0
0
Ստորեւ, լոյս կ՛ընծայենք հարցազրոյց մը, որ խմբագրութիւնս կատարեց, Պոսթընի մէջ, տեղի ունենալիք Հ.Մ.Ը.Մ.-ի Ա.Մ.Ն. Արեւելեան շրջանի 21-րդ միջ–մասնաճիւղային խաղերուն առթիւ, տեղւոյն յանձնախումբի անդամներուն` Հ.Մ.Ը.Մ. Պոսթընի ատենապետ Յակոբ Պեճաքեանի, Շրջանային Վարչութեան ատենապետ Պետիկ Տէր Վարդանեանի եւ Աւետիս Պարմաքեանի հետ.-
Հ.- Այս տարի 21-րդ անգամ ըլլալով կը կազմակերպուին Հ.Մ.Ը.Մ.-ի Ա.Մ.Ն. Արեւելեան Շրջանի այս խաղերը: Կարելի՞ է կարճ պատմական մը ներկայացնել:
Պ.-Կարճ պատմական մը փոխանցելով, յայտնենք թէ Հ.Մ.Ը.Մ.-ի ստեղծման աշխատանքները քանի մը առիթներով, փորձած է Ա.Մ.Ն. Արեւելեան Շրջանի տարբեր նահանգներու մէջ 1920-էն սկսեալ, մինչեւ 1971 երբ հիմնուեցաւ շրջանի առաջին մասնաճիւղը` Ուաշինկթընի մէջ: Կազմակերպական նոր աշխուժացում կատարուեցաւ եւ 1973-ին Պոսթընի Հ.Մ.Ը.Մ.-ը կազմուեցաւ: Ապա յաջորդաբար այլ մասնաճիւղեր հիմնուեցան` 1975-ին Նիւ Եորքի, Նիւ Ճըրզիի, Շիքակոյի, Ֆիլատելֆիոյ մէջ, ապա տարի մը ետք` Տիթրոյթի մէջ: 1981-ին` Փրովիտենսի եւ Ֆլորիտայի մէջ հիմնուեցան մասնաճիւղեր եւ վերջապէս Ալպընիի ամենէն երիտասարդ մասնաճիւղը` 1986-ին:
Առաջին տարիներուն, Գանատայի Հ.Մ.Ը.Մ.-ի շրջանի հետ, կազմակերպուեցան Նաւասարդեան մարզական խաղերը, իսկ 1977-ին Գանատայի եւ Ա.Մ.Ն. Դ. Ներկայացուցչական ժողովին որոշուեցաւ Ա.Մ.Ն. Արեւելեան Շրջանը ունենայ իր առանձին վարչութիւնը տաս մասնաճիւղերով, եւ այսպէս միասնաբար կազմակերպուեցան նաւասարդեան մարզական խաղերը մինչեւ 1990 թուականը,
1991-էն սկսեալ Ա.Մ.Ն. Արեւելեան շրջանը իր տաս մասնաճիւղերով, հազարէ աւելի անդամներով, եւ մօտ վեց հարիւր մարզիկ եւ սկաուտներով կը կազմակերպէ, տարեկան դրութեամբ, Նաւասարդեան մարզական խաղերը` Ա.Մ.Ն.-ի անկախութեան օրը զուգադիպող Յուլիս 4-ի շաբաթավերջը, որուն հիւրաբար ներկայ կ՛ըլլան Գանատայի մասնաճիւղերը: Այս տարի կարգը հասած է Պոսթընին: Նշենք թէ, այս մէկը շրջանային միակ տարեկան ձեռնարկն է որ բարոյական միութենական նուաճումներուն կողքին, նիւթական մուտք կ՛ապահովէ, շարունակելու համար կազմակերպական մարզական-սկաուտական շրջանային մակարդակի աշխատանքները:
Հ.- Ինչպէ՞ս կատարուած են պատրաստութիւնները: Կարելի՞ է յաւելեալ մանրամասնութիւններ փոխանցել: Դժուարութիւններ, խոչընդոտներ գոյութիւն ունի՞ն: Ինչպէ՞ս կարելի է լուծել:
Պ.- Դժուարութիւննե՛ր … անշուշտ ունինք, այս տարողութեամբ գործունէութիւն` քանի մը անդամներու անսակարկ աշխատանքով կարելի չէ յաջողութեամբ կատարել: Հակառակ անձնական պարտաւորութիւններուն եւ բոլոր դժուարութիւններուն, այս տարի եւս բախտաւորութիւն է մեր միութեան համար, բոլոր Պոսթընի Հ.Մ.Ը.Մ.-ականները եւ ծնողներն ու համակիրները, խանդավառութեամբ անսակարկ գործի լծուած են: Այս առիթով, տեղին է շնորհակալութիւն յայտնել Հայ Մշակութային եւ Կրթական Կեդրոնի անձնակազմին: Զանազան յանձնախումբեր, տարբեր սենեակներու մէջ ժողովներ կը կատարեն: Անոնք կ՛աշխատին ամէն գնով, յաջողցնելու այս ձեռնարկը:
Հ.- Վստահաբար Հ.Մ.Ը.Մ.-ավայել մարզական բարձր ոգին կը գերազանցէ մրցումն ու արդիւնքը: Այս գծով, յատուկ փոխանցելիք ունի՞ք:
Պ.-Դաշտին վրայ, բոլորս ալ մարզիկ եղած ենք եւ մրցած ենք յաղթելու համար: Բնական է…երբեմն խաղի ընթացքին հարցեր պատահած են, վերջ ի վերջոյ հինգ հարիւրէ աւելի մարզիկներ եկած են տարբեր նահանգներէ, հարիւրէ աւելի խմբային մարզական խաղերու մասնակցելու չորս օրուայ ընթացքին: Անլուծելի հարցեր չենք ունեցած, Հ.Մ.Ը.Մ.-ական միութենական եւ Ազգային գիտակցութիւնը միշտ տիրապետած է:
Հ.- Ո՞վ պիտի ըլլայ այս տարուայ նախագահը: Եթէ կարելի է հակիրճ կենսագրական մը ներկայացնել:
Պ.- Այս տարուայ Միջ-Մասնաճիւղային մարզական խաղերուն պիտի Նախագահեն, գաղութէն ներս յարգանք վայելող, Ազգային Սուրբ Ստեփանոս Վարժարանի Հոգաբարձու Տէր եւ Տիկ. Ժան Ժագ եւ Նիգոլ Հաժժար: Յատուկ պատուիրակութիւն (կազմուած Հ.Մ.Ը.Մ. Պոսթընի ատենապետ Յակոբ Պեճաքեանէ, Շրջանային Վարչութեան ատենապետ Պետիկ Տէր Վարդանեանէ եւ Աւետիս Պարմաքեանէ) մը այցելեց Հաժժարներու բնակարանը, այդ առաջարկը փոխանցելու համար: Դրական պատասխանն ու հաւանութիւնը առնուեցաւ հինգ վայրկեանէն: Անոնք հպարտ զգացին, իրենց հօր, աներհօր եւ մեծ հօր յիշատակին, “Խաչիկ Պապիկեան Հիմնադրամ“ի անուան տակ, նմանօրինակ պատասխանատուութիւն ստանձնելու: Նշենք թէ Նիգոլի հայրը, Լիբանանի խորհրդարանէն ներս տարիներ շարունակ ծառայած Խաչիկ Պապիկեանն է:
Հ.- Համեմատած նախանցեալ տարիներու, ի՞նչ յիշատակելի փոփոխութիւններ կատարուած են: Հետաքրքրութեան եւ վայելած ժողովրդականութեան իմաստով, ի՞նչ է պատկերը: Յառաջդիմութիւնը հետեւողական ձեւո՞վ կը կատարուի:
Պ.- Աշխարհն ու կեանքը արագօրէն եղափոխութեան մէջ են: Գոյութիւն ունին համակարգիչի եւ համացանցային անծայրածիր նորութիւններ: Ընդհարապէս, երիտասարդութիւնն է որ, այս մարզէն ներս մասնագիտացած, գործի լծուած է, յատկապէս մրցաշարքին ընթացքին, ուր պիտի օգտագործուին դիմատետր եւ այլ արդի միջոցներ: Այս օրերու Հ.Մ.Ը.Մ.-ական երիտասարդները զինուած նոր գիտելիքներով կը ստանձնեն պատասխանատուութիւններ, դիմագրաւելու համար յառաջիկայ տասնամեակներու դժուարութիւնները: Այս մէկը անգամ մը եւս պիտի արծարծուի, յառաջիկայ պատգամաւորական ժողովին որ տեղի պիտի ունենայ Սեպտեմբեր 5-10-ին Երեւանի մէջ:
Հ.- Իբրեւ աւարտի խօսք, յատուկ փոխանցելիք ունի՞ք:
Պ.- 1918-ին, Հ.Մ.Ը.Մ.-ի ծնունդէն մինչեւ այս օրը… հայրենիքէ դուրս` սփիւռքի զանազան երկիրներէ ներս, Հ.Մ.Ը.Մ. ապահոված է հայ մարզիկին դաշտն ու հայ սկաուտին բանակավայրը: Կառուցած է ակումբներ եւ դարձած հայ ընտանիքին յենարանը, եղած է դրօշակակիրը եւ պատրաստած է ազգայնասէր ղեկավարներ: Մեր փափաքն է որ այսպէս բարձրանանք եւ բարձրացնենք:
