ՀԱՅՈՑ ՑԵՂԱՍՊԱՆՈՒԹԵԱՆ ՎԵՐԱԲԵՐԵԱԼ ՓԱՍՏԵՐԸ ԱՄՓՈՓՈՂ ՈՒՂԵՑՈՅՑ

0 0
Read Time:1 Minute, 57 Second

p3Giro

ԵՐԵՒԱՆ.- Դեկտեմբեր 15-17-ին տեղի ունեցաւ «Դրացիներ՝ հայեացք Հայաստանէն» գիտաժողովը, կազմակերութեամբ «Շրջանային իրադարձութիւններու գիտավերլուծական կեդրոն»ի եւ աջակցութեամբ՝ Երիտասարդ գիտնականներու աջակցման ծրագրին, Հայաստանի երիտասարդական հիմնադրամին, Երիտասարդ առաջնորդներու դպրոցին, Ամերիկայի հայկական համագումարին եւ Հայաստանի Հանրապետութեան Պետական կառավարման կաճառին: Գիտաժողովին ընթացքին մասնագէտները անդրադարձան Արցախի շուրջ ստեղծուած իրադարձութիւններուն, ծայրայեղ իսլամական ՏԱՀԵՇ ահաբեկչական խմբաւորման եւ արաբական աշխարհին մէջ համապատասխան զարգացումներուն, Հայոց Ցեղասպանութեան ժխտման քաղաքականութեան իրաւական եւ քաղաքագիտական դիտանկիւններուն:

Գիտաժողովի փակման օրը, տեղի ունեցաւ Երիտասարդ առաջնորդներու դպրոցի ղեկավար, թրքագէտ Արտակ Շաքարեանի «Ուղեցոյց երիտասարդ դեսպանին. փաստեր Հայոց ցեղասպանութեան վերաբերեալ» գիրքին շնորհահանդէսը: Գիրքը տպուած է Հայաստանի երիտասարդական հիմնադրամի իբրեւ Հայաստանի Հանրապետութեան նախագահի գործընկեր կազմակերպութեան կողմէ յայտարարուած դրամաշնորհային մրցումի ծիրին մէջ: Այս գործը, ըստ էութեան, կ՛անդրադառնայ Հայոց ցեղասպանութեան խնդիրին եւ ամփոփ կը ներկայացնէ, թէ Հայաստանի Հանրապետութիւնը իբրեւ հատուցում պաշտօնապէս ի՛նչ կը պահանջէ Թուրքիայէն:
Հ.Յ.Դ. Բիւրոյի Հայ դատի եւ քաղաքական հարցերու գրասենեակի ղեկավար Կիրօ Մանոյեան գիրքը կարեւոր հրատարակութիւն կը նկատէ: «Այս գիրքը կը զինէ երիտասարդութիւնը այն կարեւոր պատասխաններով եւ մօտեցումներով, որոնք յաճախ թրքական կողմը կը խեղաթիւրէ իր տեսակէտին մէջ ներկայացնելով: Հայոց Ցեղասպանութեան 100-ամեակին սեմին, միայն մենք յաջողեցանք ունենալ Հայոց Ցեղասպանութեան հատուցում պահանջող համապարփակ թղթածրար, որովհետեւ անցեալի բազմաթիւ նման փորձերը անյաջողութեան մատնուած էին», յայտնեց ան: Կիրօ Մանոյեան յատկապէս կարեւոր նկատեց գիրքին յառաջաբանը, ուր կը ներկայացուի, որ որ Թուրքիան որդեգրած է կասկած յարուցելու քաղաքականութիւն:
Արտակ Շաքարեան, ներկայացնելով «Ուղեցոյց երիտասարդ դեսպանին. փաստեր Հայոց ցեղասպանութեան վերաբերեալ» գիրքին օգտակարութիւնը, իր կարգին յայտնեց թէ.- «Կը թուի, թէ հայ հանրութիւնը ամբողջովին տեղեկացուած է Հայոց ցեղասպանութեան մանրամասնութիւններուն: Սակայն, իրականութեան մէջ Հայոց ցեղասպանութեան մասին մեր ժողովուրդին անդամներուն զգալի մասին գիտելիքները ո՛չ հիմնաւոր են, ո՛չ ալ, առաւել եւս, փաստարկուած: Մինչդեռ նշուած հիմնախնդիրներուն վերաբերեալ թերի տեղեկացուած հայ երիտասարդները, արտասահմանի մէջ զանազան առիթներով հանդիպելով թուրք եւ ազրպէյճանցի համապատասխան կառոյցներու կողմէ նախօրօք պատրաստուած անձերու, յաճախ դժուար իրավիճակներու մէջ կը յայտնուին: Այս աշխատանքը ուղղուած է լրացնելու այս բացը»:
Գիրքին մէջ ներկայացուած նիւթերուն ծիրին մէջ ուսումնասիրուած են Հայոց Ցեղասպանութեան մասին թրքական գրականութիւնն ու հակահայկական կայքերու քարոզչական բնոյթը: Այս մարզին մէջ ճանչցուած հայ մասնագէտներու հետ քննարկուած են թրքական ժխտողական հիմնական թեզերը, միացեալ փորձ կատարուած է վերջիններուն տալու կարելի եղածին չափ հիմնաւոր, սեղմ եւ ընդգրկուն պատասխաններ: Գիրքին մէջ, մասնաւորապէս կը քննարկուին Թուրքիոյ ժխտողական քաղաքականութիւնը, Հայոց Ցեղասպանութեան զոհերուն թիւը, հայերու ինքնապաշտպանութիւնները, բռնագաղթի` իբրեւ բնաջինջ գործիքի օգտագործումը, ինչպէս նաեւ օսմանեան դատարանին կողմէ հայերու կոտորածներուն դատապարտումը:
Գիրքը նախատեսուած է արտասահման մեկնող երիտասարդներուն համար, որոնք այս կամ այն ձեւաչափով պիտի քննարկեն Հայոց Ցեղասպանութիւնը, կամ հանդիպումներ պիտի ունենան թուրք պաշտօնակիցներու հետ:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles