ՀԷ՜Յ ՀԷ՜Յ, ՀԱՅ ԹԱՀԴԻ ՊՐԱԿՏԻԿԱՆՏՆԵՐՈՒ ՄԱՍԻՆ ԻՄԱՑԷ՛Ք, ՏԳԷՏ ՄԻ՛ՄՆԱՔ ԵՒ ՊԱՇՏՊԱՆՈՒԵՑԷ՛Ք

1 0
Read Time:2 Minute, 8 Second

 

            Կեդրոնականցին եկաւ եւ սեղանին դրաւ համակարգիչի տպիչէն ելած էջեր: Աչքիս չհաւատացի: Արմենակ լուռ զիս կը դիտէր:

            Արցախէն ետք, այս անգամ հայերէնը ենթարկուած էր ֆոսֆորային ռումբերու յարձակման՝ իւրայիններու կողմէ:

            Մեսրո՛պ իմ: Զառանցանք: Գրուած էր.

            «Հայ Թահդը ազգի մայրաքաղաքում. հանդիպեք 2022 թվականի ANCA-ի ամառային պրակտիկանտներին, 21 հուլիսի, 2022 թ

Համայնքում, Վերջին Նորություններ Լավագույն պատմություններ    Չհասկցայ՝ «ո՞ր ազգի մայրաքաղաքում»… Էջեր եւ էջեր: Արմենակ հարցուց. «Հասկցա՞ր»: Էջերը արագօրէն ընթերցելէ ետք, հասկցեր էի. կը զեկուցուէր ՀԱՅ ԴԱՏի աշխատանքներու մասին:

            – Ո՞ւր գտար այս էջերը,- հարցուցի:

            – Սեղմեցի համացանցի «ասպարէզ»ը, թերթը կարդալու համար, յայտնուեցաւ անգլերէն էջ մը, անկիւնը գրուած էր «anglais  –  arménien», սեղմեցի «arménien»ը: Բացուեցան հայատառ էջեր, ինչպէս՝ «Ամերիկայի Հայ Դատի Յանձնախումբի տասնչորս Յանձնախումբի» եւ անուններ Ի՞նչ հասկնալ, տասնըչորս յանձնախումբե՞ր, թէ՞ յանձնախումբի տասնըչորս անդամներ»: Անուններ՝ պրակտիկանտներու, սովորող ըլլալ տգիտութիւն է:

            – Այս «ասպարէզ»ը Ամերիկայի միակ հայերէն օրաթերթի կա՞յքն է:

            – Դուն պէտք է գիտնաս: Մամուլի մարդիկ բարեկամներդ են:

            Շարունակեցի ընթերցումը: Նոյն էջին վրայ ազգանունները տեղ մը …ԵԱՆ էին, անդին՝ …ՅԱՆ: Քեսապցիներու ՍԱՂՏԸՃԵԱՆը յանկարծ դարձեր է ՍԱՂՏԷՃԵԱՆ… Ապա կը տիրէր Մակինցեանի դեկրետով օրինակացուած ԱՐԴԻ ուղղագրութիւնը, Մելքոնեանի, Համբարեանի եւ Երիմեանի ԵԱՆերը կը փոխարինուէին ՅԱՆերով: Չհասկցայ, թէ ի՞նչ կը նշանակէր ANCAի ստորագրված ամառային ծրագրերը: Ո՞ր լեզուէն թարգմանուած էր, թէ՞ ամենագէտ համակարգիչը այդ ըրած էր: Չհասկցայ, թէ ի՞նչ էր հնարաւորութիւններու լայն տեսականին, սուպերմարկետները ունին ապրանքներու տեսականի, ի՞նչ էին ստորագրված ծրագիրների տեսականիները…

Նորարարութեամբ՝ հայ Ստեփանը դարձեր էր Ստեֆան:

«…հզորացնելով նրանց որպես Հայ Թահդի արդյունավետ ակտիվիստներ…»:   «Հայ Թահդը» ունեցեր է նաեւ փաստաբան»… «Պրակտիկանտ» մը… Լոս Անջելեսի Կալիֆոռնիայի համալսարանի բարձրացող կրտսեր ուսանող է…»: Ուզեցի գիտնալ, թէ իջնող ուսանող ալ կա՞յ: Նորարական ուղղագրութեամբ ԱՇՈՏ ԵՐԿԱԹը դարձեր էր ԱՇՈՏ ԵՐԳԱԹ…. Եւ ուսանող մը կ’աւարտէ իր  բակալավրիատը…

Ապա կը հանդիպիք «Հայ դատ»ին, որ փոխարինած է «ՀԱՅ ԹԱՀԴ»ը…

Ազգանուն դարձած հայերէն «ԺԱՄԿՈՉ»ը դարձեր է «ՋԱՄԳՈՉԵԱՆ»…

            Մակարուհին սուրճ հիւրասիրեց պրըթոն կարկանդով եւ իր քաղած մեղրահամ թուզերը սեղանին վրայ դրաւ:

            Կեդրոնականցին բարձրաձայն մտածելով ըսաւ. «Լոս» անթիւ գրոց-բրոցներ կան, ղեկավարներ, սրբազաններ, հրապարակագիրներ: Չե՞ն տեսներ այս էջերը: Եթէ տեսած են եւ կը լռեն, մեղսակից են մայրենիի աւերին, զայն մորթազերծ կ’ընեն աբեղեանական, սովետահայերէնի, եւ կոմպիւտըր-ինտերնետի բութ դանակով: Գրէ՛ բարեկամներուդ: ՀԱՅ ԴԱՏԸ դարձնելով ՀԱՅ ԹԱՀԴ, վանեցին պիտի ըսէ՝ ՀԱՅ ԹԱԽՏ, ԹԱԽՏԻ ԱԹՈՌ՝ սիրողներու համար, անոնց համար, որոնք Հայաստանը որպէս ձորձ ձգելով, իրենց հետ բերած են Աբեղեանը եւ սովետի բարբառը՝ որպէս դրամագլուխ:

            Ի՞նչ անուն տալ ծափահարողներուն:

            Արմենակ բաժակի վերջին կաթիլը կուլ տուաւ եւ հրաժեշտի փոխարէն ըսաւ.

            – Չմոռնաս գրելու գրոց-բրոց ընկերներուդ: Ճառի եւ դամբանականի փոխարէն այս մասին թող գրեն եւ խօսին:

            Կեդրոնականցին Տոն Քիշոթ է, առանձին վազող ձի, որ օր մը պիտի յոգնի…

 

Մակար ի Գաղիա, 23 Յուլիս 2022

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles