Հոլանտայի Հայ Դատի Յանձնախումբի Ատենապետին Եւ Անոր Դստեր Հայաստան Մուտքը Արգիլուեցաւ

0 0
Read Time:2 Minute, 54 Second

ԵՐԵՒԱՆ.- Հ.Յ.Դ. Բիւրոյի անդամ Մուրատ Փափազեանէն ետք, Ազգային Անվտանգութեան Ծառայութիւնը արգիլեց Հոլանտայի Հայ Դատի  յանձնախումբի ատենապետ Մասիս Աբրահամեանի եւ անոր դստեր՝ Սիւնէ Աբրահամեանի, մուտքը Հայաստան: Սահմանապահները երկուքին պարագային ալ պատճառներ չտուին:

Հայ Դատի Եւրոպայի գրասենեակը հաղորդագրութեամբ մը խստօրէն դատապարտեց Հայաստանի իշխանութիւններուն՝ Հոլանտայի քաղաքացիներ, Հայ Դատի յանձնախումբի ատենապետ Մասիս Աբրահամեանի եւ յանձնախումբի անդամ Սիւնէ Աբրահամեանի Հայաստան մուտքը արգիլելը, նշելով, թէ,- «Հայ Դատի յանձնախումբերը միջազգային բոլոր հարթակներուն վրայ միշտ զօրավիգ կանգնած են մեր պետութեան, իսկ յանձնախումբերու անդամները զոհած են իրենց անձնական կեանքը եւ ժամանակը՝ ամբողջովին կամաւոր եւ անշահախնդիր կերպով: Հայաստանի իշխանութիւնները կը յորդորենք հեռու մնալ նման քայլերէ, քանի դեռ լուրջ վնաս չէ հասած Հայաստանի միջազգային ընկալման: Հայ Դատի Եւրոպայի գրասենեակը կը գտնէ, որ նման դէպքերու կրկնութիւնը եւ քինախնդրական վերաբերմունքը մեզ պիտի առաջնորդէ դէպի Հայաստանի եւ Սփիւռքի միջեւ խրամատի ստեղծման, ինչ որ վնասակար հետեւանքներ պիտի ունենայ մեր ժողովուրդին համար»:

Դատապարտող յայտարարութեամբ հանդէս եկաւ նաեւ Հ․Յ․Դ․ Արեւմտեան Եւրոպայի Կեդրոնական կոմիտէն։ Ստորեւ՝ այդ յայտառառութիւնը.

Ապազգային քլանին հալածանքը կը շարունակուի դաշնակցական գործիչներու դէմ:

Հոլանտայի երիտասարդականի անդամ Սիւնէ Աբրահամեանի մուտքի արգելքէն ժամեր ետք, դարձեալ Երեւանի օդակայանէն հայրենիք մուտքը արգիլուեցաւ այս անգամ Հոլանտայի Հայ Դատի ատենապետ, կուսակցական աշխուժ գործիչ Մասիս Աբրահամեանի:

Յստակ է արդէն, որ պատրաստուած է այսպէս կոչուած անբաղձալի տարրերու ցանկ մը: Եւ ինչպէս մեր նախորդ յայտարարութիւններով ընդգծած էինք, երկիրը դէպի անդունդ տանող փաշինեանական դաւադիր վարչախումբի գործիքին վերածուած ԱԱԾն տէրը չէ իր կոչումին եւ հաւասարապէս պատասխանատու է ազգադաւ այս որոշումներուն, զորս կը մերժենք ըստ ամենայնի: Իրաւական եւ կարելի բոլոր միջոցներով պիտի պայքարինք վերականգնելու հայրենազրկութեան այս քստմնելի արշաւին դէմ: Ողորմելի են նման փոքրոգի որոշումի տէրերը, մանաւանդ երբ կը խորհին այս միջոցով ճնշել ու լռեցնել ի խնդիր համազգային մեր Դատին, ի խնդիր Հայաստանի եւ Արցախի ամբողջականութեան ու բարօրութեան համար պայքարող նուիրեալ գործիչները: Մեր պայքարը առաւել պիտի սաստկանայ, մինչեւ ազգային ու իրաւական պետութեան վերականգնումը, որուն նախապայմանն է երկրին իշխանութեան յայտնուած ապազգային ու հայրենադաւ բռնատիրական քլանի հեռացումը:

Նշենք, որ Հ․Յ․Դ․ Բիւրոյի անդամ եւ Ֆրանսայի հայկական կազմակերպութիւնները համակարգող խորհուրդի համանախագահ Մուրատ Փափազեանի Հայաստան մուտքը արգիլելը դատապարտեցին ՀՅԴ Բիւրոն, Ֆրանսայի հայկական կազմակերպութիւնները համակարգող խորհուրդը եւ Հ․Յ․Դ․ Արեւմտեան Ամերիկայի Կեդրոնական կոմիտէն, որ իր կարգին դատապարտեց ոեւէ հայու Հայաստան մուտքը արգիլելու արարքը։

 

Հ.Յ.Դ. երիտասարդական գրասենեակն ալ յայտարարութիւն մը հրապարակեց.-

Հայաստանի ապազգային իշխանութիւնները դարձեալ դրսեւորեցին իրենց հակահայ, ազգը պառակտող վարքագիծը։

Յուլիս 31-ին Հայաստան ժամանած Հ.Յ.Դ. Հոլանտայի երիտասարդական միութեան անդամ ընկերուհի Սիւնէ Աբրահամեանի մուտքը հայրենիք արգելափակուեցաւ։

Վերջինիս ետ ուղարկելու որոշում կայացուած է առանց որեւէ հիմնաւոր բացատրութիւն կամ պատճառաբանութիւն ներկայացնելու։

Ան Հայաստան ժամանած էր մասնակցելու Հ.Յ.Դ. երիտասարդական միութիւններու կողմէ Սիւնիքի մէջ կազմակերպուած ամառնային ճամբարներուն, որոնք երկշաբաթեայ դաստիարակչական օջախներ կը հանդիսանան նոր սերունդին փոխանցելու այլազան գիտելիքներ և յատկապէս ազգային գաղափարախոսութեան հիմնական սերմերը։

Ցաւալիօրէն պէտք է արձանագրենք, որ Հ.Յ.Դ. Բիրոյի անդամ Մուրատ Փափազեանի Հայաստան մուտք գործելու արգելքէն և Հ.Յ.Դ. Երիտասարդականի անդամներու դէմ հալածանքներէ ետք, այս ապազգային իշխանութիւնը կը թիրախաւորէ նուիրեալ եւ ազգասէր սփիւռքահայ դաշնակցական երիտասարդութիւնը։

Անոնց մուտքը Հայրենիք կ՚արգիլուի եւ զուգահեռ այս իրողութեան՝ կ՚արտօնուի թուրք ազգայնականներու մուտքը Հայաստանի Հանրապետութիւն, ինչին ականատես եղանք վերջին շաբաթներու ընթացքին։

Հաշուի առնելով, որ սահմանապահ ստորաբաժանումները կը գործեն հիմնականօրէն Հ.Հ. Ա.Ա.Ծ.-ի ենթակայութեան տակ, կոչ կ՚ուղղենք Հ.Հ. Ա.Ա.Ծ.-ին պատշաճօրէն իրականացնել իրենց սահմանուած գործառոյթները, չտրուիլ ապօրինի քաղաքական հրահանգներու, եւ գործել իրենց կանոնակարգի, առաքելութեան եւ կոչումին համաձայն՝ պաշտպանելու եւ ամրապնդելու Հ.Հ. եւ Արցախի ազգային անվտանգութիւնը։

Հ.Յ.Դ. Երիտասարդականը, հակառակ Նիկոլ Փաշինեանի կողմէ կազմակերպուած բոլոր բռնաճնշումներուն եւ հալածանքներուն, կը շարունակէ մնալ իր յանձնառութեան հաւատարիմ։ Ամէն գնով հեռացնել այս յանցաւոր վարչախումբը, վերականգնելու մեր խոցուած արժամանապատուութիւնը և վերջապէս լծուիլ Հայաստանի և Արցախի հանրապետութիւններու խարխլուած հիմնասիւներու վերակառուցման աշխատանքին։

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles