0
0
Հ.Հ. նախագահ Արմէն Սարգսեան շնորհաւորական ուղերձ յղեց մը Հայաստանի Անկախութեան տօնի առթիւ․-
«Հայաստանի Հանրապետութեան յարգելի՛ քաղաքացիներ,
Սիրելի՛ հայրենակիցներ,
1991 թուականի այս օրը մենք հրապարակաւ ձեւակերպեցինք ձայնի մեր իրաւունքը: Այսօր որպէս անկախ պետութիւն, մենք վստահօրէն խօսում ենք Իրաւունքի ձայնով:
Մենք ապացուցեցինք, որ երազանքը կարող է իրականութիւն դառնալ: Այսօր ունենք նոր ձգտումներ, որոնք ծնւում են ամէն օր, իւրաքանչիւրիս մէջ: Պէտք է մեզ պատրաստ եւ ունակ զգանք դրանք իրականութիւն դարձնել Նոր Հայաստանում: Այսօրուայ Հայաստանի առաջին ընկալումը պէտք լինի այն, որ այն մի նոր միջավայր է, որը պէտք է ձեւաւորուի իւրաքանչիւրիս կողմից:
Մեզ պարտաւորեցնում են այն մարդկանց յիշատակները, ովքեր իրենց զոհաբերեցին յանուն անկախութեան, ովքեր մօտեցրին այն, բայց չհասցրին տեսնել: Մենք պարտք ունենք նրանց առաջ:
Մեր պատմութեան դասերից մէկն այն է, որ մենք յաղթանակների հասել ենք, երբ միասնական ենք եղել:
Նոր Հայաստանը պէտք է լինի յաղթանակների Հայաստան:
Սիրելի՛ հայրենակիցներ,
Հպարտանալով անցեալով կամ նախկինում ունեցած ձեռքբերումներով` մենք պէտք է աւելի մեծ ոգեւորութեամբ ու ստեղծագործաբար մօտենանք ապագային:
Մեր միտքը եւ կարողութիւնները պէտք է առաջ ընկնեն զգացմունքներից ու մեր երկիրը դարձնեն աշխարհի ընթացքին աւելի համահունչ: Ժամանակը մեզ անընդհատ մղում է առաջ` հասկացնելով, որ որպէս պետութիւն, որպէս ժողովուրդ ուշանալու իրաւունք չունենք: Մենք պէտք է շարժուենք առաջընթացի ճանապարհով` Սահմանադրութեան նկատմամբ անվերապահ յարգանքի, հանրութեան, քաղաքացիական հասարակութեան ինստիտուտների եւ իշխանութեան բոլոր ճիւղերի կողմից պետութեան հանդէպ մեծ պատասխանատուութեան գիտակցումով:
Որպէս Հայաստան-Արցախ-Սփիւռք, մենք մէկ ամբողջութիւն ենք համաշխարհային միջավայրում:
Ուրեմն` ունենք շատ աւելի մեծ ներուժ եւ հնարաւորութիւն, քան պատկերացնում ենք:
Դարձնենք այդ բոլորը մեր յետագայ յաղթանակների շարժիչ ուժը, դարձնենք բոլորս միասին` Հայաստանի բոլոր քաղաքացիներով, աշխարհասփիւռ հայութեամբ, համահայկականութեամբ:
Սիրելի՛ հայրենակիցներ,
Մեր ընտանիքներում սովոր ենք ընտանեկան տօները նշել միասին եւ միասնական: Մեր ազգային տօնը մեր մեծ հայկական ընտանիքի տօնն է, այսօրուայ Հայաստանի Հանրապետութեան ծննդեան օրը, մեր մեծի ու փոքրի, զինուորի եւ աշխատաւորի, մտաւորականի եւ ուսանողի, բոլորիս տօնը:
Շնորհաւորում եմ բոլորիս համազգային եւ համապետական տօնի` Հայաստանի Անկախութեան օրուայ առթիւ: Մաղթում եմ խաղաղութիւն, բարեկեցութիւն, երջանկութիւն եւ լաւատեսութիւն»:
