնական վտանգները, յստակ կ՛արձանագրէ, որ իրականութեան մէջ մենք կանգնած ենք շատ օրհասական խնդիրներու լուծման հրամայականի առջեւ:

«Մենք ունինք թէ՛ ներքին, թէ՛ արտաքին լրջագոյն վտանգներ», ըսաւ ան, եւ, բնականաբար, խնդիր ունինք թոյլ չտալու, առնուազն կասեցնելու այնպիսի զիջումները, որոնք կենսական նշանակութիւն կ՛ունենան մեր ապագային համար: «Զիջումներու «կարմիր գիծերը» չարձանագրելու պարագային մենք իսկապէս Արցախը եւ Հայաստանը կորսնցնելու վտանգին առջեւ ենք. ասիկա չափազանցութիւն չէ, ասիկա իրական վիճակի վերլուծութիւն է», ըսաւ Արմէն Ռուստամեան:

«Ակնյայտ է, որ ատրպէյճանի ցանկութիւնը Արցախն է առանց հայերու, եւ ամէն ինչ պիտի ընեն, որ արցախահայութիւնը, անելանելիութեան մէջ յայտնուելով, այդ տարածքները լքէ. լարուածութիւնը անոր դրսեւորումն է, եւ ասիկա պէտք է ահազանգ հանդիսանայ», ըսաւ Արմէն Ռուստամեան:

«Բայց ես այսօր կը լսեմ վարչապետի խօսքերը, որ խնդիրին կ՛անդրադառնայ հպանցիկ, կ՛ըսէ` չեմ ուզեր գնահատական տալ: Այսինքն, ինչո՞ւ պիտի չգնահատուի, ինչո՞ւ ահազանգ պիտի չհնչեցուի, ինչո՞ւ պիտի չըսուի, որ անոր դէմ դնելու համար ամէն ինչի պատրաստ են: Այսինքն, այս կրաւորական պահուածքը, յանուն խաղաղութեան ամէն ինչ զիջելու պատրաստակամութիւնը պիտի հասցնէ անոր, որ մենք ըլլալ-չըլլալու խնդիրի առջեւ պիտի յայտնուինք», ըսաւ Արմէն Ռուստամեան:

Անոր համար ակնյայտ է, որ թուրք-ատրպէյճանական դաշինքը կը փորձէ ամէն ինչ ընել, որ ռուս-ուքրայինական պատերազմի արդիւնքներէն ստանայ առաւելագոյնը:

Արմէն Ռուստամեան նշեց, որ այսօր հիմնական ուժը, որ այստեղ կ՛ապահովէ խաղաղութիւն` ռուսական խաղաղապահ ուժերն են:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles