Հնութիւն Չէ…Այլ Սրբութիւն

0 0
Read Time:1 Minute, 47 Second

SIS18

ՀԱՅՐԵՆԻՔ
Խմբագրական
Օգոստոս 24, 2015

«Հայու քրտինքով ու արիւնով թրծուած կիլիկեան հողին ու յատկապէս Սիսի պատմական Կաթողիկոսարանի միւռոնաբոյր հողին վրայ կանգնած՝ մեր դարաւոր Կաթողիկոսարանին վերադարձը կը պահանջենք եւ մեր ժողովուրդի պահանջատիրութիւնը կը վերահաստատենք, հաւատարիմ նահատակներու սրբազան կտակին»
Մեծի Տանն Կիլիկիոյ Արամ Ա. Կաթողիկոս

Սիսի պատմական կաթողիկոսարանը լոկ հնութիւն մը չէ…այլ սրբութիւն:
Աւերակի վերածուած, տարիներ շարունակ անտէր ու անտիրական, նաեւ խոպան այս կաթողիկոսական համալիրը աղիողորմ վիճակի մէջ է:
Համայնատեսարանը ցոյց կու տայ թէ ինչպիսի կառոյց մը եղած է Նոր Վանքը…: Տեղւոյն բնակչութիւնը այդպէս անուանած էր Սիսի պատմական Կաթողիկոսարանը, որ նախապէս Կիլիկեան թագաւորութեան օրերուն, 13-րդ դարաշրջանին կառուցուած էր իբրեւ թագաւորական պալատ՝ Հեթում Ա.-ի (1226-1269) կողմէ, օժտուելով իր սեփական Սուրբ Սոֆիա տաճարով:
Նոր վանքին, այսինքն Կաթողիկոսարանին կառուցումը մտայղացումն էր Կիրակոս Ա. Աջապահեան կաթողիկոսին։ Այս վիթխարի շինարարական աշխատանքներուն ազդանշանը տրուեցաւ 19-րդ դարաշրջանի սկիզբները, եւ տեղագրական աշխատանքները ցոյց կու տան թէ նորակառոյց սրբատեղին հաստատուած է թագաւորական տարիներու Սուրբ Սոֆիա տաճարի աւերակներուն վրայ։ Առ այդ, պարզ զուգադիպութիւն մը չէ, որ նորակառոյց տաճարն ալ կը կոչուեցաւ Սուրբ Սոֆիա:
Պեղելով այս համայնատեսարանը եւ յաւելեալ պրպտումներ կատարելով, տեղին է նշել այս Կաթողիկոսարանի համալիրին մանրամասն նկարագրութիւնը, կատարուած Սահակ Բ. կաթողիկոսին (մանրամասնօրէն նշուած «Յուշամատեան» կայքէջին մէջ) կողմէ 20-րդ դարասկիզբին.-
Այսպէս, հիւսիսային դռնէն մտնելով, ձախին կը տեսնենք քարաշէն մարագ մը եւ ախոռ մը։ Ասոնցմէ քիչ անդին կայ երկյարկանի տուներու փոքր թաղամաս մը, որ կը ծառայէ իբրեւ ուխտաւորներու հիւրանոց։ Այս վայրին ղամըշլը (եղեգնուտ) անունը կու տան, նկատի ունենալով որ սենեակները իրարմէ կը բաժնուին եղեգեայ պատերով։ Այս թաղին արեւմուտքը կը գտնուի վանքին խոհանոցը՝ իր մառանով եւ փուռով։ Աւելի հարաւ երթալով կը հասնինք դարպասին, որ երեք կամարներով փայտածածկ երկար սենեակ մըն է։
Շարունակելով պատմութիւն կերտած համալիրին ուղեւորական այցելութիւնը եւ դէպի հարաւ ուղղուելով կը նկատուի վեհարանը, իր իւրայատուկ կառոյցով, որ օժտուած էր ճաշասենեակով, մառանով եւ կաթողիկոսին ննջասենեակով: Ամբողջութեամբ փայտեայ կառոյց մըն էր վեհարանը, ուրկէ ընդհանուր տեսարան մը կը բացուի քաղաքին վրայ:
Այսօր, ժամանակը հնչած է վերստին տէր կանգնելու այս հսկայ սրբատեղիին, զայն ձեռք ձգելու համար՝ մաքառելու, մաքրելու եւ մաքրագործելու:
Թէ՛ հողին եւ թէ՛ անոր դատին վրայ, շատ են փուշերն ու տասնեակ տարիներ լքուած եւ չխնամուած բոյսերը:
Թէ՛ հողագործին եւ մշակին բահով ու բրիչով եւ թէ՛ դատաւորին ու փաստաբանին արդարութեան մուրճով ՊԱՀԱՆՋԱՏԻՐՈՒԹԻՒՆ եւ ՀԱՏՈՒՑՈՒՄ կայ իրագործուելիք:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles