ՀԱՅՈՒԹԵԱՆ ԱԶԳԱՅԻՆ ՇԱՀԵՐԸ՝ ԱՌԱՋՆԱՀԵՐԹ

0 0
Read Time:2 Minute, 51 Second

Ա.Ա.

Ամբողջ հայութեան ազգային շահերու երաշխաւորութեան հիմնական գրաւականներն են՝ Հայաստանի պետութեան հզօրացումը, Հայոց Ցեղասպանութեան ճանաչումն ու հայութեան արդար իրաւունքներուն հատուցումը, արցախահայութեան ինքնորոշման իրաւունքին ամրագրումը եւ Սփիւռքի դիմագրաւած հարցերուն եւ տագնապներուն լուծմամբ՝ Հայաստանի հզօրացման լծակից ուժի մը վերածուելու հայկական սփիւռքին կարողականութեան ամրապնդումը։
Հայոց պետականութեան հզօրացման հոլովոյթը ինքնին բաւական բարդ է, որովհետեւ կը պակսին բազմաթիւ կարեւոր տարրեր, որոնց ամբողջութեամբ միայն կարելի պիտի ըլլայ իսկապէս ունենալ ամբողջ հայութեան երազներուն եւ ազգային նպատակներուն իրականացումը ապահովող պետութիւն մը։ Ձեւական է ազգային միասնականութիւնը, որուն միջոցով կարելի է բազմաթիւ տագնապներ կանխարգիլել եւ ապահովել հայ ազգին գոյութեան դէմ ցցուած մարտահրաւէրներու դիմագրաւման համար անհրաժեշտ զէնքերը։ Շրջանային մակարդակի վրայ Հայաստանի պետութիւնը այսօրուան դրութեամբ կը գտնուի տկար դիրքերու վրայ, բաղդատաբար Թուրքիոյ եւ Ատրպէյճանի, որոնք իրենց ուժերը միացնելով՝ կը ջանան հակահայ քաղաքականութեան նպատակները իրականալ։ Հետեւաբար հզօր պետութեան մը կազմաւորման համար այնքան կենսական ազգային միասնականութիւնը, ինչպէս նաեւ՝ շրջանային եւ յատկապէս հարաւային կովկասեան խճանկարին մէջ կարեւոր դիրք մը ապահովելու նպատակին իրագործման եւ թուրքատրպէյճանական ճակատին վտանգները չէզոքացնելու ատակ արտաքին քաղաքականութեան որդեգրումը այսօր աւելի քան երբեք հրամայական է։
Միւս կողմէ, միամտութիւն պիտի ըլլայ հաւատալ, որ Հայաստան- Թուրքիա յարաբերութիւններու կարգաւորման նպատակով առանց նախապայմաններու բանակցութիւններու հոլովոյթը չունի Հայ Դատի եւ Հայկական Պահանջատիրութեան ուղղուած թաքուն հարուածներու թրքական ծրագիր մը , որ ժամանակի ընթացքին առաւել պիտի յստականայ։ Եթէ այսօր Անգարայի իշխանութիւնները յստակօրէն չեն խօսիր հայկական պահանջատիրութենէն հրաժարելու իրենց պահանջին մասին,շատ հաւանաբար բանակցութիւններու յաջորդ հանգրուաններուն նման պահանջ ներկայացուի՝ քառուղիի մը դիմաց ընտրանք կատարելու հարկադրանքին տակ դնելով հայկական կողմը։
Ինչ կը վերաբերի Արցախի, ապա հայաթափման վտանգը աւելի քան իրական է եւ նկատի ունենալով գետնի վրայ արձանագրուող վերջին զարգացումները, արցախահայութեան գոյութիւնը ոչ մէկ երաշխաւորութիւն ունի։Այլ խօսքով՝ Արցախի ազատ շրջաններուն բնակիչները Ատրպէյճանի իշխանութիւններուն պատանդներն են։Բնական կազի մատակարարումը, ելեկտրականութեան հոսանքի եւ համացանցի հայթայթումը,նաեւ՝ տարրական պէտքերու ապահովումը,կախեալ է ատրպէյճանցիներէն, որոնք ապացուցեցին, որ հայաթափման իրենց ծրագիրը արդէն իսկ գործադրութեան դրած են։
Արցախեան բռնագրաւուած շրջաններուն մէջ գտնուող հայկական մշակութային եւ կրօնական կոթողներուն աղուանակացման ատրպէյճանական արշաւն ալ անարգել կը շարունակուի եւ Պաքուի իշխանութիւնները իրենց բոլոր լծակները ի գործ դրած են, որպէսզի արգելակեն Եունեսքոյի մասնագիտական յանձնախումբին այցելութիւնը արցախեան ազատ շրջաններ, ուր անոնք պէտք է ցանկագրեն եւ քննեն հայկական մշակութային կոթողներուն կացութիւնը։
Ատրպէյճանի իշխանութիւններուն այս վարքագիծը նորութիւն չէ։Մանաւանդ Արցախեան երկրորդ պատերազմէն ետք, Պաքու լծուեցաւ աշխատանքի եւ բազմաթիւ են օրինակները գրաւեալ շրջաններուն մէջ հայկական մշակութային կոթողներուն, խաչքարերուն, եկեղեցիներուն եւ տարբեր յուշարձաններուն խեղաթիւրման եւ բնաջնջման օրինակները, որոնց դիմաց դժբախտաբար ոչ միջազգային ընտանիքը, ոչ իսկ Հայաստանի ռազմաավարական գլխաւոր դաշնակիցն ու գործակիցը համարուող Ռուսիա ոչինչ ըրին ու կ՛ընեն՝ կասեցնելու համար մշակութային այս ցեղասպանութիւնը, որուն նպատակը յստակ է։Արցախի հայաթափումը։Իսկ վտանգին տարողութիւնը առաւել կը յստականայ, եթէ ի մտի ունենանք, որ պաշտօնական տուեալներու համաձայն, արցախեան երկրորդ պատերազմին իբրեւ հետեւանք, Ատրպէյճանի կողմէ գրաւուած շրջաններուն մէջ կը գտնուին առնուազն 1456 նշանաւոր կոթողներ, որոնց շարքին՝ 161 վանքեր եւ եկեղեցիներ, ինչպէս նաեւ 591 խաչքարեր։
Նման կացութեան մը մէջ, անկասկած հայկական Սփիւռքին դերը առանցքային կը դառնայ։ Սփիւռք մը, որուն ղեկավարութիւնները պիտի կարենան մէկ կողմ դնել ձեւականութիւնները եւ ի շահ ամբողջ հայութեան, ազգային մէկ ու միացեալ կեցուածքներով ներկայանան՝ սփիւռքահայութեան ամբողջ ներուժը ի սպաս դնելով հայութեան եւ հայաստանի պետութեան շահերուն ապահովման աշխատանքին։Խնդիրը ոչ թէ սեփական տեսակէտերէ եւ կարծիքներէ հրաժարումն է, այլ ազգային հիմնական խնդիրներուն լուծման վերաբերեալ Սփիւռքի տարբեր հոսանքներու միջեւ մէկ ճակատի ստեղծումը, որուն իրականացումը դուրս պէտք է գայ հրապարակախօսական եւ դասախօսական ծիրէն։Իւրաքանչիւր կողմ, հոսանք եւ հատուած, իր կեցուածքները եւ գաղափարները պէտք է ունենայ։ Ասիկա անուրանալի է եւ հակառակը աղէտ մը պիտի ըլլայ։Բայց ազգային շահերու ապահովման եւ երաշխաւորման աշխատանքը պէտք չէ բաժան- բաժան դառնայ՝ ներուժը վատնելով։Ճիգերը պէտք է միացուին, երբ խնդիրը կը վերաբերի հայութեան ընդհանուր շահերուն։Այլապէս ազգովին պիտի տուժենք։

 

Happy
Happy
0 %
Sad
Sad
0 %
Excited
Excited
100 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles