Հ.Օ.Մ.-Ի Ա.Մ.Ն. ԱՐԵՒԵԼԵԱՆ ՇՐՋԱՆԻ 96-ՐԴ ՊԱՏԳԱՄԱՒՈՐԱԿԱՆ ԺՈՂՈՎ

0 0
Read Time:5 Minute, 25 Second

1

ՓԱՐՔ ՐԻՃ (Նիւ Ճըրզի) – Հ.Օ.Մ.-ի Նիւ Ճըրզիի Ակնունի, Պըրկըն, Շաքէ եւ Սպիտակ մասնաճիւղերը միասնաբար հիւրընկալեցին Հ.Օ.Մ.-ի Ա.Մ.Ն.-ի Արեւելեան Շրջանի 96-րդ Պատգամաւորական Ժողովը, որ տեղի ունեցաւ Յուլիս 15, 2016-ին, Նիւ Ճըրզիի Փարք Րիճ Մարիոթ Պանդոկէն ներս։ Ժողովին մասնակցեցան 19 մասնաճիւղերէ 38 պատգամաւորներ, ինչպէս նաեւ ներկայ էր Շրջանային Վարչութեան կազմը։
Ժողովին հիւրաբար ներկայ էին Հ.Օ.Մ.-ի Կեդրոնական Վարչութեան Ատենապետ Գարոլին Շմաւոնեան, Հ.Օ.Մ.-ի Կեդրոնական Վարչութեան ներկայացուցիչ Սիլվա Գույումճեան, Գանատայի Շրջանային Վարչութեան Ատենապետ Արմինէ Կարապետեան եւ Հ.Յ.Դ.-ի ներկայացուցիչ Խաժակ Մկրտիչեան։ Հիւրերու շարքին էին նաեւ Վալենթին Պէրպէրեան (Մայր մասնաճիւղ, Նիւ Եորք), Ճեմա Վարդանեան (էրեբունի մասնաճիւղ, Նիւ Եորք) եւ Անի Փանոսեան Մուրատեան։ Նիւ Երոքի եւ Նիւ Ճըրզիի տեղական մասնաճիւղերէն շատ մը ընկերուհիներ մասնակցեցան ժողովին որպէս հանդիսատես։
Ժողովին բացումը կատարեց Արեւելեան Շրջանային Վարչութեան Ատենապետ Թալին Տաղլեանը։ Ան իր բացման խօսքով բարի գալուստ մաղթեց պատգամաւորներուն եւ բոլոր ներկաներուն։ Ան բոլորին հրաւիրեց յոտնկայս յարգանքի տուրք մատուցելու ի յիշատակ Հ.Օ.Մ.-ի հանգուցեալ անդամներուն, Արցախի մէջ նահատակուած հերոսներուն եւ Սուրիոյ զոհերուն։ Տաղլեան նաեւ շնորհակալութիւն յայտնեց ժողովը կազմակերպող յանձնախումբին եւ Նիւ Ճըրզիի հիւրընկալ մասնաճիւղերուն։2
Տաղլեան պատգամաւորներուն յիշեցուց թէ Վարչութեան տարեկան տեղեկագիրը մեծ խնամքով պատրաստուած է եւ հրաւիրեց զանոնք որ ուշադրութեամբ ուսումնասիրեն ու արժեւորեն զայն, նկատի առած որ ան հիմք պիտի ծառայէ յառաջիկայ Վարչութեան գործունէութեան։ Ան շեշտեց, թէ Պատգամաւորներուն պատասխանատուութիւնն է մտածուած առաջարկներ եւ բանաձեւեր ներկայացնել յաջորդ տարեշրջանին համար։
Ապա երգուեցաւ Հ.Օ.Մ.-ի քայլերգը Կեդրոնական Վարչութեան ներկայացուցիչ Սիլվա Գույումճեանի գլխաւորութեամբ։ Ժողովը շարունակուեցաւ դիւանի ընտրութեամբ։ Ժամանակաւոր ժողովավար ընտրուեցան Շաքէ Պասմաճեան եւ Սիրան Չոլաքեան, երկուքն ալ Միշիկընէն, որոնք ապա ընտրուեցան մշտական ժողովավար։ Քարտուղարներ ընտրուեցան, անգլերէնով՝ Մանուկ Գաբրիէլեան եւ Տալիտա Շատոյեան Կուսուպ, իսկ հայերէնով՝ էլիզապէթ Տրամկոչեան եւ Վարդուհի Քումրիկեան։ Բանաձեւի յանձնախումբի մաս կազմելու ընտրուեցան Ընկերուհիներ Անի Կիւլպէնք, Լինտա Քէչէճեան եւ Սվեթլանա Պապաճանեան։ Ապա ընտրուեցան ժողովին կանոնագրութեան պարտադրած այլ յանձնախումբերը։
Կեդրոնական Վարչութեան տեղեկագիրը ներկայացուց կազմին Գանձապահ եւ Արեւելեան Շրջանի ներկայացուցիչ Սիլվա Գույումճեան։ Ընկհ. Թալին Տաղլեան, որ Արեւելեան Շրջանի ներկայացուցիչն էր Հ.Օ.Մ.-ի Միջազգային 71-րդ Պատգամաւորական Ժողովին, որ տեղի ունեցաւ անցեալ Հոկտեմբերին Հայաստանի մէջ, իր տեղեկագիրը ներկայացուց։
Կէսօրէ ետք Ընկհ. Սեւան Գօլէճեան Շրջանային Վարչութեան տեղեկագիրը ներկայացուց ժողովին եւ ներկաներուն առիթ տրուեցաւ հարցում-պատասխանի միջոցաւ լուսաբանուիլ։ Նիւթական տեղեկագիրը ներկայացուց Մարկի Պապիկեան-Մետինա։ Վարչութեան ծրագիրներն ու գործունէութիւնը քննարկուեցան ժողովին կողմէ։4
Օրուան վերջաւորութեան քննարկուեցան դրամահաւաքի ձեռնարկները, յատկապէս Առցանց Աճուրդը, Արուեստի Ցուցահանդէսը, Հայաստան Քայլարշաւը, Տարեկան Վիճակահանութիւնը (որ պիտի շարունակուի 2016-2017-ին) եւ յառաջիկայ Հոկտեմբերին կայանալիք Շատոյեան Նորաձեւութեան Տան Ցուցահանդէսը։ Հիանալի առատաձեռնութեամբ մը կարգ մը մասնաճիւղեր ինքնաբուխ նուիրատուութիւններ կատարեցին այս ծրագիրին համար։
Ժողովին պաշտօնական բացումը եւ հիւրասիրութիւնը տեղի ունեցաւ Ուրբաթ գիշեր, Հ.Օ.Մ.-ի Նիւ Ճըրզիի մասնաճիւղերուն հիւրընկալութեամբ։ Տ. Յովնան Քհն. Պոզոյեան օրհնեց սեղանը եւ յաջողութիւն մաղթեց ժողովին ու ներկաներուն։
Հ.Յ.Դ. Կեդրոնական Վարչութեան անդամ եւ Հ.Օ.Մ.-ի Արեւելեան Շրջանի ներկայացուցիչ Խաժակ Մկրտիչեան խօսք առաւ եւ գնահատեց Հ.Օ.Մ.-ի Արեւելեան Շրջանի ցուցաբերած յարատեւ աջակցութիւնը Արցախի եւ Սուրիահայութեան։ Ան յաջողութիւն մաղթեց բոլոր պատգամաւորներուն եւ ժողովականներուն։ Յովսէփ Մինասեան եւ Թալին Պարսեմեան ՀՄԸՄ-ի եւ Համազգայինի պատգամները եւ բարեմաղթութիւնները փոխանցեցին եւ համագործակցութեան կոչ ուղեցին։ 5
Հ.Ե.Մ.-ի Նիւ Ճըրզիի Արսէն մասնաճիւղի ատենապետ Վարդենի Քէշիշեան իր խօսքին մէջ ընդգծեց Հ.Օ.Մ.-ի եւ Հ.Ե.Մ.-ի սերտ յարաբերութիւնները եւ շնորհակալութիւն յայտնեց Արեւելեան Շրջանին ցուցաբերած աջակցութեան համար, ըսելով՝ «Հ.Օ.Մ.-ի Արեւելեան Շրջանը առիթներ կ՚ընծայէ ՀԵՄ-ի անդամներուն, անոնց նիւթական աջակցութիւն ապահովելով մասնակցելու Հայաստան Ճամբարին, ինչպէս նաեւ ուսումնական թոշակ տրամադրելով ուսանողներուն եւ ապահովելով մեր անդամներուն կարգ մը նիւթական կարիքները»։
Ապա ներկաները եւ պատգամաւորները առիթ ունեցան հաճելի ու ընկերային մթնոլորտ մը վայելելու եւ համադամ ուտեստները ըմբոշխնելու։
Շաբաթ օրուան ժողովը ընթացաւ կազմակերպչական հարցերը քննարկելով, ինչպէս՝ հասարակական կապեր, անդամահաւաք, նիւթական աղբիւրներու ստեղծում։ Պատգամաւորները առիթը ունեցան մանրամասն արժեւորելու Արեւելեան Շրջանի ծրագիրները, ինչպէս Երիտասարդական Հաւաք, Ուսումնական Խորհուրդ, Հայաստան Ճամբար։ Ապա ներկայացուեցաւ Վարչութեան տեղեկագիրը Հայաստանի, Արցախի եւ Ջաւախքի մէջ կատարած գործունէութեան մասին։ Բոլոր յանձնախումբերը իրենց տեղեկագիրները ներկայացուցին եւ ըստ այնմ Բանաձեւի Յանձնախումբը ներկայացուց իր առաջարկները։ 2016-2017 տարեշրջանի պիւտճէն ներկայացուեցաւ ու վաւերացուեցաւ ժողովին կողմէ։ 3
Ժողովին ներկայացաւ Անահիտ Մեսրոպեան, որ Կեդրոնական Վարչութեան պաշտօնեայ «Որբ Մը Հովանաւորէ» ծրագրին։ Ընկհ. Անահիտ իր տեղեկագիրը ներկայացուց որբերուն առընչութեամբ։ Ընկհ. Անահիտ իր խորին շնորհակալութիւնը յայտնեց Արեւելեան Շրջանին, որ ծրագիրին հիմնադրութենէն ի վեր հազարէ աւելի որբեր հովանաւորած է եւ քաջալերեց բոլոր ներկաները, որ շարունակեն իրենց աջակցութիւնը մատուցել կարիքաւոր որբերու։
Օրուան վերջին օրակարգն էր նոր վարչութեան ընտրութիւնը։ Քուէախոյզ յանձնախումբը ներկայացուց 2016-2017 տարեշրջանի վարչութեան համար առաջարկուած անունները։ Ապա տեղի ունեցաւ քուէարկումը։ Նորընտիր Վարչութիւնը կը ներկայացնէ հետեւեալ կազմը։ Վերընտրեալ անդամներ՝ Ընկերուհիներ՝ Թալին Տաղլեան (Նիւ Ճըրզի, Ակնունի), Սոնիա Պզտիկեան (Նիւ Եորք, Մայր), նոր անդամներ՝ Սանտրա Վարդանեան (Նիւ Երոք, Էրեբունի), Ճոէնա Չիլինկիրեան (Քէմպրիճ, Շուշի), ՄէրիԷն Պոնճուքեան (Նիւ Ճըրզի, Պըրկըն), Պարկի Պապիկեան Մետինա (Նիւ Ճըրզի, Պըրկըն), Սիլվա Սաղըրեան (Միշիկըն, Ցոլիկ)։ Երկու փոխարինողներ եւս ընտրուեցան, որոնք են՝ Նարդուհի Ապրիմեան (առաջին պատգամաւոր) եւ Անի Կիւլպէնք (երկրորդ պատգամաւոր)։

Ապա տեղի ունեցաւ ճաշկերոյթ Փարք Րիճ Մարյոթի մէջ։ Թալին Տաղլեան բարի գալուստ մաղթեց ներկաներուն։ Կեդրոնական Վարչութենէն Սիլվա Գույումճեան, իսկ Գանատայի Շրջանային Վարչութենէն Արմինէ Կարապետեան իրենց պատգամները փոխանցեցին ներկաներուն։
Նկատի առած, որ այս տարին Վեհափառ Արամ Ա. Կաթողիկոսը յայտարարած է Ծառայութեան Տարի, մասնաճիւղեր իրենց անդամները առաջադրեցին Ծառայութեան Մրցանակին։ Մրցանակները բաշխուեցան Հ.Օ.Մ.-ի Արեւելեան Շրջանային Վարչութեան կողմէ այն անդամներուն, որոնք իրենց ծառայութիւնը եւ նուիրումը մատուցած են Հ.Օ.Մ.-ին։ Հետեւեալ ընկերուհիները ստացան սոյն մրցանակները։ Ճեմա Վարդանեան (՜Էրեբունի, Նիւ Եորք), Թալին Տաղլեան (Ակնունի, Նիւ Ճըրզի), Մարկի Պապիկեան Մետինա (Պըրկըն, Նիւ Ճըրզի), Անայիս Չոլաքեան (Մայր,Նիւ Եորք), Շնորհիկ Քարաքելեան եւ Տորի Քէշքէկեան (Անի, Փենսիլվենիա), Սթելա Պանտազեան (Յոյս, Վըրճինիա), Գայանէ Շիրոզեան Պարզակեան (Արտեմիս,Փենսիլվենիա), Սու Նաւարեան եւ Ալիս Պաճաքսոզեան (Արցախ, Օհայօ), Վարսենիկ Տոսթուրեան Գաթըր (Քնար, Մասաչուսէց), Մէրի Պազարեան (Լոլա Սասունի, Մասաչուսէց), Վարսէն Պետրոսեան (Սաթենիկ, Ուաշինթըն), Սիրվարդ Թելպելեան (Շաքէ, Տիթրոյթ), Օսաննա Քալվոլճեան (Սոսէ, Ուիսքանսըն), Շողիկ Մանուկեան (Սպիտակ, Նիւ Ճըրզի), Ազատուհի Վարդանեան (Սիպիլ, Տիթրոյթ), Շուշան Վերմանեան (Ցոլիկ, Միշիկըն), Թագուհի Արթինեան (Զապէլ, Իլինոյ)։
Շրջանային Վարչութեան Ատենապետ Թալին Տաղլեան յատուկ արարողութեամբ մը ներկայացուց Ակնունի Մրցանակը։ Այս տարուան Ակնունի Մրցանակը ստացաւ Վալենթին Պէրպէրեան, առ ի գնահատանք իր ծառայութեան որպէս Հ.Օ.Մ.-ի պատգամաւոր Մ.Ա.Կ.-ի մէջ։ Վալենթին խոնարհաբար ընդունեց մրցանակը եւ շնորհակալութիւն յայտնեց Հ.Օ.Մ.-ին՝ իրեն ծառայութեան առիթ ընծայելուն համար։
Շրջանաւարտ Վարչութեան անդամներէն՝ Սեւան Քոլէճեան (Փոխ Ատենապետ) եւ Թալին Մկրտչեան (ի բացակայութեան) յատուկ նուէրով մը պարգեւատրուեցան, առ ի գնահատանք անցնող չորս տարիներուն Հ.Օ.Մ.-ին կատարած իրենց ծառայութեան։
Երեկոն շարունակուեցաւ գեղարուեստական յայտագիրով մը, որուն ընթացքին Մարալ եւ Մեղրի Թիւթիւնճեան ներկայացուցին հայկական երգեր ֆլիւթի ընկերակցութեամբ, ինչպէս նաեւ ելոյթ ունեցաւ «Յոյսեր» համոյթը, ներկայացնելով հայրենասիրական երգեր։
Հ.Օ.Մ.-ի Ա.Մ.Ն.-ի Արեւելեան Շրջանի 96-րդ Պատգամաւորական Ժողովը իր աւարտին հասաւ Կիրակի օրուան օրակարգի ամբողջացումով։ Բոլոր ժողովականները, հիւրերը եւ պատգամաւորները իրենց խորին գոհունակութիւնը եւ շնորհակալութիւնը փոխանցեցին Նիւ Ճըրզիի հիւրընկալ մասնաճիւղերուն։ Պատգամաւորները բաժնուեցան իրենց մտքին մէջ յստակ պատկերացում ունենալով, թէ ինչպիսի աշխատանք կը սպասէ Հ.Օ.Մ.-ին յառաջիկայ տարին։

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles