0
0
ԴԱՄԱՍԿՈՍ.- Հինգշաբթի Ապրիլ 13-ին, Հ.Յ.Դ. Բիւրոյի ներկայացուցիչ Յակոբ Տէր Խաչատուրեանն ու իրեն ընկերակցող պատուիրակութիւնը ժամանեցին Սուրիոյ մայրաքաղաք եւ հանդիպում ունեցան Սուրիոյ «Պաաս» կուսակցութեան Կեդրոնական Վարչութեան ներկայացուցիչ երկրաչափ Հիլալ Հիլալին հետ, որ կուսակցութեան գլխաւոր քարտուղար Պաշշար Ալ Ասատի ողջոյնները փոխանցեց պատուիրակութեան եւ անոր ճամբով հայութեան, դիտել տալով, որ սուրիահայութիւնը սուրիական ընկերութեան էական բաղադրիչներէն մէկն է։ Հիլալ բարձր գնահատեց սուրիահայութեան ազգային, պատուաբեր դիրքորոշումները Սուրիոյ դէմ մղուած պատերազմի տարիներուն, ինչպէս նաեւ սուրիական խիզախ բանակին կողքին կանգնիլը։
Ապա իր երախտագիտութիւնը յայտնեց հայութեան՝ երկրաշարժի աղէտին արաբ իր եղբայրներուն օգնութեան ձեռք երկարելու եւ անոնց վիշտը ամոքելու համար։ Ան շեշտեց, որ երկու ժողովուրդները, կրած ըլլալով նոյն թշնամիին ոտնձգութիւններուն հետեւանքները, բարեկամական եւ փոխադարձ յարգանքի ամուր եւ պատմական կապեր ունին։
Իր խօսքի աւարտին Հիլալ ներկաներուն հետ զրուցեց տարածաշրջանային իրավիճակին եւ համաշխարհային տնտեսական տագնապին շուրջ, դիտել տալով որ Սուրիան երկար տարիներ դիմադրեց պատերազմին ու ահաբեկչութեան, մնաց հաւատարիմ իր սկզբունքներուն, իսկ ներկայիս կը գտնուի տարածաշրջանային իր ձեռքբերումները, յանուն ժողովուրդին, լաւագոյն ձեւով շահարկելու մարտահրաւէրին դէմ յանդիման։
Հ.Յ.Դ. Բիւրոյի ներկայացուցիչ Յակոբ Տէր Խաչատուրեան իր կարգին յայտնեց, որ ճշմարտութեան համար պայքարողը կը յաղթէ, եթէ կը հաւատայ իր պայքարին։ Տէր Խաչատուրեան իր ողջոյններն ու երախտագիտութիւնը յղեց «Պաաս» Պաշշար Ալ Ասատին, դիտել տալով որ Սուրիա միշտ նեցուկ կանգնած է հայութեան եւ պաշտօնապէս ճանչցած ու դատապարտած է Հայոց Ցեղասպանութիւնը, բարձր գնահատելով երկու բարեկամ ժողովուրդներուն եւ կուսակցութիւններուն պատմական կապերը։
Տէր Խաչատուրեան շեշտեց, որ սուրիահայութիւնը կառչած կը մնայ Սուրիական Հայրենիքին ու ամէն ջանք ի գործ կը դնէ անոր վերականգնումին համար։ Իրենց հերթին, պատուիրակութեան անդամները «Պաաս» կուսակցութեան 76-ամեակին առիթով շնորհաւորեցին անոր ղեկավարութիւնը։
Պատուիրակութեան մաս կը կազմէին Հ.Յ.Դ. Լիբանանի Կեդր. Կոմիտէի ներկայացուցիչ, Լիբանանի հայկական երեսփոխանական պլոքի նախագահ Յակոբ Բագրատունի, Սուրիոյ խորհրդարանի երեսփոխան Ժիրայր Րէիսեան, ազգայիններ Արմէն Ուրֆալեան եւ Սուրէն Վարդանեան։
Ապա, Հ․Յ․Դ․ Բիւրոյի ներկայացուցիչ Յակոբ Տէր Խաչատուրեան, իրեն ընկերակցող պատուիրակութեան հետ այցելեց Սուրիոյ խորհրդարանի նախագահ Համմուտէ Սապպաղին։
Պատուիրակութեան մաս կը կազմէին՝ Հ․Յ․Դ․ Լիբանանի Կեդր. Կոմիտէի ներկայացուցիչ, Լիբանանի հայկական երեսփոխանական պլոքի նախագահ Յակոբ Բագրատունի, Բերիոյ Հայոց Թեմի Յարաբերական Մարմնի ներկայացուցիչ Վրէժ Եագուպեան, թեմի մամլոյ պատասխանատու Ռուբէն Գէորգեան եւ ազգայիններ Արմէն Ուրֆալեան ու Սուրէն Վարդանեան։
Սապպաղ բարի գալուստ մաղթելով պատուիրակութեան նշեց, որ սուրիահայերը Սուրիոյ բնիկ քաղաքացիներն են եւ սուրիական բազմերանգ ընկերութեան կարեւոր բաղադրիչներէն մէկը կը համարուին։ Ապա, աւելցնելով ըսաւ որ անոնք, Սուրիոյ մնացեալ ժողովուրդին հետ, աշխոյժ դերակատարութիւն ունին Սուրիոյ բարգաւաճման եւ պաշտպանութեան մէջ, շեշտելով որ ներկայ փուլին սուրիահայերը ժողովուրդին հետ ձեռք-ձեռքի տալով նուիրուած են Սուրիոյ վերականգնումի աշխատանքին՝ Սուրիոյ իմաստուն նախագահին բարձր հովանաւորութեան ներքոյ։
Սապպաղ առանձնայատուկ կերպով անդրադարձաւ նաեւ սուրիացի եւ հայ ժողովուրդներու պատմական, ջերմ յարաբերութիւններուն, որոնց լաւագոյն դրսեւորումը ի յայտ եկաւ Սուրիան ցնցած վերջին երկրաշարժին, երբ հայութիւնը օգնութեան ձեռք երկարեց Սուրիոյ ժողովուրդին։
Իր կարգին Հ․Յ․Դ․ Բիւրոյի ներկայացուցիչը նախ շնորհակալութիւն յայտնեց Սուրիոյ խորհրդարանի նախագահին եւ անդամներուն Հայոց Ցեղասպանութեան ճանաչման եւ դասապարտման համար։ Ապա դիտել տուաւ, որ Սուրիան ցնցած երկրաշարժէն անմիջապէա ետք ՀՅԴ Բիւրօն իր աշխարհասփիւռ կառոյցները զօրաշարժի ենթարկեց՝ փութալու Սուրիոյ ժողովուրդին օգնութեան։
Տէր Խաչատուրեան դիտել տուաւ, որ Սուրիան իւրայատուկ նշանակութիւն եւ կարեւորութիւն ունի ողջ հայութեան համար եւ աշխարհի որեւէ անկիւն կարելի է գտնել Սուրիոյ մէջ արմատներ, հարազատներ ունեցող հայեր, որոնք անխախտ պահած են իրենց կապը Սուրիոյ հետ։
Հ․Յ․Դ․ Բիւրոյի ներկայացուցիչը շնորհակալութիւն յայտնեց Սուրիոյ պետութեան, որ ընդհանրապէս եւ մանաւանդ պատերազմի տարիներուն հոգատար վերաբերմունք ցուցաբերած է հայ համայնքին եւ նեցուկ կանգնած անոր վերականգնումի աշխատանքներուն։ Ան բարձր գնահատեց նաեւ Հայաստանի Հանրապետութեան եւ Ազգային ժողովին հետ Սուրիոյ պետութեան եւ խորհրդարանին յարաբերութիւնները
Եզրափակելով Հ․Յ․Դ․ Բիւրոյի ներկայացուցիչը յայտնեց, որ Հայ Յեղափոխական Դաշնակցութիւնը կը գնահատէ պատերազմի տարիներուն նախագահ Պաշշար Ալ Ասատի ղեկավարութեամբ Սուրիոյ եւ անոր ժողովուրդին պատուաբեր կեցուածքները, լաւ կը գիտակցի Սուրիոյ դէմ մղուած ապատեղեկատուական պատերազմին եւ ամէն ջանք ի գործ կը դնէ Սուրիոյ ճշմարիտ պատկերը հասցնելու աշխարհին։ Ապա մաղթեց, որ Սուրիան շուտով վերականգնի, իսկ ժողովուրդը վերագտնէ իր նախապատերազմեան բարօր ու խաղաղ կեանքը։
Հանդիպումին կը մասնակցէր Սուրիոյ խորհրդարանի երեսփոխան Ժիրայր Րէիսեան։
