Հաւա՞ք Թէ Ընտրարշաւ

0 0
Read Time:2 Minute, 6 Second

p1
ՀԱՅՐԵՆԻՔ
Խմբագրական
Հոկտեմբեր 6, 2015
Թուրքիոյ սահմանադրութեան 103-րդ ենթագլուխին մէջ յստակօրէն նշուած է երկրի նախագահին երդման եւ անոր գործելաձեւին մասին: Այդ յօդուածին մէջ, մանրամասնօրէն կը բացատրուի թէ, նախագահը երբեք չկրնար իր պաշտօնը օգտագործելով «լծակներ» գործի լծել, թէ՛ նիւթական եւ թէ՛ բարոյական բնագաւառներէն ներս եւ ի շահ իր հաշիւներուն քարոզչական աշխատանքներ, հաւաքներ եւ լոպիինկ կատարել:
Դժբախտաբար այս է որ պատահեցաւ Կիրակի Հոկտեմբեր 4, 2015-ին Սթրազպուրկի Քլեպըր հրապարակին վրայ, ներկայութեամբ աւելի քան 12 հազար «Էրտողանական» համակիրներու: Իր «Սուլթանամետ» ոճով, նախագահ Էրտողան եւ իր քարոզչական մեքենան խորամանկ քայլերով գործի լծուած են, ոտնակոխ ընելով վերոյիշեալ սահմանադրութեան ենթագլխին հաստատումները: «Միակամ Ձայն՝ Ահաբեկչութեան Դէմ» նիւթն է որ կ՛արծարծէ Էրտողան, շրջելով Եւրոպական զանազան քաղաքներ: Սակայն, իրականութեան մէջ, իր ընտրական մեքենան է որ կը գործէ համագործակցելով իր մօտիկ գործակից, եւ «Արդարութիւն եւ Բարգաւաճում» Կուսակցութեան գործընկեր՝ վարչապետ Ահմետ Տաւութողլուի հետ:
Այդ նիւթը արծարծող հաւաք մը կատարուած էր Սեպտեմբեր 22-ին, Պոլսոյ մէջ եւ այդ ահաբեկչութեան դէմ պայքարելու նիւթին ընդմէջէն,ան շեղած էր նիւթէն եւ յայտարարած էր թէ, իրեն համար Թուրքիոյ խորհրդարանը պէտք է որ բաղկանայ միայն ու միայն «տեղացի» երեսփոխաններէ: Էրտողանի թիրախն էր քրտամէտ Ժողովուրդներու ժողովրդավարական կուսակցութիւնը, որ խորհրդարանէն ներս ունի ութսուն աթոռ եւ կը հանդիսանայ լուրջ խոչընդոտ մը՝ իր ապագայի մութ հաշիւներուն:
Միեւնոյն յանկերգն է որ կրկնուեցաւ Սթրազպուրկի մէջ: Սակայն հոս տեղին է,նշել վայրին եւ պայմաններուն կարեւորութիւնը: Այդ հաւաքը դիպուկ ձեւով կազմակերպուած էր Ալզասի մայրաքաղաքին մէջ, ուր կը գտնուին Եւրոխորհրդարանի ենթայանձնախումբերու կարեւոր գրասենեակներ: Ահաբեկչութեան դէմ պայքարի ետին պահուըտելով, Էրտողան ժամանած էր իր մտահոգութիւնները դրսեւորելու:
Տեղւոյն փոքրամասնութիւները՝ քիւրտ, ալաուի, այլախոհ թուրք թէ հայ չմնացին ձեռնածաւալ: Այլ, անոնք ալ դիմեցին բողոք-ցոյցի, յստակօրէն արտայայտուելով թէ էրտողան Սթրազպուրկ ժամանած է իր Սուլթանական մտայղացումները բացայայտելու, եւ պարզապէս քուէ մուրալու՝ փոխանակ ահաբեկչութեան դէմ պայքարին:
Ֆրանսային եւ Ֆրանսացիին համար յստակ էր Էրտողանի միտք բանին:
Այսպէս, Էրտողան շարունակելով իր սահմանադրական խախտումը, գումարներ կը մսխէ կազմակերպելով ընտրարշաւներ: Հետաքրքրական է մօտէն հետեւիլ այդ հազարաւոր համակիրներու շարժումներուն: Թէ անոնք ինչպէ՞ս ժամանակ կը տրամադրեն եւ երբեմն հեռաւոր վայրերէ կը ժամանեն:
Անշուշտ նմանօրինակ գործելաձեւ կարելի չէ պարտադրել ամենուրեք: Հետեւաբար անակնկալ մը չեղաւ, երբ քանի մը օր առաջ Պելճիքայի մայրաքաղաք Պրիւքսէլի (այլ կարեւոր նշանակութիւն ունեցող քաղաք մը) քաղաքապետութիւնը մերժեց Էրտողանի ընտրարշաւի քարոզչական մեքենային առաջարկը, հաւաքի մը համար վարձելու քաղաքի վիթխարի սրահներէն մէկը, որ կ՛ընդունի 18 հազար հանդիսատես:
Քաղաքապետութեան համար յստակ էր չընդառաջելու պատճառը: Առ հասարակ, այդ սրահը կը տրամադրուի միայն գեղարուեստական եւ մշակութային բնոյթ ունեցող ձեռնարկներու եւ ո՛չ ընտրարշաւի: …Այսինքն կարելի է այդ սրահին մէջ ցուցադրել այլախոհ Ֆաթիհ Աքինի «Տը Քաթ»ը, կամ աւելի ծայրայեղ առճակատում չյառաջացնելու համար, բեմադրիչ Նուրի Պիլկը Չեյլանի Թուքիան եւ իր լուրջ ցաւերը ամենայն հարազատութեամբ ներկայացնող ժապաւէններէն փունջ մը:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post Եւրոպայի Մէջ.- ՑՈՅՑ՝ ԷՐՏՈՂԱՆԻ ԱՅՑԵԼՈՒԹԵԱՆ ԱՌԹԻՒ
Next post Արեւելեան Շրջանի Հայ Դատի Յանձնախումբը Կը Պարգեւատրէ Ֆեթհիյէ Չեթինը

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles