«ՀԱՅՈՑ ՑԵՂԱՍՊԱՆՈՒԹԻՒՆԸ ՅԻՇԵԼԸ ՊԱՐՏԱԴԻՐ Է» ՅԱՅՏՆԵՑ ՓՐԱՆԿԻՍԿՈՍ ՊԱՊԸ

0 0
Read Time:1 Minute, 36 Second

vat5

ՎԱՏԻԿԱՆ.- Կիրակի, Ապրիլ 12-ին, Սուրբ Պետրոս Տաճարին մէջ, հազարաւոր ներկաներու մասնակցութեամբ տեղի ունեցած պատարագի ընթացքին, Ն.Ս. Փրանկիսկոս Պապը յայտնեց թէ Հայոց Ցեղասպանութեան, այդ անծայրածիր խենթ ողբերգութեան 100-ամեակը յիշելը պարտադիր է, որովհետեւ ուր յիշատակ չկայ, այնտեղ չարիքը դեռ բաց կը պահէ վէրքը, եւ ծածկել յանցանքը, կը նշանակէ ձգել, որ վէրքը արիւնահոսի:
«Սիրելի հայ եղբարներ եւ քոյեր, տարբեր առիթներով սահմանած եմ, որ կ՛ապրինք պատերազմի ժամանակաշրջան, որովհետեւ ներկայ ենք աւերածութիւններու խենթութեան, որոնք ցաւօք այսօր կը շարունակուին: Մեր քրիստոնեայ եղբայրներէն շատերը նաեւ իրենց ազգային պատկանելութեան համար դաժանաօրէն կը սպաննուին, կը գլխատուին, կը խաչուին, կենդանի կ՛այրուին, կամ բռնի կերպով կը տեղահանուին: Այսօր եւս, ցաւօք սրտի, դեռ կ՛ապրինք տեսակ մը ցեղասպանութիւն, որուն պատճառը համընդհանուր լռութիւնն է», ըսաւ Պապը:
Անոր խօսքով` մարդկութիւնը անցեալ դարուն երեք մեծագոյն ողբերգութիւններ ապրած է: «Առաջինը համընդհանուր ձեւով կը սահմանուի որպէս 20-րդ դարու համընդհանուր առաջին ցեղասպանութիւն, որուն զոհ գնաց ձեր ազգը, ինչպէս նաեւ յոյներն ու ասորիները, զոհ գացին նաեւ կանայք, ծերեր, նոյնիսկ երեխաներ: Միւս երկուքի պատասխանատուն նացիզմն ու համայնավարութիւնն էին: Կը թուի թէ մարդկութիւնը չի դադրիր անմեղ արիւն սփռելէն, կը թուի, թէ մարդկութիւնը կը մերժէ սորվիլ իր սխալներէն եւ այսօր եւս տակաւին կան ոմանք, որ ջանք կը թափեն վերացնելու իրենց նմանները, մեղսակցութեամբ անոնց, որոնք անտարբերութեամբ չեն գործեր: Դեռ չենք սորվիր, որ պատերազմը խենթութիւն է:…Սիրելի հայ հաւատացեալներ, այսօր կը յիշենք խոցուած սրտով, այդ անծայրածիր խենթ ողբերգութեան 100-ամեակը, յիշելը պարտադիր է, որովհետեւ ուր յիշատակ չկայ, այնտեղ չարիքը դեռ բաց կը պահէ վէրքը: Ծածկել յանցանքը, կը նշանակէ ձգել, որ վէրքը արնահոսի: Կ՛ողջունեմ այն համոզմունքով, որ չարիքը չի գար բարի Աստուծմէ, այլ արդիւնքն է մարդկային դաժանութեան: Երբեք դաժանութիւնը պէտք չէ արդարացուի Աստուծոյ անունով: Մեր աչքերը յառենք բարձրայրեալին, որ յաղթած է չարիքին եւ մահուան», եզրակացուց ան:
Պատարագի ընթացքին պապը ողջունեց եւ շնորհակալութիւն յայտնեց ներկայ գտնուելու համար Հ.Հ. նախագահ Սերժ Սարգսեանին: Պապը ողջունեց նաեւ իր եղբայր պատրիարք եպիսկոպոսները`Ամենայն Հայոց Գարեգին Բ կաթողիկոսը, Մեծի Տանն Կիլիկիոյ Արամ Ա կաթողիկոսը, ինչպէս նաեւ հայ կաթողիկէ Պատրիարք Ներսէս Պետրոսը:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles