ՀԻՒՍԻՍԱՅԻՆ ՊՈՂՈՏԱՅԻ ՎՐԱՅ՝ ԿԵԴՐՈՆԱԿԱՆՑԻԻՆ ՀԵՏ

0 0
Read Time:1 Minute, 51 Second

            Արմենակ եւ Էլպիս Երեւան են: Արմենակ Թովմաս առաքեալին պէս է. հաւատալու համար պէտք է տեսնէ: Հայաստան ցոյցեր կային: Ժամադրուեցանք: Պերճ Հիւսիսային Պողոտայի պերճ սրճարանի մը մայթին վրայ տեղ գտանք եւ բաժակ մը սուրճի շուրջ սրտցաւութեան մեր անաւարտ զրոյցները շարունակեցինք:

            – Մակա՛ր, նայի՛ր շուրջդ, դիտէ՛ փողոցի ամբողջ երկայնքով վեր-վար քալող բազմութիւնը, կարծես կը գտնուիս Ֆրանսայի, Իտալիոյ կամ Սպանիոյ զբօսաշրջային ծովափը: Ըսին որ ցոյցեր կային, դժգոհութիւններ: Հոս, վերջին նորաձեւութիւններով եւ արտառոցութիւններով պճնուած  երջանիկներ ման կու գան:

            – Ճիշդ ես:

            – Կը հաւատա՞ս, որ Հանրապետութեան հրապարակի կառավարութեան շէնքին առջեւ կամ Օփերայի Ազատութեան հրապարակի բարձրախօսներով գոռացողներու բազմութիւնը եւ մեր առջեւէն տողանցողները նո՞յն երկրի քաղաքացիներ են:

            Էլպիս առանց հայեացքը անցորդներէն հեռացնելու, ըսաւ.

            – Կը թուի թէ այս պողոտան վարձած են եւրոպական եւ ամերիկեան նորաձեւութեան տուները: Շորերու այլազանութեան տողանցք կայ: Ի զուր չէ, որ մեր դրացի տնտեսագէտ Ապրամը ըսաւ, որ Հայաստան շատ դրամ կայ: Եւ աւելցուց, թէ ինք չէ հասկցած, թէ ինչպէ՞ս:

            Արմենակ շարունակեց.

            – Իմացած ես, որ Մայիս 1-ին մեծ ցոյց տեղի պիտի ունենայ կառավարական շէնքին առջեւ, որ միշտ պաշտպանուած է բանակ մը ոստիկաններով: Երթի ցոյցերն ալ միշտ պաշտպանուած-օղակուած էին ոստիկանական բազմամարդ ջոկատներով:

            – Արմենա՛կ, հակառակ շռայլութիւններու, զանգուածը դժուար կ’ապրի, յաճախ թշուառութեան մէջ, երէցներու թոշակները չնչին են, հեռու իշխանութիւններու պերճանքներէն: Կը գումարուին պարտութիւնը եւ անոր հետեւանքները: Կացութիւնը այնպէս է, որ կարծես Հայաստան ամէն օր կը պարտուի, անոր կը պարտադրուին զիջումներ:

            – Ճիշդ ես, պարտութեան հետեւող բնական իշխանափոխութիւնը կը պահանջեն: Հանրութեան մէկ մասը կրաւորական է, ընդարմացած է այն քարոզչութեամբ, որ ասոնք ղրկե՞նք որ թալանչիները գան: Կարծես մարդիկ չեն տեսներ, որ հայրենիք կը կորսնցնեն, հող կը կորսնցնեն: Ոմանք նոյնիսկ համոզուած են, որ զիջուող հողերը մեզի չէին պատկաներ, մենք գրաւած ենք:

            Լուռ հետեւող մտահոգ Մակարուհին մենախօսելու պէս ըսաւ:

            – Եթէ Մայիս 1-ին բողոքող բազմամբոխ զանգուածը յարձակի Կառավարական Շէնքին վրայ, եթէ բախում տեղի ունենայ զինուած ոստիկանական ջոկատներուն հետ, ի՞նչ պիտի ըլլան հետեւանքները:

            – Գիտէք ի՞նչ, նախկին խորհրդային բոլոր հանրապետութիւններուն մէջ եղան քաղաքացիական կռիւներ: Հայաստան զերծ մնաց նման աղէտէ: Կը խորհիմ, որ այնտեղէն մենք ալ պէտք է անցնէինք խաղաղելու համար,- ըսաւ քաղաքական կուրու Կեդրոնականցին:

            Ժամանակը կը յառաջանար: Բարձրացանք Հիւսիսային պողոտայով, գացինք Օփերայի շէնք, որուն շուրջ բաձրախօսներու աղմուկով երկու հանրաժողովներ կային:

            Փորձութիւններու նախօրեակներ են:

            – Երկիրը պարտութեան առթած երկփեղկումով եթէ մնայ, կը դատապարտուի անվերականգնելի փլուզման,- եզրակացուց Կեդրոնականցի իմաստունը, երբ բողոքողներու մէջ էինք:

 

Մակար ի Գաղիա, 28  Ապրիլ 2022

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post ՀԱՅԱՍՏԱՆԸ ՀԱՅՈՒՆ ՀԱՅՐԵՆԻՔՆ Է, ՆԱԵՒ՝ ՍՓԻՒՌՔԱՀԱՅՈՒՆ
Next post «Ասբերին»․․․Օրհնեա՞լ, Թէ Ոչ՝ Անիծեալ…

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles