0
0
ՈՒԱՇԻՆԿԹԸՆ.- Ամերիկայի Հայ Դատի կեդրոնական յանձնախումբը Միացեալ Նահանգներու Արտաքին Գործոց նոր նախարար Ճան Քերիին կոչ ուղղած է` մինչեւ Ապրիլ 24 հանդիպում ունենալու ամերիկահայ համայնքի ներկայացուցիչներուն հետ եւ քննարկելու հայ-ամերիկեան յարաբերութիւններուն, Արցախի եւ Սուրիահայերու տագնապին առնչուող հարցեր:
Յանձնախումբի ատենապետ Քէն Խաչիկեան, Քերիին յղած իր նամակին մէջ շնորհաւորած է արտաքին գործոց նախարարի պաշտօնին անոր նշանակումը` նշելով, թէ Հայ Դատը ուրախ է, որ “Միացեալ Նահանգներու արտաքին գործոց նախարարութիւնը պիտի ղեկավարէ մարդ մը, որ ծանօթ է հայ համայնքի քաղաքականութեան, սկզբունքներուն եւ առաջնահերթութիւններուն“:
Խաչիկեան ընդգծած է, որ Հայ Դատը կ՛ակնկալէ շարունակել Քերիի հետ համագործակցութիւնը այն հարցերուն շուրջ, զորս արտաքին գործոց նախարարը բարձրացուցած է Ծերակոյտին մէջ աշխատած տարիներուն, ինչպէս օրինակ‘ ամրապնդել հայ-ամերիկեան յարաբերութիւնները, ապահովել Արցախի անվտանգութիւնը, պաշտպանել Սուրիա բնակող հայերը եւ միւս քրիստոնեաները, վերջ տալ Հայկական Ցեղասպանութեան ճանաչման դէմ ուղղուած Թուրքիոյ ուրացման արշաւին եւ այլն:
Նաեւ Հայ Դատի յանձնախումբը Սպիտակ Տունէն պաշտօնապէս խնդրած էր տեղեկութիւն տրամադրել այն մասին, թէ վարչակարգը ի՞նչ միջոցներու կը դիմէ` Սպիտակ Տան կայքէջի “We the People“ խնդրագրային ծրագիրը օտարերկրեայ խարդախութիւններէ պաշտպանելու համար:
Սպիտակ Տան բարձրաստիճան խորհրդատու Վելըրի Ճերըթին ուղղուած նամակին մէջ, Հայ Դատի գործադիր վարիչ Արամ Համբարեան մասնաւորապէս անդրադարձաւ հակահայ այն խնդրագիրին, ուր “…գրեթէ բառացիօրէն կը փոխանցուին Ատէրպայճանի բռնապետ Իլհամ Ալիեւի կողմէ հովանաւորուող եւ անհիմն եւ ատելութեամբ լեցուն հակահայկական արշաւի հիմնական միտքերը, որոնց նպատակն է խեղաթիւրել Հայաստանի դէմ Ատրպէյճանի յարձակողապաշտ քաղաքականութիւնը եւ Լեռնային Ղարաբաղի Հանրապետութեան անկախութեան պատմութիւնը“:
Իր նամակին մէջ Համբարեան խնդրած է յստակացնել, թէ կայքէջին համար ինչպիսի՛ կանոններ կը գործեն` միջազգային մասնակցութեան առումով:
Համբարեան նաեւ Սպիտակ Տան ուշադրութեան յանձնած է այն իրողութիւնը, որ խնդրագիրը անմիջական կապ ունի Ատրպէյճանի առաջին տիկին Մեհրիպան Ալիեւայի ղեկավարած “Հէյտար Ալիեւ“ հիմնադրամին հետ: Նաեւ կը շեշտուի, թէ ի տարբերութիւն “We the People“ի մէջ տեղ գտնող միւս խնդրագիրներուն, որոնց տակ կը նշուի ստորագրողներու բնակութեան վայրը, հակահայ խնդրագիրներու պարագային` հազարաւոր ստորագրողներու աշխարհագրական վայրը անյայտ է:
Նախագահ Ալիեւ, որ բազմիցս յայտարարած է, թէ “իրենց գլխաւոր թշնամին աշխարհի Հայերն են“, քանի մը ամիս առաջ հակահայ նոր արշաւի մը սկսած է նաեւ “Twitter“ ընկերային ցանցին վրայ` յայտարարելով, թէ “Հայաստանը անարժէք երկիր մըն է եւ Երեւանը հայերու կողմէ գրաւուած ատրպէյճանական քաղաք է“:
