0
0
Հ.Մ.Ը.Մ.-ի Արեւելեան Միացեալ նահանգներու 37-րդ Շրջանային Ներկայացուցչական Ժողովը տեղի ունեցաւ Հոկտեմբեր 21-23, 2011, հիւրընկալութեամբ` Փրովիտէնսի Մասնաճիւղի, մասնակցութեամբ` շրջանի տասը մասնաճիւղերու Ալպընիի, Նիւ Եորքի, Նիւ Ճըրզիի, Շիքակոյի, Հարաւային Ֆլօրիտայի, Ուաշինկթընի, Պոսթընի, Տիթրոյթի, Փրովիտէնսի, եւ Ֆիլատելֆիոյ լիազօր ներկայացուցիչներու, Հ.Մ.Ը.Մ.-ի Արեւելեան Միացեալ նահանգներու Շրջանային Վարչութեան եւ Հ.Մ.Ը.Մ.-ի Կեդրոնական Վարչութեան լիազօր ներկայացուցիչներուն, ընդհանուր 45 անդամներ: Խորհրդակցական ձայնով մասնակցողներու շարքին նոյնպէս ներկայ էին, Հ.Յ.Դ. Արեւելեան Շրջանի Կեդրոնական Կոմիտէի ներկայացուցիչը, Հ.Մ.Ը.Մ.-ի Արեւելեան Միացեալ նահանգներու Շրջանային Վարչութեան մնացեալ անդամները, Շրջանային Մարզական յանձնախումբի եւ Սկաուտական խորհուրդի ներկայացուցիչները, ուղեկից կազմակերպութիւններու ներկայացուցիչները եւ հրաւիրեալներ:
Ժողովի բացումը կատարեց շրջանաւարտ Շրջանային Վարչութեան Ատենապետ` Եղբ. Պետիկ Տէր Վարդանեան, որու բարի գալուստի խօսքէն ետք ժողովը ընտրեց իր առժամեայ դիւանը, ատենապետ` Եղբ. Լեւոն Պալեան եւ ատենադպրուհի` Քոյր Արշօ Գանթարճեան: Սոյն ժողովի մնայուն դիւան ընտրուեցան ատենապետներ` Եղբ. Վահէ Թանաշեան եւ Եղբ. Շանթ Ժամկոչեան, ատենադպիրներ` Քոյր Լորիկ Փիլիպոսեան եւ Եղբ. Ստեփան Չիլոյեան:
Ներկայացուցչական ժողովի օրակարգին անցնելէ առաջ, յաջորդաբար խօսք առին` հիւրընկալ Փրովիտէնսի մասնաճիւղի Ատենապետ` Եղբ. Սարգիս Դարբինեան, Փրովիտէնսի Սրբոց Վարդանանց Եկեղեցւոյ Հոգեւոր Հովիւ` Արժ. Կոմիտաս Ա. Քահանայ Պաղսարեան, Հ.Յ.Դ. »Քրիստափոր« Կոմիտէի ներկայացուցիչ` Ընկ. Յակոբ Տոնոյեան, իսկ Շրջանային մակարդակի ներկայացուցիչներէն` Հ.Օ.Մ. Շրջանային Վարչութեան ներկայացուցիչ` Ընկերուհի Մարգրիտ Ստեփանեան, Հ.Ե.Դ. Արեւելեան Շրջանի Կեդրոնական Վարչութեան ներկայացուցիչ` Ընկեր Գէորգ Չաւուշ Մեսրոպեան, որոնք յայտնեցին իրենց բարեմաղթութիւնները սոյն ժողովին: Հ.Յ.Դ. Ամերիկայի Արեւելեան Շրջանի Կեդրոնական Կոմիտէի ներկայացուցիչ` Ընկեր Հրայր Պարոնեան իր խօսքին մէջ նշեց Հ.Մ.Ը.Մ.-ի դերը եւ մարտահրաւէրը հայապահպանման աշխատանքին մէջ, եւ թէ այս ժողովները առիթը կուտան որ Հ.Մ.Ը.Մ.-ը վերամշակէ իր գործունէութիւնները դէպի նորանոր նուաճումներ: Ապա խօսք առաւ շրջանաւարտ Շրջանային Վարչութեան Ատենապետ` Եղբ. Պետիկ Տէր Վարդանեան յայտնելով որ հպարտ կը զգայ որ մաս կը կազմէ այս կազմակերպութեան, եւ շնորհակալութիւն յայտնեց որ այս պատկառելի ժողովը վստահեցաւ այս գործը շրջանային վարչութեան որ պիտի ընտրէ նորընտիր շրջանային վարչութիւնը: Վերջին խօսքը առաւ Հ.Մ.Ը.Մ.-ի Կեդրոնական Վարչութեան ներկայացուցիչ` Եղբ. Հրաչ Մեսրոպեան որ նախ յաջողութիւն մաղթեց Արեւելեան Շրջանի այս պատկառելի ժողովին, ապա շնորհաւորեց շրջանաւարտ Շրջանային Վարչութեան տարած աշխատանքները եւ յայտնեց թէ ներկայացուցիչներու շինիչ առաջարկներով պիտի կարենանք բարելաւել եւ երկարաշունչ ծրագիրներ մշակել դասաւորելու մեր բոլոր աշխատանքներու շարունակականութիւնը:
Ապա ժողովը սկսաւ իր աշխատանքներուն, ու առաջին հերթին ունկնդրեց տասը մասնաճիւղերու միամեայ նիւթա-բարոյական տեղեկագրերը եւ ետքը շրջանաւարտ Շրջանային Վարչութեան երկամեայ գործունէութեան նիւթա-բարոյական տեղեկագիրը:
Համաձայն տեղեկագրերու, շրջանը ունեցած է յաջող գործունէութիւն: Ներկայիս Հ.Մ.Ը.Մ.-ի Արեւելեան Շրջանը ունի.
– 1200-է աւելի անդամ-անդամուհիներ.
– 500-է աւելի գայլիկ, արծուիկ, սկաուտ, արենուշ, պարման եւ պարմանուհիներ.
– 70-է աւելի մարզական խումբեր բաղկացած երկսեռ ոտնագնդակի, վոլի-պոլի, պասքէթի, փինկ-փոնկի, լողի եւ աթլեթիզմի խումբերու, ծիլ, փոքր, կրտսեր, երէց եւ վեթերան դասակարգերու:
Անցնող երկու տարիներուն, շրջանը կազմակերպած է հետեւեալ գործունէութիւնները.
* Մասնաճիւղերու վարչական կազմի դիւաններու երկու խորհրդաժողովներ:
* Մասնաճիւղերու սկաուտական խորհուրդներու երկու խորհրդաժողովներ:
* Շրջանային սկաուտական սեմինարներ:
* Միջ-մասնաճիւղային երկու մարզական խաղեր:
* Շրջանային Սկաուտական երկու Ընդհանուր բանակումներ:
* Հրատարակած 2010-ի եւ 2011-ի գունաւոր ու պատկերազարդ օրացոյցները:
* Մասնակցած Համա-Հ.Մ.Ը.Մ.-ական 8-րդ Մարզական Խաղերուն, Հայաստանի մէջ:
* Մասնակցած Համա-Հ.Մ.Ը.Մ.-ական 8-րդ Սկաուտական բանակումին, Հայաստանի մէջ:
* Մասնակցած է Հ.Մ.Ը.Մ.-ի Պատգամաւորական 10-րդ Ընդհանուր Ժողովին, Ծաղկաձոր, Հայաստանի մէջ:
Ժողովը լսելէ ետք Շրջանային վարչութեան երկամեայ տեղեկագիրը եւ հաշուեկշիռը, հանգամանօրէն քննարկեց կատարուած աշխատանքները եւ հասաւ համապատասխան եզրակացութեան` մատնանշելով այն գործունէութիւնները որոնք բարեփոխութեան կը կարօտին: Ժողովը իր գնահատանքը արտայայտեց Շրջանային Վարչութեան տարած աշխատանքներուն որոնք զգալի նուաճումներ արձանագրած էին 2010 եւ 2011 տարեշրջանին:
Ներկայացուցչական ժողովը մշակեց յառաջիկայ երկամեայ շրջանի մարզական, սկաուտական, կազմակերպչական, նիւթական, Մարզիկ պաշտօնաթերթ, օրացոյց, Հ.Մ.Ը.Մ.-ի կայքէջ եւ Հ.Մ.Ը.Մ.-ի 95-ամեակի 2013-ի գործունէութիւնները եւ աշխատանքները, համադրելով շինիչ առաջարկներ բարելաւելու եւ դիմագրաւելու շրջանիս պահանջքները: Շարունակելով օրակարգը, ժողովը քննարկեց նորընտիր Շրջանային Վարչութեան տարեշրջանի 2012-2013 նախահաշիւը:
Բոլոր հարցերու քննութեան եւ վաւերացումի աւարտին, ժողովը ընտրեց նորընտիր Շրջանային Վարչութիւնը,
բաղկացած հետեւեալ անդամներէ-
Եղբ. Յովսէփ Էրջանեան
Քոյր Արշօ Գանթարճեան
Քոյր Էլիզապէթ Դրամկոչեան
Եղբ. Թորոս Ոսպիկեան
Եղբ. Յովիկ Աբգարեան
Եղբ. Արամ Քայսերեան
Եղբ. Պերճ Փափազեան
Ժողովի աւարտին շրջանաւարտ Շրջանային Վարչութեան ատենապետ, Հ.Յ.Դ. Կ.Կ. ներկայացուցիչ եւ Հ.Մ.Ը.Մ.-ի Կեդրոնական Վարչութեան ներկայացուցիչ գնահատանքի խօսքեր ուղղեցին դիւանին եւ ներկայացուցիչներուն, նոյնպէս բարեմաղթութիւններ, յաջողութիւններ եւ կորովի մաղթանքներ յայտնեցին նորընտիր Շրջանային Վարչութեան:
