Հ.Մ.Ը.Մ.-Ի Ա.Մ.Ն. ԱՐԵՒԵԼԵԱՆ ՇՐՋԱՆԻ 26-ՐԴ ՆԱՒԱՍԱՐԴԵԱՆ ԽԱՂԵՐԸ ՇԻՔԱԿՈՅԻ ՄԷՋ

0 0
Read Time:9 Minute, 58 Second

գառեվօռ

Հ.Մ.Ը.Մ.-ի Արեւելեան Միացեալ Նահանգներու 26-րդ Նաւասարդեան խաղերը տեղի ունեցան Շիքակոյի մէջ, Ուրբաթ, Յուլիս 1-էն սկսեալ մինչեւ Երկուշաբթի, Յուլիս 4, 2015-ին, նախաձեռնութեամբ` Հ.Մ.Ը.Մ.-ի Շրջանային Վարչութեան, հովանաւորութեամբ` Ա.Մ.Ն. Արեւելեան Շրջանի Բարեջան Առաջնորդ Բարձրաշնորհ Տ. Օշական Արք. Չօլոյեանի, ներկայութեամբ` Հ.Մ.Ը.Մ.-ի Կեդրոնական Վարչութեան անդամ եւ Արեւելեան Միացեալ Նահանգներու Շրջանի կապ` եղբ. Հրաչ Մեսրոպեանի եւ հիւրընկալութեամբ` Հ.Մ.Ը.Մ.-ի Շիքակոյի մասնաճիւղին:
Հ.Մ.Ը.Մ.-ի տարեկան այս մարզական խաղերը, առիթ մըն են սատարելու Հ.Մ.Ը.Մ.-ի վսեմ նպատակին, երբ շրջանի մասնաճիւղերէն, ժամանած Հ.Մ.Ը.Մ.ականներ եւ համակիրներ, գօտեպնդուած Հ.Մ.Ը.Մ.-ի շունչով եւ ոգիով, կը հաւաքուին Նաւասարդեան խաղերու դրօշին տակ` մրցելու` հայկական ազնիւ ոգիով, ստեղծելու` խանդավառ մթնոլորտ մը, ծառայելու` «Բարձրացի՛ր-Բարձրացո՛ւր»-ին, եւ միշտ ի միտի ունենալով` թէ այս խաղերէն յաղթական դուրս պիտի գայ միայն Հ.Մ.Ը.Մ.-ը:23

Չորս օրերու վրայ երկարող խաղերու ընթացքին` դաշտերու վրայ, պանդոկի միջանցքներուն եւ ամէնուրէք Հ.Մ.Ը.Մ.-ական մարզիկը հանդիպեցաւ իր հարազատներուն, որոնք ժամանած էին Արեւելեան Ամերիկայի տասը մասնաճիւղերէն.- Ալպընի, Ֆլօրիտա, Նիւ Եորք, Նիւ Ճըրզի, Ուաշինկթոն, Պոսթոն, Տիթրոյթ, Փրովիտենս, Ֆիլատելֆիա եւ հիւրընկալ Շիքակօ: Նաեւ, Հ.Մ.Ը.Մ. Գանատայէն իր մասնակցութիւնը բերաւ Թորոնթոյի մասնաճիւղը: Մարզիկները իջեւանեցան «Ուեսթին Շիքակօ» պանդոկին մէջ ուր հիւրընկալուեցան Հ.Մ.Ը.Մ.ի Շիքակօ մասնաճիւղին կողմէ, որ այս առիթով, ճիգ չէր խնայած մարզական եւ ընկերային լաւագոյն մթնոլորտը ստեղծելու:
Մրցումներն տեղի ունեցան Ուիթըն Աքատեմի եւ Բրայրի Սթոն նարզական համալիրնեէն ներս: Իսկ, ձեռնարկները եւ տողանցքը կատարուեցան «Ուեսթին Շիքակօ» պանդոկէն ներս:123

 

 
Յունիս 30-ին բոլոր մարզիկները, սկաուտները եւ համակիրները, խումբ առ խումբ ժամանեցին Շիքակօ, ուր տեղի ունեցաւ մասնաճիւղերու պատասխանատուներու կարճ ժողով մը, բացատրելու շաբաթավերջի մարզախաղերու դասաւորումը, օրէնքները եւ խստապահանջ կարգապահական պայմանները:
Նաւասարդեան այս մարզախաղերը սկսան Ուրբաթ Յուլիս 1էն մինչեւ Կիրակի Յուլիս 3, 2016, ծիլ, փոքր, կրտսեր, երէց եւ վեթերան մարզիկմարզիկուհիներու դասակարգերով: Ծնողներ ու բարեկամներ ոգեւորիչ խանդավառութեամբ կը շրջէին դաշտէ դաշտ, քաջալերելով իրենց մարզիկները, որպէսզի նորանոր յաղթանակներ արձանագրեն իրենց մասնաճիւղերուն համար, առանց անդրադառնալու թէ իրենց Հ.Մ.Ը.Մ.ի անդամակցութիւնը ինքնին ամենամեծ յաղթանակն է մեր հայեցի ազգային դիմագիծի պահպանման ճիգերուն մէջ:456

 

 

 

 

 

Կիրակի, Յուլիս 3-ի երեկոյեան տեղի ունեցաւ յաղթանակի ճաշկերոյթ-պարահանդէսը: Պաշտօնական բաժինը բացուեցաւ պատւոյ հիւրերու մուտքով: Ներկայ էին մօտ երեք հարիւր Հ.Մ.Ը.Մ.ականներ եւ համակիր ազգայիններ, որոնք ապրեցան յիշատակելի երեկոյ մը Հ.Մ.Ը.Մ.ի մեծ ընտանիքին հետ: Պատւոյ սեղանին վրայ ներկայ էին Արեւելեան Միացեալ Նահանգներու Թեմի Բարեջան Առաջնորդ` Բարձրաշնորհ Տ. Օշական Արք. Չօլոյեան, Շիքակոյի Ամենայն Սրբոց եկեղեցւոյ հոգեւոր հովիւ գերապատիւ Ղեւոնդ Ծայրագոյն Վարդապետ Բենթէզեան, Հ.Մ.Ը.Մ.ի Կեդրոնական Վարչութեան անդամ եւ Արեւելեան Շրջանի ներկայացուցիչ եղբ. Հրաչ Մեսրոպեան, Հ.Յ.Դ. Արեւելեան Միացեալ Նահանգներու Կեդրոնական Կոմիտէի ներկայացուցիչ ընկեր Վազգէն Այվազեան, Հ.Մ.Ը.Մ.ի Շրջանային Վարչութեան ատենապետ Վահէ Թանաշեան, Հ.Մ.Ը.Մ.ի Շիքակօ մասնաճիւղի Վարչութեան ատենապետ եղբայր Վարուժ Գուգուզեան, եւ խաղերու կազմակերպիչ յանձնձխումբի ատենապետ եղբայր Մայք Տեմիրճեան:789

 

 

 

 

 

Պատւոյ հիւրերու շարքին էին նաեւ Հ.Օ.Մ.ի Շրջանային Վարչութեան ներկայացուցիչ՝ Ընկ. Սիլվա Սաղերեան, ՀԵԴ-ի Կեդրոնական Վարչութեան ներկայացուցիչ՝ընկերուհի Քնար Չարշաֆլեան, Հ.Մ.Ը.Մ.ի Շրջանային Վարչութեան անդամներ եղբայր Ռազմիկ Փանոսեան, քոյր Էլիզաբէթ Դրամկոչեան, եղբայր Վիգէն Խաչատուրեան, եղբայր Յովսէփ Մինասեան եւ եղբայր Արա Իշխանեան, Շրջանային Մարզական յանձնախումբի անդամներ եղբայր Փոլ Գուգուզեան, եղբայր Յակոբ Սոլաքեան, եղբայր Տիգրան Աստուրեան եւ եղբայր Քրիս Գրիգորեան:
Հանդիսութեան պաշտօնական բացումը կատարուեցաւ քայլերգներու կատարողութեամբ:
Սրբազան Հօր սեղանի օրհնութենէ եւ ճաշէն ետք, օրուան պատշաճ յայտագիրը բացուած հռչակուեցաւ:33
Հ.Մ.Ը.Մ.ի Շիքակօ մասնաճիւղի խաղերու կազմակերպիչ յանձնձխումբի անունով, եղբայր Մայք Տեմիրճեան բացաւ երեկոն բարի գալուստ մաղթելով բոլոր ներկաներուն: Ան շնորհակալութիւն յայտնեց այս խաղերու յաջողութեանը նպաստող Հ.Մ.Ը.Մ.ի Շիքակօ մասնաճիւղի Վարչութեան եւ բոլոր անդամներուն, համակիրներուն եւ յարակից կազմակերպութիւններուն:
Ան հրաւիրեց Հ.Մ.Ը.Մ.ի Շիքակօ մասնաճիւղի Վարչութեան ատենապետ եղբայր Վարուժ Գուգուզեան, որ հակիրճ խօսքով շնորհակալութիւն յայտնեց կազմակերպիչ յանձնախումբին, ենթայանձնախումբերուն եւ բոլոր համակիրներուն, որոնց տքնաջան աշխաստանքին շնորհիւ այս շաբաթավերջը ընթացաւ մեծ յաջողութեամբ: «Կը մաղթենք պարծանք ու պատիւ Հայ Մարմնակրթական Ընդհանուր Միութեան աննկուն ոգիով իրականացնող աշխատանքներուն եւ անոր միշտ բարձր ծածանող միութենական դրօշին», եզրակացուց ան:414243
Շրջանային Վարչութեան ատենապետ եղբայր Վահէ Թանաշեան, իր կարգին բարի գալուստ մաղթեց բոլոր ներկաներուն: Ան շնորհակալութիւն յայտնեց Շրջանային Մարզական յանձնախումբին, Շիքակօ մասնաճիւղի Վարչութեան, կազմակերպիչ յանձնախումբին, ենթայանձնախումբերուն եւ բոլոր անդամներուն, ընտանիքներուն եւ կազմակերպութիւններուն, որոնք ամիսներ շարունակ անսակարկ եւ նուիրումով աշխատեցան այս խաղերու յաջողութեան համար: Եղբայր Վահէ շեշտեց թէ Հ.Մ.Ը.Մ.ը միշտ ալ յաղթական դուրս եկած է այս խաղերու աւարտին, որովհետեւ ոտնագնդակի, վոլիպոլի, պասքէթպոլի կամ այլ մարզաձեւերու համախմբում մը չէ, այլ Հայկական Մարմնակրթական Ընդհանուր Միութիւն մըն է, որ կը ձգտի ազգային վսեմ նպատակներու, հետեւաբար այսօրուան յաղթանակը այդ նպատակին իրագործման աշխատանքներու յաղթանակն է, եւ որու հետեւանքով հայ ժողովուրդի յաղթանակն է:
Հ.Յ.Դ. Արեւելեան Միացեալ Նահանգներու Կեդրոնական Կոմիտէի կողմէ խօսք առաւ ընկեր Վազգէն Այվազեան: Ան ողջունեց Հ.Մ.Ը.Մ.ի հաստատաքայլ երթը շրջանի մէջ, նշելով թէ Արեւելեան Ամերիկայի Հ.Յ.Դ. Կեդրոնական Կոմիտէն, յանձինս Հայ Յեղափոխական Դաշնակցութեան մեծ ընտանիքին, կու գայ անգամ մը եւս ողջունելու Արեւելեան Ամերիկայի Հ.Մ.Ը.Մ.ի Շրջանային Նաւասարդեան խաղերը, որոնք այս տարի իրենց 26-ամեակը կը բոլորեն:514937

 

 

 

 

 

 

Ընկեր Վազգէն իր խօսքը շարունակեց ըսելով “Աշխարհի հինգ ցամաքամասերուն վրայ ապրող հայորդիներու միջեւ, այս մարմնակրթական միութիւնը իւրայատուկ կապ մըն է: Փաստը, այսօր հոս… Շիքակոյի մէջ, տեւոյն մասնաճիւղի հովանիին տակ կը կատարենք մեր Նաւասարդեան մրցումները: Ահա այս երեւոյթին մէջ, պէտք է փնտռել բարձրանալու եւ բարձրացնելու հրամակայականը եւ այդ ալ մի՛շտ պատրաստ տրամաբանութեամբ:
Պատի՜ւ այդ նշանաբանին…
Յարգա՜նք այդ պանծալի դրօշին…
Եւ…Հսկայ նուիրման տորմիղ հրաթեւ, կամաւոր բանակ:
Հ.Մ.Ը.Մ.ի Կեդրոնական Վարչութեան ներկայացուցիչ` եղբայր Հրաչ Մեսրոպեան, շեշտեց թէ, Հ.Մ.Ը.Մ.-ականը պիտի շարունակէ գործել եւ անոր ընտանիքի բոլոր անդամներուն ու յատկապէս պատասխանատու մարմիններուն երկար եւ հետեւողական աշխատանքի, ճիգի ու քրտինքի արդիւնքն է, այս մրցաշարքին կազմակերպումը:384847
Եղբայր Հրաչ իր պատգամին մէջ յայտնեց թէ դարձեալ եւ միշ՛տ պատնէշի վրայ է Հ.Մ.Ը.Մ.ը: Ի վերջոյ Հայ Մարմնակրթական Ընդհանուր Միութիւնը՝ Հ.Մ.Ը.Մ.ն է որ, իր հիմնադրութիւնէն ի վեր համարօրէն կը պայքարի կերտելու համար տիպար ու մաքրամաքուր մարդը, հայը, մարզիկն ու սկաուտը: Ան շարունակեց իր խօսքը, նշելով թէ սրընթաց թափով յեղաշրջուող նոր ժամանակներուն հետ ընթանալով, Հ.Մ.Ը.Մ.ականէն կը պահանջուի յաւելեալ զոհողութիւն եւ նուիրում: Բնականաբար անփոփոխ պիտի մնայ յանձնառութեան ուժը: Կառչած իր բարձրացի՛ր բարձրացու՛ր նշանաբանին, Հայ Մարմնակրթական Ընդհանուր Միութիւնը, պիտի շարունակէ սերունդներ պատրաստել եւ դաստիարակել, այդ ալ շնորհիւ ժողովուրդին՝ համակիրներուն տածած գուրգուրանքին եւ հետեւողական ու աննահանջ քաջալերանքին:
1425գ

 

 

 

 

 

Վերջին խօսք առնողը եղաւ Միացեալ Նահանգներու Թեմի Առաջնորդ Բարձրաշնորհ Տ. Օշական Արք. Չօլոյեանը: Սրբազան Հայրը նախ շնորհաւորեց 26-րդ Նաւասարդեան խաղերու յաջողութիւնը, եւ իր խրախուսիչ պատգամով գովքը հիւսեց 98 տարեկան երիտասարդ Հ.Մ.Ը.Մ.ին: Ան իր խօսքը ուղղելով երիտասարդութեան շեշտեց որ Հ.Մ.Ը.Մ.ը հայ երիտասարդին կու տայ հայու ինքնութիւն, հաւատարմութիւն մեր ազգային արժէքներուն, ու փոքր տարիքէն անոր կը սորվեցնէ կարգ ու կանոն, յարգանք օրէնքի նկատմամբ: Սրբազան հայրը աւելցուց թէ մեր պարտականութիւնն է յաջորդ տասնամեակներուն, պայքարիլ անտարբերութեան դէմ, տէր կանգնիլ մեր ազգային ամբողջական իրաւունքներուն, օժանդակել Հ.Մ.Ը.Մ.ին ամէն ձեւով, նամանաւանդ պահելով մեր զաւակները անոր խրոխտ շարքերուն մէջ, որպէսզի անոնք դառնան արժանաւոր պաշտպանները մեր կրօնքին, մշակոյթին ու հայրենիքին: Ան յիշեցուց, որ զանազան կազմակերպութիւններ եկած ու գացած են, բայց Հ.Մ.Ը.Մ.ը կը մնայ միշտ երիտասարդ եւ թէ անոր սկզբունքները եւ ազգային սրբութիւնը շունչ եւ արիւն տուած են հայորդիին:
Սրբազան զուգահեռ մը գծելով անդրադարձաւ պատմական Մեծն Բրիտանիոյ պետութեան, որուն ցամաքամասէն արեւը մար չէր մտնէր, որովհետեւ անոնք գաղութարար, բռնարար պետութիւն էին՝ Աւստրալիայէն մինչեւ Ամերիկա, Հ.Մ.Ը.Մ.ը սակայն իր առաքելութեամբ կը հպարտանայ, որ իր դրօշակի վրայէն արեւը մար չի մտնէր այս աշխարհի վրայ, հետեւաբար բոլոր Հ.Մ.Ը.Մ.ականները պարտականութիւնը ունին այդ ինքնութիւնը՝ ծառութեամբ, եւ մանաւանդ… զոհաբերութեամբ կատարել:32
Յայտագրի պաշտօնական բաժինի աւարտին, ներկաները Գանատայէն ժամանած երգիչ Գէորգ Արթինեանի եւ իր նուագախումբի ճոխ երգերով ու պարերով խանդավառ պահեր ապրեցան մինչեւ առաւօտեան կանուխ ժամեր:
Խանդավառ մթնոլորտի դադարին, տեղի ունեցաւ խմբային խաղերու ախոյեան խումբերու բաժակատուչութիւնը Շրջանային Մարզական Յանձնախումբը կողմէ: Ստորեւ կը գտնէք ախոյեան խումբերու ցանկը զանազան մարզաձեւերու մէջ.-
PW Basketball – Շիքակօ
Midget Boy՚s Basketball – Թօրոնթօ
Jr Men՚s Basketball – Նիւ Եորք
Sr Men՚s Basketball – Նիւ Եորք
Sr Women՚s Basketball – Պոսթըն
Sr Men՚s Volleyball – Ուաշինկթըն
Sr Women՚s Volleyball – Նիւ Ճըրզի
Midget Boy՚s Soccer – Շիքակօ
Sr Men՚s Soccer – Պոսթըն

Երկուշաբթի, Յուլիս 4, 2016ի առաւօտեան, «Ուեսթին Շիքակօ» պանդոկէն ներս տեղի ունեցաւ Նաւասարդեան 26-րդ մարզախաղերուն փակման հանդիսութիւնը,:
Փակման հանդիսութեան հանդիսավարն էր Եղբայր Գօգօ Փափազեան, ան ներկայացուց օրուան պատուոյ հիւրերը՝ Արեւելեան Միացեալ Նահանգներու Թեմի Բարեջան Առաջնորդ` Բարձրաշնորհ Տ. Օշական Արք. Չօլոյեան, Շիքակոյի Ամենայն Սրբոց եկեղեցւոյ հոգեւոր հովիւ գերապատիւ Ղեւոնդ Ծայրագոյն Վարդապետ Բենթէզեան, Հ.Մ.Ը.Մ.ի Կեդրոնական Վարչութեան անդամ եւ Արեւելեան Շրջանի ներկայացուցիչ եղբ. Հրաչ Մեսրոպեան, Հ.Յ.Դ. Արեւելեան Միացեալ Նահանգներու Կեդրոնական Կոմիտէի ներկայացուցիչ ընկեր Վազգէն Այվազեան, Հ.Մ.Ը.Մ.ի Շրջանային Վարչութեան ատենապետ Վահէ Թանաշեան, Հ.Օ.Մ.ի Շրջանային Վարչութեան ներկայացուցիչ՝ Ընկ. Սիլվա Սաղերեան, եւ Հ.Մ.Ը.Մ.ի Շիքակօ մասնաճիւղի Վարչութեան ատենապետ եղբայր Վարուժ Գուգուզեան:
Փակման հանդիսութեան, նախ մուտք գործեցին պատւոյ հիւրերը, դրօշակակիրներու եւ Շրջանի խմբապետներու առաջնորդութեամբ` տողանցեցին արի եւ արենոյշներու, արծուիկներու եւ գայլիկներու խումբերը եւ յաջորդաբար մասնակից մասնաճիւղերու մարզիկները:
Խումբերու մուտքէն ետք փակման հանդիսութեան պաշտօնական բացումը կատարուեցաւ քայլերգներու կատարողութեամբ, ապա յաջորդաբար խօսք առին
-Հ.Մ.Ը.Մ.ի Շիքակօ մասնաճիւղի Վարչութեան ատենապետ եղբայր Վարուժ Գուգուզեան
– Հ.Օ.Մ.ի Շրջանային Վարչութեան ներկայացուցիչ ընկերուհի Սիլվա Սաղերեան
-Հ.Մ.Ը.Մ.ի Շրջանային Վարչութեան ատենապետ եղբայր Վահէ Թանաշեան
-Հ.Յ.Դ. Արեւելեան Միացեալ Նահանգներու Կեդրոնական Կոմիտէի ներկայացուցիչ ընկեր Վազգէն Այվազեան
-Հ.Մ.Ը.Մ.ի Կեդրոնական Վարչութեան ներկայացուցիչ եղբայր Հրաչ Մեսրոպեան
Խօսք առնողները բարձր գնահատեցին Հ.Մ.Մ.Ը.ի տարած ազգանուէր գործունէութիւնը, փոխանցեցին շնորհակալութիւնները մարզիկներուն ու պատասխանատուներուն որոնք փայլուն նոր էջ մը արձանագրեցին այս շաբաթավերջին, իրենց Հ.Մ.Ը.Մ.ականի վայել կեցուածքով, նշեցին թէ Հ.Մ.Ը.Մ.ական տիպարը հայրենասէր հայու ոգիով հայորդի մըն է, մի՛շտ բարձրանալով եւ բարձրացնելով հայու պատիւն ու կորովը, եւ այդ մէկը թէ՛ մարզադաշտի եւ թէ՛ անձնական կեանքի բնագաւառներէն ներս: 30
Վերջին խօսք առնողը եղաւ Սրբազան Հայրը որ իր խրախուսիչ պատգամով օրուայ խանդավառութիւնը կը հասցնէր իր գագաթնակէտին: Ան իր դէմքը դարձնելով երիտասարդ մարզիկներուն, որոնք Ամերիկայի եւ Քանատայի ափերուն ծնած, կը մեծնան Հ.Մ.Ը.Մ.ի շուքին ներքեւ, կը վստահեցնէր թէ անոնք կը պատկանին հայ ցեղին ու հայ եկեղեցիին, թէ անոնք ունին Հայաստանը որպէս հայրենիք ու հայերէնը որպէս մայրենի լեզու: Ձեր ինքնութիւնը ծնողներէն տրուած շնորհք մը չէ միայն, աւելցուց Սրբազան հայրը, այլ պարտաւորութիւն մը ձեր անձը, ձեր եղբայրն ու քոյրը յարգելու, ձեր եկեղեցին, լեզուն, մայր հայրենիքն ու ձեր ծննդավայրը սիրելու, ու արժեւորելու դուք ձեզ: Սրբազան Հայրը, իր սրտանց շնորհաւորական եւ շնորհակալական խօսքերը կ’եզրակացնէր դարձեալ խօսքը ուղղելով հայ երիտասարդութեան, Արարատը ձեզ կը սպասէ, քալեցէ՛ք դէպի յաղթանակ, դուք էք մեր զրկուած հողին տէրը, քալեցէ՛ք միշտ առաջ:
Փակման հանդիսութեան աւարտին տեղի ունեցաւ բաժակներու եւ յուշատախտակներու բաշխում բոլոր մասնակցող մասնաճիւղերուն, Շրջանային Մարզական յանձնախումբի ներկայացուցիչ՝ Եղբ. Յակոբ Սուլագեանի կողմէ: 44
Լողի մարզախաղերուն առաջին դիրքը միասնաբար գրաւեցին Ուաշինկթոն եւ Տիթրոյթ:
Շիքակօ մասնաճիւղը ստացաւ աթլեթիզմի առաջին դիրքի բաժակը:
Ընդհանուր դասաւորման առաջին դիրքի բաժակը յանձնուեցաւ Շիքակոյի մասնաճիւղին, բոլոր մարզախաղերու մէջ առաւելագոյն թիւով կէտեր հաւաքած ըլլալուն համար:
Ֆիլատելֆիա մասնաճիւղին տրուեցաւ ամենէն տիպար եւ լաւ կազմակերպուած մասնաճիւղը բաժակը:
իսկ «Ամենաբարելաւուած» մասնաճիւղի բաժակը ստացաւ՝ Շիքակօ մասնաճիւղը:

Խումբերու Ընդհանուր Դասաւորում.-
Մասնաճիւղ Կէտ
1.- Շիքակօ 63
2.- Պոսթըն 30
3.- Ուաշինկթըն 26
4.- Նիւ Ճըրզի 16
5.- Նիւ Եորք 14
6.- Փրովիտենս 10
7.- Թօրոնթօ 7
8.- Տիթրոյթ 6
9.- Ֆիլատելֆիա 4

Այսպէս Նաւասարդեան 26-րդ խաղերը հասան իրենց աւարտին, անգամ մը եւս Հ.Մ.Ը.Մ.ի յաղթանակով, այս խաղերով Արեւելեան Ամերիկայի շրջանը յաւելեալ խթան ստացաւ, խաղերուն մասնակցող բոլոր Հ.Մ.Ը.Մ.ականները վերանորոգեցին իրենց ուխտը, յուսալով որ 2017-ի Նաւասարդեան մարզախաղերը վերանորոգուած եռանդով տեղի պիտի ունենան Փրովիտենսի մէջ:31

Խմբային խաղերու առաջին եւ երկրորդ դիրքերը գրաւող խումբեր.-
Խաղաձեւ Առաջին Երկրորդ
PW Basketball Շիքակօ Նիւ Ճըրզի
Midget Boy՚s Basketball Թօրոնթօ Շիքակօ
Jr Men՚s Basketball Նիւ Եորք Շիքակօ
Sr Men՚s Basketball Նիւ Եորք Պոսթոն
Sr Women՚s Basketball Պոսթոն Շիքակօ
Sr Men՚s Volleyball Ուաշինկթոն Փրովիտենս
Sr Women՚s Volleyball Նիւ Ճըրզի Շիքակօ
Midget Boy՚s Soccer Շիքակօ Ուաշինկթոն
Sr Men՚s Soccer Պոսթոն Շիքակօ
Master’s Basketball * Պոսթոն Շիքակօ
* Այս մարզաձեւը կը կրէր բարեկամական բնոյթ եւ տեղ չի գրաւեց ընդհանուր դասաւորման մէջ:

ԹՂԹԱԿԻՑ

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles