0
0
Կազմակերպութեամբ Նիւ Եորքի Ս. Լուսաւորիչ Մայր Եկեղեցւոյ Մշակութային Յանձնախումբին, Կիրակի, Հոկտեմբեր 23, 2011-ին, Հայ Մշակոյթի ամսուան ընթացքին տեղի ունեցաւ շահեկան դասախօսութիւն մը եւ վերջերս հրատարակուած “Երկիր 2“ գրքի ներկայացումը: Դասախօսութիւնն ու գիրքը ներկայացուց գանատաբնակ ծանօթ լուսանկարիչ եւ պատկերագրքի հեղինակ` Հրայր Բազէ Խաչերեան:
Կազմակերպիչ Յանձնախումբի անդամները երեկոն կոչած էին “Մեր Եկեղեցիները, Մեր Խաչքարերը, Մեր Յուշարձանները, Մեր Լեռները եւ Մեր Երկիրը“:
Բացման խօսքը կատարեց Եկեղեցւոյ Հոգեւոր Հովիւ` Արժ. Տ. Մեսրոպ Քհնյ. Լագիսեան, որ մանրամասնօրէն ներկայացուց օրուան բանախօսը: Տէր Մեսրոպ ըսաւ. “Կը յիշեմ 14 տարիներ առաջ դարձեալ Հայ Մշակոյթի ամսուան ընթացքին, Թեմիս նախկին Առաջնորդ` Հոգելոյս Մեսրոպ Արք. Աշճեանի հովանաւորութեամբ ներկայացուցինք Հրայրի առաջին հրատարակութիւնը` “Արցախ` Լուսանկարչական Ուղեւորութիւն մը“ գիրքը, եւ այնուհետեւ մենք սերտ յարաբերութիւն ունեցանք
Հրայրի հետ: Հրայր Բազէ անցնող 20 տարիներուն բազմիցս այցելած է Հայաստան, Արցախ, Պատմական Հայաստան, ինչպէս նաեւ Սփիւռքի զանազան երկիրներ եւ քաղաքներ նկարահանելով տեղւոյն հայկական եկեղեցիները, խաչքարերը, յուշարձանները եւ վանքերը, որոնք կը ներկայացնեն հոգեւոր եւ ազգային մեծ արժէքներ: Հրայր Բ. Խաչերեան ցարդ հրատարակած է.
“Արցախ` Լուսանկարչական Ուղեւորութիւն մը“ – (1997)
“Արցախ` 100 Լուսանկարներ“ – (2002)
“Երկիր“ – (2005)
“Ճախրող Բազէն“ – (2005)
“Հայկական Զարդարուեստ“ – (2010)
Արմէն Քիւրքճեանի համագործակցութեամբ “Երկիր 2“ – (2011)“:
Տեսաերիզի վրայ Հրայր ցուցադրեց իր լուսանկարչական ոսպնեակէն առնուած գեղեցիկ պատկերներ, եւ լայն բացատրութիւններ տուաւ իր հետաքրքրական եւ արկածախնդրական ճամբորդութեանց մասին, որոնք ամբողջութեամբ կը ներկայացնեն մեր անցեալի հարստութիւնները:
Վերջաւորութեան ներկաներէն շատեր մակագրուած գիրքերէն օրինակներ իրենց հետ առնելով, գոհունակ սրտով մեկնեցան սրահէն:
Թղթակից
