Հ.Մ.Ը.Մ.-ի Արեւելեան Միացեալ Նահանգներու Նաւասարդեան 30-րդ Խաղեր Պոսթընի Մէջ

0 0
Read Time:6 Minute, 44 Second

 

ԹՂԹԱԿԻՑ

Երկու տարիներու յապաղումէ ետք, Հ.Մ.Ը.Մ.-ի Արեւելեան Միացեալ Նահանգներու 30-րդ Նաւասարդեան խաղերը տեղի ունեցան Պոսթընի մէջ, Ուրբաթ Յուլիս 1-էն մինչեւ Կիրակի Յուլիս 3, նախաձեռնութեամբ՝ Հ.Մ.Ը.Մ.-ի Շրջանային Վարչութեան, hովանաւորութեամբ՝ Ա.Մ.Ն. Արեւելեան թեմի Բարեջան Առաջնորդ Բարձրաշնորհ Տ. Անուշաւան Արքեպիսկոպոս Դանիէլեանի, ներկայութեամբ՝ Հ.Մ.Ը.Մ.-ի Կեդրոնական Վարչութեան անդամ եւ Արեւելեան Ա․Մ. Ն. Շրջանի կապ՝ Եղբ. Վահէ Թանաշեանի եւ հիւրընկալութեամբ՝ Հ.Մ.Ը.Մ.-ի Պոսթընի մասնաճիւղին: Բացման հանդիսութեան նաեւ ներկայ էին Ս. Աստուածածին եկեղեցւոյ (Ուայթընզվիլ) հոգեւոր հովիւ՝ Արժանապատիւ Միքայէլ Քահանայ Տէր Խոսրովեան, Հ.Յ.Դ. Բիւրոյի անդամ՝ Խաժակ Մկրտիչեան, Հ.Յ.Դ. Կեդրոնական Կոմիտէի անդամ՝ Փօլ Հարոյեան, Հ.Մ.Ը.Մ. Գանատայի Շրջանային Վարչութեան անդամ՝ Արպի Ղազարեան, Հ.Օ.Մ.-ի Շրջանային Վարչութեան ներկայացուցիչ՝ Նարդուհի Ապրիմեան, եւ Հ.Ե.Դ. Կեդրոնական Վարչութեան ատենապետ՝ Նարեկ Մկրտիչեան:

Խաղերուն բացման արարողութիւնը տեղի ունեցաւ «Woburn High School»-ի վազքի եւ ոտնագնդակի դաշտին վրայ, Շաբաթ Յուլիս 2 առաւօտեան ժամը 10-ին: Տողանցքը առաջնորդեցին դրօշակակիր սկաուտներ, Պոսթընի մասնաճիւղեն թմբկահար սկաուտներ, Շրջանային Խմբապետն ու Խմբապետուհին եւ շրջանին բոլոր մասնաճիւղերէն տարազաւոր սկաուտներ, արենոյշներ, գայլիկներ, արծուիկներ եւ մոկլիներ: Սկաուտներուն հետեւեցան յաջորդաբար իւրաքանչիւր մասնաճիւղի մարզիկները, Շրջանային Մարզական Յանձնախումբի անդամները, եւ վերջապէս Հ.Մ.Ը.Մ.-ի Արեւելեան Մ.Ն. պատուիրակութեան մարզիկներ որոնք պիտի մասնակցին Հայաստան կայանալիք Համա-Հ.Մ.Ը.Մ.ական 11-րդ մարզախաղերուն: Օրուան հանդիսավար Եղբ. Աւօ Պարմաքեան բարի գալուստի խօսքէն ետք, հերթով հրաւիրեց Պոսթըն մասնաճիւղի ատենապետ՝ Եղբայր Սեւակ Խաչատուրեանը, Շրջանային Վարչութեան ատենապետ՝ Եղբայր Վիգէն Խաչատուրեանը եւ Սրբազան Հօր ներկայացուցիչ՝ Արժպ. Միքայէլ Քհն. Տէր Խոսրովեանը, որոնք փոխանցեցին իրենց պատգամները:

Երեք օրերու վրայ երկարող խաղերու ընթացքին՝ դաշտերու վրայ, թէ ամենուրէք Հ.Մ.Ը.Մ.-ական մարզիկը հանդիպեցաւ իր հարազատներուն, որոնք ժամանած էին Արեւելեան Ամերիկայի զանազան մասնաճիւղերէն՝ Ալպընի, Պոսթըն, Շիքակօ, Տիթրոյթ, Ֆլորիտա, Մէրիմաք Հովիտ, Նիւ Ճըրզի, Նիւ Եորք, Ֆիլատելֆիա, Փրովիտենս եւ Ուաշինկթըն, ինչպէս նաեւ Գանատայէն ժամանած Մոնրէալի եւ Թորոնթոյի մասնաճիւղերը: Մարզախաղերուն մասնակցեցան 70 խումբեր բաղկացած 500 մարզիկներէ՝ կողովագնդակի (պասքէթպոլ), ոտնագնդակի (ֆութպոլ), ձեռնագնդակի (վոլիպոլ), վազքի, լողի, եւ ճատրակի մարզաձեւերուն:

Բոլոր մարզիկները, սկաուտները եւ համակիրները, խումբ առ խումբ ժամանեցին Պոսթըն, ուր տեղի ունեցաւ մանաճիւղերու պատասխանատուներու կարճ ժողով մը, բացատրելու շաբաթավերջի մարզախաղերու դասաւորումը, օրէնքները եւ խստապահանջ կարգապահական պայմանները:

Հ.Մ.Ը.Մ.-ի տարեկան այս մարզական խաղերը, առիթ մըն են սատարելու Հ.Մ.Ը.Մ.-ի վսեմ նպատակին, երբ շրջանի մասնաճիւղերէն, ժամանած Հ.Մ.Ը.Մ.-ականներ եւ համակիրներ, գոտեպնդուած Հ.Մ.Ը.Մ.-ի շունչով եւ ոգիով, կը հաւաքուին Նաւասարդեան խաղերու դրօշին տակ՝ մրցելու՝ հայկական ազնիւ ոգիով, ստեղծելու՝ խանդավառ մթնորոլտ մը, ծառայելու՝ «Բարձրացի՛ր-Բարձրացո՛ւր» նշանաբանին, եւ միշտ ի միտի ունենալով՝ թէ այս խաղերէն յաղթական դուրս պիտի գայ միայն Հ.Մ.Ը.Մ.-ի ընտանիքը:

Ծնողներ ու բարեկամներ ոգեւորիչ խանդավառութեամբ կը ներխուժէին դաշտէ դաշտ, քաջալերելով իրենց մարզիկները, որպէսզի նորանոր յաղթանակներ արձանագրեն իրենց մասնաճիւղերուն համար, առանց անդրադառնալու թէ իրենց Հ.Մ.Ը.Մ.-ի անդամակցութիւնը ինքնին ամենամեծ յաղթանակն է մեր հայեցի ազգային դիմագիծի պահպանման ճիգերուն մէջ:

Ուրբաթ, Յուլիս 1-ին, հիւրընկալ մասնաճիւղը կազմակերպեց Mediterranean Night  խնճոյքի հաւաք Ուոթըրթաունի Հայ Կեդրոնին բակը:

Շաբաթ Յուլիս 2-ի երեկոյեան տեղի ունեցաւ յաղթանակի ճաշկերոյթ-պարահանդէսը Westin Waltham պանդոկի սրահը: Բարի գալուստի խօսք արտասանեց հանդիսավար Եղբ. Աւօ Պարմաքեան, ապա հրաւիրեց Նաւասարդեան խաղերուն կազմակերպիչ յանձնախումբի ատենապետ Սարգիս Ուրֆալեանը, որ յայտնեց իր խորին երախտագիտութիւնը բոլոր յանձնախումբի եւ ենդայանձնախումբի անդամներուն: Հ.Մ.Ը.Մ. Արեւելեան Մ.Ն. Շրջանային Վարչութեան ատենապետ՝ Եղբ. Վիգէն Խաչատուրեան իր խօսքով նշեց այս խաղերուն յաջող ընթացքը, նաեւ այս առթիւ յիշեցնել մասնաճիւղի պատասխանատուներուն որ այս յաջողութեան հիման վրայ հարկ է հաստատել յարատեւ յառաջդիմութեան, որ Հ.Մ.Ը.Մ. ապագային արձանագրէ նորանոր յաղթանակներ: Հ.Յ.Դ. Կեդրոնական Կոմիտէի անդամ՝ Փօլ Հարոյեանը շեշտեց Հ.Մ.Ը.Մ.-ին անհրաժեշտ դերը հայ գաղութէն ներս: Հ.Մ.Ը.Մ.ի Կեդրոնական Վարչութեան անդամ՝ Եղբ. Վահէ Թանաշեանը փոխանցեց իր խօսքը (ամբողջութեամբ կարդալ՝ աւարտին)։ Սրբազան Հօր ներկայացուցիչ՝ Արժպ. Միքայէլ Քհն. Տէր Խոսրովեանը փոխանցեց Ա.Մ.Ն. Արեւելեան թեմի Բարեջան Առաջնորդ Բարձրաշնորհ Տ. Անուշաւան Արքեպիսկոպոս Դանիէլեանին հայրական պատգամը եւ օրհնութիւնը: Երեկոն խանդավառեց սիրուած երգիչ Յարութ Պետրոսեան, որ այս առթիւ եկած էր Գանատայէն յատուկ հրաւէրով:

Կիրակի Յուլիս 3-ին երեկոյեան տեղի ունեցաւ պարահանդէս՝ կրկին Westin Waltham-ի սրահը: Պարահանդէսը խանդավառեցին նշանաւոր երգիչ Սուրօ որուն միացաւ DJ Jilber: Նոյն երեկոյեան տեղի ունեցաւ բաժակներու եւ յուշատախտակներու բաշխումը: Ամենաբարելաւուած Մասնաճիւղի բաժակը ստացաւ Փրովիտենս մասնաճիւղը, իսկ Տիպար Մասնաճիւղի «Եղբայր Արամ Կաւուր» բաժակը ստացաւ Մէրիմաք Հովիտի մասնաճիւղը: Երէց Տղոց ձեռնագնդակի (վոլիպոլ) «Եղբայր Համօ Սարտարապէկեանց» բաժակը ստացաւ Մէրիմաք Հովիտի մասնաճիւղը: Երէց Տղոց Պասքէթպոլի «Եղբայր Մարք Ալաշաեան» բաժակը ստացաւ Նիւ Ճըրզիի մասնաճիւղը:

Խումբերու ընդհանուր դասաւորում.-

1.- Պոսթըն 86 կէտ

2.- Նիւ Եորք 70 կէտ

3.- Շիքակօ 22 կէտ

4.- Փրովիտենս 15 կէտ

5.- Նիւ Ճըրզի 14 կէտ

6.- Ուաշինկթըն 12 կէտ

7.- Մոնրէալ 9 կէտ

8.- Մէրիմաք Հովիտ 7 կէտ

9.- Ալպընի 4 կէտ

10.- Ֆիլատելֆիա, Թորոնթօ, Ֆլորիտա 0 կէտ

Յետադարձ ակնարկ մը նետելով շաբաթավերջի միջոցառումին վրայ, առանց վարանելու կարելի է հաստատել թէ շրջանս հարուստ է ազգային բարձր գիտակցութեան տէր կամաւորներով, ըլլան անոնք ծնողք թէ պատասխանատու:

Անգամ մը եւս Հ.Մ.Ը.Մ.ի մեծ ընտանիքը յաղթական դուրս եկաւ:

Յատուկ գնահատանքի արժանի է հիւրընկալ Պոսթընի մասնաճիւղը եւ շրջանային մարզական յանձնախումբը:

Բոլորին վարձքը կատար:

 

ՄԻՈՒԹԵՆԱԿԱՆ ՄԵԾ ՏՕՆԸ   (ՆԱՒԱՍԱՐԴԵԱՆ 30-ՐԴ ՄԱՐԶԱԽԱՂԵՐՈՒՆ ԱՌԻԹՈՎ)

Այսօր Հ.Մ.Ը.Մ.-ի ընտանիքին համար մեծ Տօն մըն է, հետեւաբար Կեդրոնական Վարչութեան համար՝ ուրախութիւն է Հ.Մ.Ը.Մ.-ի Արեւելեան Միացեալ Նահանգներու շրջանը ողջունել Նաւասարդեան 30-րդ մարզախաղերու կազմակերպման առիթով։ Աշխարհը հարուածած քորոնայի համաճարակի սահմանափակումներէն ետք, միութենական կեանքի աստիճանական վերադարձով եւ Նաւասարդեան մարզախաղերու կազմակերպումով Հ.Մ.Ը.Մ.-ական կեանքը վերստին կը ծաղկի շրջանին մէջ։

Հ.Մ.Ը.Մ.-ը սոսկ մարզական կամ սկաուտական կազմակերպութիւն մը չէ: Հ.Մ.Ը.Մ.-ը զուտ ազգային կազմակերպութիւն է, որ կը ձգտի պատրաստել ֆիզիքապէս տոկուն, իմացական եւ հոգեկան բարձր արժանիքի տէր հայեր եւ տիպար քաղաքացիներ: Աւելին, Հ.Մ.Ը.Մ.-ական մարզիկը կը դաւանի «Առողջ միտքը, առողջ մարմնի մէջ» մարզական միջազգային կարգախօսը, միաժամանակ ան ոչ-Հ.Մ.Ը.Մ.-ական մարզիկէն կը զատորոշուի իր ազգային յատուկ նկարագիրով եւ Հայաստանին ու հայութեան հանդէպ իր նուիրական պարտաւորութեամբ։  Ան կը հաւատայ Հայաստանին եւ Հայ Դատին ու միշտ պարտաստ է զինուորագրուելու եւ ծառայելու Հայաստանին եւ հայ ժողովուրդին։

Ուրեմն, Նաւասարդեան այս մարզախաղերն ալ սոսկ մարզական հանդիպումներ չեն, ոչ ալ՝ յաղթել-պարտուելու համար կազմակերպուած խաղեր են։ Նաւասարդեան մարզախաղերը հայ երիտասարդութեան համախմբման գեղեցիկ առիթներ են, ուր Հ.Մ.Ը.Մ.-ական ոգին, ազգային շունչն ու մթնոլորտը տիրապետող են։ Նաւասարդեան մարզախաղերու շնորհիւ մեր նորահաս մարզիկ-մարզիկուհիները քով-քովի գալով կը ծանօթանան իրարու, կը ճանչնան իրենց միութիւնը եւ կը կերտեն հաւաքական նկարագիր եւ ինքնութիւն, միշտ հաւատարիմ մնալով Հ.Մ.Ը.Մ.-ական մարզիկի տասնաբանեանին։

Նաւասարդեան խաղերը միաժամանակ մարզական ոգիի եւ արդար խաղի ներկայացման առիթներ են, ուր Հ.Մ.Ը.Մ.-ական մարզիկն ու մարզիկուհին ձեռք կը բերեն մարդկային ազնիւ արժանիքներ եւ բարոյական վեհ սկզբունքներ։

Անկասկած, Նաւասարդեան 30-րդ մարզախաղերու ետին կը կանգնին բանակ մը կամաւորներ՝ ծրագրողներ, կազմակերպողներ, մարզիչներ, իրաւարարներ, մարզիկներ, պատասխանատուներ եւ ծնողներ։ Եւ տակաւին, առանց մոռնալու մարզախաղերու յաջողութեան նպաստած մեր բարերարները, բարեկամները եւ համակիրներու ստուար հատուածը։

Վարձքը կատա՛ր բոլորին։

Քանի մը շաբաթ վերջ Հայաստանի մէջ տեղի պիտի ունենան Համա-Հ.Մ.Ը.Մ.-ական 11-րդ մարզախաղերը, ուր աշխարհասփիւռ Հ.Մ.Ը.Մ.-ական մարզիկներ քով-քովի գալով պիտի ծառայեն նոյն վսեմ նպատակներուն: Խաղերու բացումը Յուլիս 22-ին՝ կը զուգադիպի «Հայ մարզիկի օր»-ուան: Անցեալ տարի Մայիսին տեղի ունեցած միութեան պատմութեան մարզական առաջին առցանց համագումարին, որոշուեցաւ 22 Յուլիսը՝ միութեան հիմնադիր Շաւարշ Քրիսեանի ծննդեան օրը՝ հռչակել «Հայ մարզիկի օր», այնպէս ինչպէս 1982-ին համա-Հ.Մ.Ը.Մ.ական խմբապետական առաջին համագումարը Վարդանանցը հռչակած էր իբրեւ «Հայ սկաուտի օր»։ «Հայ մարզիկի օր»-ը այսուհետեւ ամէն տարի պատշաճ կերպով պիտի նշուի, եւ այս տարուան նշումը 11րդ մարզախաղերու բացումին զուգադիպութիւնը լաւագոյնս կարժեւորէ Օրուան խորհրդանիշը:

Հ.Մ.Ը.Մ. 104-ամեայ իր երթը կը շարունակէ բոլորին մասնակցութեամբ, ամէնուն ներդրումով եւ աջակցութեամբ։ Փոխադարձաբար, Հ.Մ.Ը.Մ. անխտիր կը ծառայէ բոլորին, միշտ բարձրանալու եւ իր հետ իր հարազատ ժողովուրդի զաւակներն ալ դէպի ազգային բարձունքներ բարձրացնելու կամքով ու հաւատքով։

104-ամեայ այս երթին խթան ուժը եղած էր՝

  • Հ.Մ.Ը.Մ.-ի ազգային գաղափարաբանութիւնը,
  • Միութեան ծառայելու կամաւոր փաղանգի ուխտը, եւ
  • Համակիրներու՝ բարոյական եւ նիւթական նեցուկը:

Այս խթան ուժի պահպանութիւնը՝ պիտի երաշխաւորէ Հ.Մ.Ը.Մ.-ի նորանոր ամեակներու եւ բարձունքներու նուաճումին:

 

Բարի երթ Նաւասարդեանի խաղերուն, շնորհաւորութիւններ բոլոր մասնակիցներուն, որոնք այս խաղերը վերածեցին միութենական մեծ տօնի, ազգային խանդավառութեան եւ միութենական ոգեւորութեան եզակի առիթի։

Վահէ Թանաշեան

Հ.Մ.Ը.Մ.-ի Կեդրոնական Վարչութիւն

Happy
Happy
100 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles