0
0
ԵՐԵՒԱՆ.- Նոյեմբեր 22-ին տեղի ունեցաւ Հաւաքական Անվտանգութեան Պայմանագիրի Կազմակերպութեան (ՀԱՊԿ) անդամ երկիրներու արտաքին գործոց նախարարներու, պաշտպանութեան նախարարներու եւ անվտանգութեան խորհուրդներու քարտուղարներու միացեալ նիստը:
Ընդհանուր քարտուղար Սթանիսլաւ Զաս յայտարարած է, որ կովկասեան շրջանին մէջ դրական դեր ունին Հայաստանի կառավարութեան եւ միւս մասնակիցներու` խաղաղութեան համաձայնութիւններուն, սահմաններու իրաւական ձեւակերպման, փոխադրամիջոցային հաղորդակցութիւններու ապա շրջափակման հասնելուն ուղղուած ջանքերը:
Հայաստանի Հանրապետութեան վարչապետ Նիկոլ Փաշինեան նիստի բացման իր խօսքին մէջ յայտնեց. «Վերջին երկու տարիներուն ընթացքին ՀԱՊԿ-ի անդամ երկիր Հայաստանը առնուազն երեք անգամ Ատրպէյճանի կողմէ յարձակումի ենթարկուած է: «Կը տխրեցնէ այն փաստը, որ Հայաստանի` ՀԱՊԿ-ին անդամակցութիւնը չզսպեց Ատրպէյճանը յարձակողական գործողութիւններու դիմելու ընթացքին, եւ առաւել եւս, որ, ըստ էութեան, մինչեւ այսօր մենք չենք կրցած որոշում կայացնել ՀԱՊԿ-ի` Հայաստանի վրայ Ատրպէյճանի յարձակումին արձագանգի վերաբերեալ: Այս փաստերը հսկայ վնաս կը հասցնեն ՀԱՊԿ-ի համբաւին թէ՛ մեր երկրին մէջ, թէ՛ անկէ դուրս, եւ ես ասիկա կը նկատեմ ՀԱՊԿ-ի մէջ Հայաստանի նախագահութեան հիմնական ձախողութիւնը»:
Ռուսիոյ նախագահ Վլատիմիր Փութին իր կարգին յայտնեց. «Յոյս ունիմ, որ Հայաստանի եւ Ատրպէյճանի միջեւ խաղաղութեան համաձայնագիրը պիտի ստորագրուի»: Ան նշեց, որ հայ-ազրպէյճանական տագնապի լուծումը ՀԱՊԿ-ի ուշադրութեան կեդրոնն է:
