ՄԱՄԵՏԻԱՐՈՎԻ ԴԻՒԱՆԱԳԻՏԱԿԱՆ ԲԱՌԱԽԱՂԸ

0 0
Read Time:2 Minute, 20 Second

Ա.Ա.
Ատրպէյճանի արտաքին գործոց նախարար էլմար Մամետիարով առաջին անգամը չէ, որ կը փորձէ դիւանագիտական հնարքները ի գործ դնել՝ հայկական կողմը ներկայացնելու համար իբրեւ Լեռնային Ղարաբաղի տագնապին դիւանագիտական խաղաղ լուծման ճիգերը արգելակող մը։
Հերթական բեմադրութիւնը կատարուեցաւ Պաքուի մէջ երեք օր առաջ՝ Ատրպէյճանի մէջ հաւատարմագրուած դեսպաններուն դիմաց։ Առաջին ակնարկով՝ Էլմար Մամետիարովի յայտարարութիւնը կը թուի բաւական անմեղ եւ դրական բովանդակութիւն ունեցող հրապարակում մը։ Սակայն շուտով յստակ կը դառնայ, թէ հարցը կը վերաբերի դիւանագիտական բառախաղով կատարուած յայտարարութեան մը, որուն մասին բարեբախտաբար Հայաստանի արտաքին գործոց նախարարութիւնը շատ արագ հակադարձեց եւ ներկայացուց խնդրին ամբողջ էութիւնը։
Մամետիարով Պաքուի մէջ կայացած օտար դեսպաններու տարեկան հաւաքին ընթացքին ներկայացուց Ատրպէյճանի արտաքին քաղաքականութեան ուղղութիւնները, խօսեցաւ իրագործումներու մասին եւ բնականաբար բաւական ծանրացաւ Լեռնային Ղարաբաղի տագնապին վրայ։ Ատրպէյճանի դիւանագիտութեան պետին համաձայն,Դեկտեմբեր 5-ին Միլանոյի մէջ կայացած հանդիպման ընթացքին Ատրպէյճանի եւ Հայաստանի արտաքին գործոց նախարարները յաջողած են փոխադարձ ըմբռնում մը գոյացնել։ Բան մը, որ երկար տարիներ կարելի չէր ըլլար։
Բնականաբար սրահին մէջ հաւաքուած դեսպանները անմիջապէս պիտի հասկնային, որ հարցը կը վերաբերի Լեռնային Ղարաբաղի տագնապին լուծման ճիգերու, որովհետեւ հրատապ խնդիրը այս տագնապն էր, եւ երբ Ատրպէյճան դիւանագիտութեան պետը՝ առանց մանրամասնութիւններ փոխանցելու, կը խօսէր Հայաստանի արտաքին գործոց նախարարին հետ գոյացած փոխադարձ ըմբռնման մը մասին, ուրեմն դրական էր զարգացումը։
Հայաստանի դիւանագիտութեան պետին՝ Զոհրապ Մնացականեանի հետ փոխադարձ ըմբռնման մասին կատարուած այս յայտարարութենէն քսանըչորս ժամ ետք՝ արտաքին գործոց նախարարութեան բանբեր Աննա Նաղդալեան հրապարակեց յայտարարութիւն մը, որուն մէջ յստակացուց, որ փոխադարձ ըմբռնումը կը վերաբերէր երկու կէտերու։ Նախ՝ համաձայնութիւն մը գոյացած էր, որ Մնացականեան եւ Մամետիարով ապագային ալ նման հանդիպումներ պիտի ունենան՝ ԵԱՀԿ Մինսքի խումբին համանախագահներուն ներկայութեամբ։ Երկրորդ՝ կարելի եղած էր Միլանոյի հանդիպման մասին յայտարարութեան շուրջ ամբողջական համախոհութիւն գոյացնել։ Բան մը, որ իսկապէս երկար տարիներէ ի վեր կարելի չէր եղած։ Նախապէս կատարուած բոլոր տեսակցութիւններուն մասին յայտարարութիւնները, թէկուզ գլխաւորաբար նոյն բովանդակութեամբ, սակայն եղած էին անջատ։
Այսքան։
Փոխադարձ ըմբռնում եզրը՝ Մամետիարովի կողմէ գործածուած էր, որպէսզի օտար դեսպանները մղէ մտածելու, թէ ահա թերեւս քայլ մը առաջ առնուած է։
Ատրպէյճանական դիւանագիտութեան երեւութապէս անմեղ այս բառախաղային ներկայացումը Հայկական դիւանագիտութեան կողմէ ընկալուեցաւ իբրեւ փոխադարձ ըմբռնման խորքը քաղաքական շահարկման իւրայատուկ ճիգ մը, որուն շուրջ տրուած լուսաբանութիւնը բաւարար էր հասկնալու Մամետիարովի ճիգը, թէ տեսէք Ատրպէյճան կը խօսի փոխադարձ ըմբռնումի մասին, որ տարիներէ ի վեր կարելի չէր եղած։ Ուրեմն մենք (ատրպէյճանցիները) խաղաղութեան կողմնակից ենք եւ ապագայի ժխտական զարգացումներու պատասխանատուութիւնը ամբողջովին կ՛իյնայ հայկական կողմին ուսերուն։
Այս տրամաբանութեան մէջ բացակայ չէ զինուորական ընտրանքը։ Մանաւանդ եթէ նկատի ունենանք Ատրպէյճանի նախագահ Իլհամ Ալիեւի օրեր առաջ կատարած յայտարարութիւնը, թէ Ատրպէյճան բաւականաչափ զէնք ունի՝ հակառակորդին որեւէ թիրախը քանդելու համար, բայց՝ պիտի շարունակէ զինարշաւը եւ յաւելեալ ու նոր տեսակի զէնք ձեռք պիտի ձգէ։
Հետեւաբար ինչ որ յայտարարեց էլմար Մամետիարով պարզապէս փոխադարձ ըմբռնում մըն է՝ յառաջիկային հանդիպումները շարունակելու համար։ Ոչ աւելի, ոչ պակաս։ Բայց Մամետիարով այս ըմբռնումը կը դնէր կարեւոր իրագործման մը ծիրին մէջ, պարզ այն պատճառով, որ Ատրպէյճան իբրեւ թէ խաղաղարար ճիգերուն դիմաց՝ հայկական կողմին չկամութիւնը բացայայտէր։
Մամետիարովի թաքթիքը զուտ դիւանագիտական բովանդակութիւն ունի։ Նաեւ՝ զինուորական ընտրանքի դիմելու հեռանկարային մօտեցում մը։

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles