«Հայ Յեղափոխական Դաշնակցութիւնը ողջունում է Հայաստան – Թուրքիա արձանագրութիւնները չեղարկելու մասին Հայաստանի Հանրապետութեան նախագահի որոշումը: 2009  թուականի հոկտեմբերի 10-ին ստորագրուած արձանագրութիւններն առ ոչինչ յայտարարելը վաղուց սպասուած քայլ էր:

Ի սկզբանէ Հ.Յ. Դաշնակցութիւնը վճռականօրէն հանդէս է եկել այդ արձանագրութիւնների դէմ` նկատի ունենալով դրանցում առկայ մի շարք անընդունելի դրոյթները եւ շահարկման տեղիք տուող ձեւակերպումները: Ժամանակը ցոյց տուեց, որ մեր մտահոգութիւնները տեղին էին: Թուրքիան Հայոց ցեղասպանութեան 100-ամեակի նախաշեմին ընդամէնը մարտավարական խնդիր էր լուծում` միաժամանակ փորձելով նախապայմաններ առաջադրել:

Աներկբայ է, որ Հայաստան – Թուրքիա յարաբերութիւնների կարգաւորման գործընթացն առաջ մղելու ջանքերը ձախողուել են նախապայմանների լեզուով խօսելու Թուրքիայի գործելաոճի պատճառով: Այլեւս ակնյայտ է թուրքական դիւանագիտութեան ողջ սնանկութիւնը եւ Թուրքիայի` անվստահելի գործընկեր լինելու իրողութիւնը: Հարկ է արձանագրել, որ Թուրքիայի ներկայիս իշխանութիւնները դեռեւս պատրաստ չեն պատմութեան հետ առերեսուելու եւ առանց նախապայմանների յարաբերութիւններ հաստատելու:

Ողջունելի է, որ նախընթաց տարիներին հայ քաղաքական հաւաքական միտքը կարողացաւ ճիշդ գնահատել իրավիճակը եւ համարժէք քայլեր ձեռնարկել Թուրքիայի մտադրութիւնների չէզոքացման ուղղութեամբ: Արձանագրութիւնների կնքման գործընթացի դադարեցումը նաեւ մեր համահայկական պայքարի, այդ պայքարին միացած քաղաքական եւ հասարակական կազմակերպութիւնների, մեր ողջ ժողովրդի ձեռքբերումն է:

Հաւատացած ենք, որ հայ-թուրքական յարաբերութիւնների կարգաւորումը անհրաժեշտութիւն է, սակայն այն պէտք է տեղի ունենայ քաղաքակիրթ աշխարհի արժեհամակարգին համապատասխան եւ որեւէ պարագայում պէտք չէ վտանգի մեր ազգային-պետական շահերը եւ հայ ժողովրդի անժամանցելի իրաւունքները:

ՀՅԴ ՀԱՅԱՍՏԱՆԻ ԳԵՐԱԳՈՅՆ ՄԱՐՄԻՆ

2 մարտ 2018