Հ.Յ.Դ. Գերագոյն Մարմնի Յայտարարութիւնը.- Հ.Յ.Դ. Դադրեցուցած է Հանրապետական Կուսակցութեան Հետ Կնքած Համաձայնագիրը

Read Time:46 Second

Ժողովրդային շարժման արդիւնքում Հայաստանում ստեղծուել է մի իրավիճակ, որն արդէն օրեր շարունակ լարուածութեան մէջ է պահում ողջ հասարակութեանը:

Բարեբախտաբար, մինչ այս պահը հնարաւոր է եղել խուսափել իրավիճակի հանգուցալուծման վատթարագոյն տարբերակներից: Անցնող օրերի ընթացքում Հ.Յ. Դաշնակցութիւնը հետեւողական ջանքեր է գործադրել համախոհութեան ձեւաւորման, երկխօսութեան միջոցով երկրի ու ժողովրդի շահերից բխող ընդունելի եւ ողջամիտ լուծում գտնելու ուղղութեամբ:

Այսպէս սակայն երկար չի կարող շարունակուել: Կարող են առաջանալ լուրջ մարտահրաւէրներ: Համոզուած ենք, որ ստեղծուած իրավիճակը պէտք է հանգուցալուծուի բացառապէս սահմանադրականութեան եւ օրէնքների շրջանակներում:

Հաշուի առնելով առկայ իրավիճակը՝ յայտարարում ենք քաղաքական կոալիցիա-ին մեր մասնակցութեան դադարեցման մասին:

Առ այդ, Ազգային ժողովը պէտք է ընտրի ժողովրդի վստահութիւնը վայելող վարչապետ, որի ձեւաւորած կառավարութեան մշակած՝ պետութեան ներքին եւ արտաքին քաղաքականութիւնը ներառող ծրագիրը պէտք է նպատակ հետապնդի՝

ա) Լիցքաթափել ներքաղաքական լարուածութիւնը,

բ) Յաղթահարել քաղաքական ճգնաժամը,

գ) Յստակ առաջնահերթութիւններ նախանշելով երաշխաւորել կուտակուած խնդիրների լուծումը,

դ) Լիարժէք ժողովրդավարական պայմանների ապահովմամբ նախապատրաստել եւ անցկացնել արտահերթ խորհրդարանական ընտրութիւններ:

Հ.Յ.Դ. Գերագոյն մարմին

Երեւան

25 Ապրիլ 2018