Հ.Յ.Դ. Բիւրo – Յայտարարութիւն
Արցախեան վերջին պատերազմից յետոյ Ատրպէյճանը ոչ միայն շարունակում է սպառնալիքներ հնչեցնել եւ պահանջներ ներկայացնել, այլեւ բացայայտ քայլեր է ձեռնարկում Հայաստանի Հանրապետութեան ինքնիշխանութեան եւ տարածքային ամբողջականութեան դէմ:
Կոպտօրէն ոտնահարելով Նոյեմբերի 9-ի զինադադարի եռակողմ յայտարարութեան դրոյթները, Ադրբեջանը ոչ միայն հրաժարւում է վերադարձնել գերիներին եւ այլ պահուող անձնանց, այլեւ Արցախի Հանրապետութեան Խծաբերդի, Հին Թաղերի ռազմակալումից, ապա նաեւ կասկածելի հիմքերով իրականացուած սահմանազատումներից յետոյ, չհանդիպելով որեւէ դիմադրութեան, անցել է բացայայտ զաւթողական քաղաքականութեան:
2021 թուականի Մայիսի 12-ին Սիւնիքի եւ Գեղարքունիքի մարզերի որոշ ռազմավարական ուղղութիւններով ատրպէյճանական զինուժը հատել է Հայաստանի Հանրապետութեան պետական սահմանը եւ խորացել մի քանի կիլոմետր: Ատրպէյճանական զինուորականների ներխուժման արդիւնքում առաջացել են անվտանգային լրջագոյն սպառնալիքներ: Հեռահար նպատակադրումներով կատարուած ատրպէյճանական բացայայտ ագրեսիան ստեղծել է ռազմական բախման եւ պատերազմի իրական վտանգ:
Օգտուելով Հայաստանի Հանրապետութեան իշխանութիւնների յանցաւոր անգործութիւնից, Ատրպէյճանը փորձում է թելադրել իր կամքը՝ ոտնահարելով միջազգային իրաւունքի հանրաճանաչ նորմերը: Այսօր արդէն վտանգուած է Հայաստանի տարածքային ամբողջականութիւնը: Ատրպէյճանի ագրեսիան կանխելու, հակազդելու փոխարէն Նիկոլ Փաշինեանի գլխաւորած վարչախումբը շարունակում է իր ապաշնորհ կառավարմամբ կործանման տանել երկիրը:
Այս ընթացքը պարտաւոր ենք կասեցնել: Հ.Յ. Դաշնակցութեան Բիւրօն աշխարհի տարբեր երկրներում զօրաշարժի է ենթարկել Դաշնակցութեան բոլոր կարելիութիւնները՝ Ատրպէյճանի վրայ ճնշում բանեցնելու ուղղութեամբ, միաժամանակ պատրաստ լինելով ինքնակազմակերպուելով պաշտպանել մեր պետութիւնն ու քաղաքացների անվտանգութիւնը:
Հ.Յ.Դ. ԲԻՒՐՕ
16 Մայիս 2021
