Հ.Մ.Ը.Մ.-ի Եւրոպայի Երիտասարդական Առաջին Հաւաքը՝ Վիեննայի Մէջ

0 0
Read Time:3 Minute, 13 Second

Հ.Մ.Ը.Մ.-ի Վիեննայի մասնաճիւղի վարչութիւնը, կը տեղեկացնէ թէ Փետրուար 17-էն 19 Վիեննայի (Աւստրիա) մէջ տեղի ունեցաւ, իր տեսակին մէջ առաջինը նկատուող Հ.Մ.Ը.Մ.-ի Եւրոպայի երիտասարդական հաւաքը, որուն մասնակցութիւն բերին Անգլիայէն, Ֆրանսայէն, Հոլանտայէն, Գերմանիայէն, Աւստրիայէն, Շուէտէն, Հայաստանէն, Պելճիքայէն, Յունաստանէն, ինչպէս նաեւ Երուսաղէմէն ժամանած Հ.Մ.Ը.Մ.-ական 60 երիտասարդներ: Հ.Մ.Ը.Մ.-ի Կեդրոնական վարչութեան հովանաւորութիւնը վայելող եւ Հ.Մ.Ը.Մ.-ի Վիեննայի մասնաճիւղի վարչութեան կողմէ կազմակերպուած այս հաւաքը, հիմք ունենալով միութեան 2015-ին վերամշակուած ընդհանուր ծրագիր-կանոնագիրը եւ նախապէս ընդունուած ռազմավարական ծրագիրը, կը նպատակադրէր Եւրոպայի տարածքին գտնուող Հ.Մ.Ը.Մ.-ական երիտասարդները համախմբել, ծանօթանալու եւ համագործակցելու առիթներ ստեղծել, Եւրոպայի հայ երիտասարդութիւնը յուզող ազգային, միութենական ու ընկերային ժամանակակից հարցեր քննարկել, լուծումներ առաջարկել, զարկ տալ Եւրոպայի Հ.Մ.Ը.Մ.-ի երիտասարդական ցանցին եւ կարողութիւններուն, միութեան մարմիններուն եւ յանձնախումբերուն մէջ երիտասարդ տարր ներգրաւելու նպաստել, ինչպէս նաեւ նախապատրաստուիլ՝ միութեան 100-ամեակին ու անոր առընչուող ծրագրերուն։
Հաւաքի պաշտօնական բացման արարողութեան ընթացքին Հ.Մ.Ը.Մ.-ի Կեդրոնական Վարչութեան ատենապետ Գառնիկ Մկրտիչեան վեր առաւ նման հաւաքներու կարեւոր հանգամանքը, շեշտեց թէ միութեան գերագոյն մարմինը երիտասարդներուն ձայնը կը լսէ ու կը համագործակցի անոնց հետ, ինչպէս նաեւ հաստատեց թէ Եւրոպայի տարածքին Հ.Մ.Ը.Մ.-ը էական դերակատարութիւն ունի հայ երիտասարդութեան առողջ ու հայեցի միջավայր ապահովելու գործին մէջ:
Օգտուելով հաւաքի այս խորհրդաւոր առիթէն, Հ.Մ.Ը.Մ.-ի Վիեննայի մասնաճիւղի վեթերան երկու եղբայրներ՝ Գրիգոր Հալլաճեան եւ Սամուէլ Նահապետեան պարգեւատրուեցան Հ.Մ.Ը.Մ.-ի «Ծառայութեան» շքանշաններով:
Հաւաքը հիմնական հետեւեալ չորս թեմաներուն շուրջ քննարկումներ կատարեց.
Ա – Հ.Մ.Ը.Մ.-ի դերը Եւրոպայի երիտասարդութեան դիմագրաւած մարտահրաւէրներուն մէջ՝ հայեցի դիմագիծ, առաջնահերթութիւններ, միութենական կեանք. զեկուցաբերներ՝ Սեւան Նազարեան (Ֆրանսա) եւ Վիգէն Գապաքեան (Պելճիքա)։
Բ – Հ.Մ.Ը.Մ.-ը որպէս կամուրջ Եւրոպայի երիտասարդութեան եւ Հայաստան-Արցախի միջեւ. զեկուցաբեր՝ Հռիփսիմէ Յարութիւնեան (Յունաստան)։
Գ – Եւրոպայի երիտասարդութեան դերը Հ.Մ.Ը.Մ.-ի մէջ 21-րդ դարու պայմաններուն տակ. զեկուցաբերներ՝ Անէթ Մոսկոֆեան (Անգլիա) եւ Գէորգ Յակոբճեան (Աւստրիա)։
Դ – Հ.Մ.Ը.Մ. եւ հաղորդակցական ռազմավարութիւններն ու ընկերային ցանցերը. զեկուցաբերներ՝ Յարութ Պաղամեան (Երուսաղէմ) եւ Գոգօ
Սահակեան (Երուսաղէմ)։
Յաջորդական նիստերուն ընթացքին, իւրաքանչիւր գլուխի մէջ, զեկուցաբերները մանրամասնօրէն ներկայացուցին Հ.Մ.Ը.Մ.-ի դերակատարութիւնը հայ երիտասարդին դիմագրաւած ժամանակակից մարտահրաւէրներուն մէջ, դիպուկ օրինակներ տուին Եւրոպայի մէջ հասակ առնող սերունդներու հայեցի դաստիարակութեան մէջ Հ.Մ.Ը.Մ.-ին ունեցած եւ ունենալիք դերակատարութեան մասին, վերլուծեցին Եւրոպայի հայ երիտասարդութեան դիմագրաւած տագնապները, անդրադարձան դժուարութիւններուն, ներառեալ իրարու հետ հաղորդակցելու դժուարութիւններուն, հայերէնի անբաւարար իմացութեան կամ զանազան հայերէններու օգտագործման բարդ հարցերու գոյութիւնը եւ այլն։
Շեշտուեցաւ կարիքը ընկերային բնոյթի ծրագրերու գործադրութեան՝ Երեւանէն դուրս մարզերուն եւ սահմանային շրջաններուն մէջ Եւրոպայի մասնաճիւղերուն միջոցաւ, Արցախի մէջ երիտասարդական պտոյտներու, Հայոց բանակի բարոյական զօրակցութեան, եւ ընդհանուր առմամբ՝ հայրենաճանաչողութեան մակարդակի բարձրացման։
Անդրադարձ կատարուեցաւ մեր ընկերութիւններու եւ միութիւններու մօտեցումներուն, որոնք պէտք է վստահին երիտասարդութեան ու անոնց կարողութիւններուն։ Այս ծիրին մէջ առաջարկուեցաւ երիտասարդութեան ճամբով միութիւնը աւելի արդիական ու ժամանակակից ձեւերով ղեկավարել, միութեան մէջ երիտասարդութեան ներուժը, մասնագիտութիւնները եւ առհասարակ ժամանակակից փորձառութիւնները համակարգուած ձեւով օգտագործելու եղանակներ փոխանցուեցան, ինչպէս նաեւ յաջող օրինակներ ներկայացուեցան թէ տարբեր մասնաճիւղերու մէջ երիտասարդները ի՛նչպիսի քայլերով կը նպաստեն ու կրնան նպաստել Հ.Մ.Ը.Մ.-ի ու համայն հայութեան վերելքին ու յառաջդիմութեան:
Վերջին բաժնով երիտասարդները գիտականօրէն վերլուծեցին թէ ի՛նչպէս կարելի է հաղորդակցութեան եւ յատկապէս ընկերային հաղորդակցութեան արդի միջոցները ազդեցիկ ու նպատակասլաց ձեւով օգտագործել Հ.Մ.Ը.Մ.-ի առաջադրութիւններու հետապնդման եւ քարոզչութեան ի նպաստ։
Հաւաքի եզրափակիչ նիստը նուիրուած էր Հ.Մ.Ը.Մ.-ի 100-ամեակի աշխատանքներուն, ուր մանրամասնօրէն ներկայացուեցան նախատեսուած ծրագրերը, որոնք ընդհանրապէս տեղի պիտի ունենան Հայաստանի մէջ ու անոնց իրագործման գծով Հ.Մ.Ը.Մ.-ի Եւրոպայի երիտասարդութեան դերին ու կատարելիքներուն մասին խօսուեցաւ:
Հաւաքի մասնակիցները իրենց Վիեննա գտնուելու առիթէն օգտուելով այցելեցին նաեւ ազգային, պատմական ու մշակութային մեծ հարստութիւն ու արժէք ներկայացնող Մխիթարեան միաբանութեան Վիեննայի կեդրոնատեղին, թանգարանը, գրադարանն ու արխիւատունը եւ մեծ հետաքրքրութեամբ ծանօթացան կեդրոնի գանձերուն, ինչպէս նաեւ հայ ազգի մեծ բարեկամ ու «Մուսա լեռան քառասուն օրերը» հանրածանօթ գործի հեղինակ Ֆրանց Վերֆելի արձանը ու երախտագիտութեան ծաղիկներ զետեղեցին:
Իր տեսակին մէջ առաջինը նկատուող այս հաւաքը եկաւ հաստատելու, թէ նման ձեռնարկներու ծարաւ ունի Եւրոպայի երիտասարդութիւնը:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post Միջազգային Դիտորդներ Հետեւեցան Արցախի Սահմանադրական Հանրաքուէին
Next post Սրբօրէն Պահենք Մեր Մայրենին

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles