Հայ Դատի «Արամեան Տուն»ի Բացման Հանդիսութիւն

0 0
Read Time:3 Minute, 9 Second

p8-9 haytad-Aramian-House1
ՈՒԱՇԻՆԿԹԸՆ.- Փրովիտենս (Րոտ Այլընտ) քաղաքին մէջ հաստատուած Արամեան ընտանիքը տարիներով հանդիսացած է Ամերիկայի Հայ Դատ յանձնախումբին զանազան ծրագիրներու առատաձեռն նուիրատուներէն մէկը, միեւնոյն ժամանակ, նաեւ, շարունակ օժանդակելով Հայաստանի եւ Սփիւռքի զանազան շրջաններու մէջ իրականացուող մարդասիրական նախաձեռնութեանց: Հայոց Ցեղասպանութենէն վերապրած Ղազար եւ Նուարդ Արամեաններու ժառանգորդները, Միացեալ Նահանգներ հաստատուելէ ետք՝ հետեւողական ջանք թափած են իրենց զաւակներուն մօտ հայութեան եւ հայ մշակոյթին նկատմամբ սէրը միշտ վառ պահելու համար:
Արեւելեան Ամերիկայի Հայ Դատի յանձնախումբի «Վահան Քարտաշեան» անուան մրցանակը 2008-ին շնորհուած էր Մարթա Արամեանին: Ան արժանացած է նաեւ Արեւելեան թեմի Ազգային Առաջնորդարանի «Զապէլ Թագուհի» մրցանակին:
Մարթա Արամեանի աջակցութեամբ, Հայաստանի Վանաձոր քաղաքին մէջ կարելի եղած է հաստատել երեխաներու, տարէցներու եւ երիտասարդներու յատուկ կեդրոններ, իսկ Փրովիտենսի մէջ, ան իրականացուցած է Հայկական ժառանգութեան զբօսայգի մը կառուցելու ծրագիրը՝ զայն նուիրելով քաղաքին:p8-9 haytad Aramian_ribboncuttingp8-9 haytad kanayan_

Արամեան ընտանիքը գլխաւոր հովանաւորը հանդիսացած էր 2011ին կայացած Ամերիկայի Հայ Դատի յանձնախումբի «Հայկական Հարց 2.0» խորհրդաժողովին ու գումարներ յատկացուցած է Ուաշինկթընի մէջ Ամերիկայի Հայ Դատի կեդրոնատեղիի չորրորդ յարկի «Արամեան» խորհրդաժողովի սրահը մէջտեղ բերելու նպատակին, միաժամանակ գումարներ յատկացնելով նաեւ հայ երիտասարդուհիներու կրթական ծրագիրներուն եւ Քոնկրէսի շէնքին մէջ Հայկական Հարցին առնչուող քաղաքական հաւաքներ իրականացնելու համար:
Վերջերս կատարուեցաւ Ուաշինկթընի մէջ գտնուող Հայ Դատի «Արամեան Տուն» կեդրոնի բացման հանդիսութիւնը:
Սոյն կառոյցը պիտի ըլլայ Ամերիկայի Հայ Դատի յանձնախումբին կողմէ երիտասարդութեան համար նախաձեռնուած գլխաւոր միջոցառումներուն՝ Լէօ Սարգիսեանի անուան ամառնային վարժողական ծրագիրի եւ Յովիկ Աբօ Սաղտճեանի անուան «Քեփիթըլ Կէյթուէյ» ծրագիրի կեդրոնատեղին։ Շէնքը մնայուն կեդրոնը պիտի ըլլայ նշեալ ծրագիրներուն մասնակցող ուսանողներուն, որոնք Ուաշինկթըն կու գան քաղաքական, լրատուական կամ հանրային սպասարկութեան ասպարէզներուն մէջ իրենց առաջին քայլերը առնելու համար:
Բացման արարողութեան ընթացքին ելոյթ ունեցան նաեւ Ամերիկայի Հայ Դատի յանձնախումբի հիմնադրամի նախագահ Քեն Խաչիկեան եւ գանձապահ Քրիս Հեքիմեան, որոնք, իրաւաբան Լոռի Սինանեանի եւ կալուածավաճառ Ճան Ճերիքեանի կողքին, կարեւոր դերակատարութիւն ունեցած էին շէնքը գտնելու եւ գնելու աշխատանքին մէջ։p8-9 haytad Semerjian_Aramian
Հայ Դատի յանձնախումբի ատենապետ Ռաֆֆի Համբարեան, խօսք առնելով, ըսաւ.- «Ամերիկայի Հայ Դատի յանձնախումբի «Արամեան Տուն»ը անկիւնադարձային իրագործում մըն է եւ յաւելեալ փաստ մը, որ Հայ Դատը աննկուն կերպով նուիրուած է մեր համայնքի ապագայ ղեկավարներուն, յատկապէս՝ համալսարանական եւ նոր շրջանաւարտ ուսանողներուն զօրակցելու նախաձեռնութեանց իրականացման»:
Մարկօ Արամեան-Ռական արտասանած իր խօսքին մէջ, կրկնելով իր հօրը՝ Ղազարի խօսքը.- «Եթէ մենք չընենք, ապա ո՞վ պիտի ընէ: Մեզի համար ուրախութիւն է աջակցիլ այս ծրագիրին, որուն միջոցաւ ծանօթացած ենք ամերիկահայ երիտասարդութեան լաւագոյն ներկայացուցիչներուն: Անոնք մայրաքաղաք ժամանած էին աշխատանքի առիթներ գտնելու համար։ «Արամեան Տուն»ը նոր էջ մը կը բանայ այս ծրագիրի պատմութեան մէջ՝ դառնալով ծրագիրին մնայուն տունը։ Վերջապէս, ներկայութիւնը ուժ է, իսկ ուժը ներկայութեան մէջ է»։
Բացման պաշտօնական արարողութեան կողքին, շաբաթավերջին տեղի ունեցան նաեւ երիտասարդական ծրագիրներու ի նպաստ շարք մը այլ ձեռնարկներ։ Արդարեւ, Հայ Դատի անդամներն ու համակիրները Հայ Դատի երկարամեայ հովանաւորներ տոքթ. եւ տիկին Հրանդ եւ Թինա Սեմերճեաններու բնակարանին մէջ առիթը ունեցան տօնելու այս իրագործումը եւ քննարկելու Հայ Դատի գործունէութեան ծիրն ու հասողութիւնը ընդարձակելու կարելիութիւնները։ Մասնակիցները նաեւ Միացեալ Նահանգներու մօտ Հայաստանի դեսպանատան մէջ դեսպան Գրիգոր Յովհաննիսեանի հետ ունեցան հանդիպում մը, որուն ընթացքին երկրի քաղաքական եւ ընտրական վերջին նորութիւններուն մասին տեղեկութիւններ հաղորդեց «Փոլիթիքօ»ի քաղաքական հարցերու գլխաւոր խմբագիր Չարլի Մահտեսեան։
Միացեալ Նահանգներու զանազան շրջաններէն ժամանած Հայ Դատի յանձնախումբի ղեկավարներ, բարեկամներ եւ հանրային քաղաքականութեան մարզէն ամերիկահայ արհեստավարժներ միասնաբար մասնակցեցան այս հանդիսութեան:
Երիտասարդ հանգուցեալ գործիչ Յովիկ Աբօ Սաղտճեանի անուան «Քեփիթըլ Կէյթուէյ» ծրագրի գծով, իր հայրն ու քոյրը՝ Աբօ եւ Նայիրի վերջին տասնամեակին աւելի քան 25 հազար տոլար գոյացուցած են յաչս այս ծրագրին։p8-9 haytad Saghdejian_Aramian_Hachikian
«Այս տունը եւ երիտասարդական սոյն երկու ծրագիրները կու գան հաստատելու, թէ երիտասարդութեան գործօն մասնակցութիւնը յոյժ կարեւոր է Հայկական Հարցի ապագային համար։ Վերջապէս, նոր սերունդը Ամերիկայի Հայ Դատի յանձնախումբին կարողականութեան կարեւորագոյն աղբիւրն է», շեշտեց Նայիրի Սաղտճեան։ Հայ Դատի յանձնախումբի օրէնսդրական հարցերու վարիչ Ռաֆֆի Քարաքաշեան կը յայտնէ, թէ «Քեփիթըլ Կէյթուէյ» ծրագիրին մասնակցած ուսանողները կրցած են իրենց երազներու իրականացման ճամբով նպաստել նաեւ համայնքի քաղաքական ուժը ուռճացնելու գործին եւ իրենց ներդրումը բերած են ապագայ սերունդները պատրաստելու աշխատանքին։
«Արամեան Տուն»ը պիտի ըլլայ մշակութային կեդրոն մը, վերապահուած երիտասարդութեան: Հոն կարելի պիտի ըլլայ արմատներուն աւելի մօտէն ծանօթանալ եւ նոր բարեկամութիւններ հաստատել:
Օրինակելի է Արամեան ընտանիքին ցուցաբերած գուրգուրանքն ու խնամքը:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles