Հանրահաւաք Կոռնիձորի Մէջ

Այսօր, մայիսի 20-ին Կոռնիձորի մէջ տեղի ունեցաւ «Կամաւորական շարժում»-ի  նախաձեռնած բազմահազարանոց հանրահաւաքը, որուն կը  մասնակցէին Հայաստանի տարբեր մարզերէն եւ Երեւանէն ժամանած քաղաքացիներ, քաղաքական- հասարակական գործիչներ:

Հանրահաւաքը սկսաւ Սիւնեաց թեմի հոգեւորականներու օրհնութեամբ եւ Տէրունական աղօթքով:

Ելոյթներ ունեցան Սիսական գունդի հրամանատար Աշոտ Մինասեանը («Աշոտ երկաթ»), Հ.Յ.Դ. երիտասարդականի կեդրոնական վարչութեան նախագահ Գոռ Սարգսեանը, «Համախմբում» շարժման խորհուրդի անդամ Աւետիք Չալապեանը,Հ.Յ.Դ. Բիւրոյի անդամ Արմէն Ռուստամեանը, «Կամավորական շարժում»-ի  նախագահ Հրանտ Մարգարեանը։

Հանրահաւաքի աւարտին հնչեց ուղերձ՝ ուղղուած հայութեան եւ ի լուր աշխարհին:

Նշենք, որ նոյն ժամանակ Արցախի մէջ նոյնպէս երթ եւ հանրահաւաք տեղի ունեցաւ՝  իբրեւ աջակցութիւն Կոռնիձորի հանրահաւաքին: Արցախցիները՝ Ստեփանակերտի Զինուորական Պանթէոնէն քայլերթով ուղղուեցան դէպի Արցախը Մայր Հայաստանին կապող ճանապարհի Զառին բաղ կոչուող տեղամաս։

Մարգարեան 106,5 լրատուական ձայնասփիւռի «Թարմ ուղեղով» հաղորդաշարին հետ հարցազրոյցի մը ընթացքին, Մարգարեան ըսաւ. «Մեզի համար կարեւորը ցոյցն է. որ մենք սահմանին վրայ բողոքի ձայն կը բարձրացնենք եւ կ՛ըսենք, որ այն ինչ որ կ՛ուզէք մեզի պարտադրել, մեր կողմէ անընդունելի է: Ատիկա իւրայատուկ հանրահաւաք է, մեր վճռականութիւնն ու կամքը դրսեւորող հանրահաւաք: Գալը եւ ներկայ գտնուիլը հայրենասիրական մեծ քայլ է: Եւ ես կ՛ուզեմ նախ բոլորը եւ մասնաւորաբար Ղարաբաղի մէջ կռուած, ազգային ազատագրական պայքարին մասնակցած տղաները այնտեղ ըլլան: Հանրահաւաքը խորհրդանշական է այն առումով, որ անիկա պէտք է բան մը փոխանցէ թէ՛ իշխանութիւններուն, թէ՛ ընդդիմութեան, թէ՛ քաղաքական ուժերուն, թէ՛ մշակոյթի գործիչներուն, թէ՛ Ղարաբաղի ժողովուրդին եւ ամէնէն կարեւորը՝ Ազրպէյճանին, որ այս ձեւով ձեռք բերուած քու խաղաղութիւնդ պիտի մնայ կոկորդիդ: Դուն այնքան գին պիտի վճարես ատոր համար, որ պիտի երազես՝ երանի թէ չունենայի այս յաջողութիւնը: Մենք ասոր պէտք է հասնինք: Եւ այս է ակնկալիքը մեր ժողովուրդէն, որ գան զինուորի նման, հայրենասէրի նման, գան հայրենիքի նկատմամբ պարտք կատարելու գիտակցումով, գան րոպէական արդիւնք չակնկալելով, բայց կարեւոր գործի մը սկիզբ դնելու հաւատքով»: