ԵՐԵՒԱՆ.- Քառասուն տարի շարունակ արգելափակուելէ եւ բանտի ծառայելէ ետք, Համբիկ Սասունեան ազատ արձակուեցաւ եւ փոխադրուեցաւ Հայաստան:
Նամակով մը, Համբիկ Սասունեան շնորհակալութիւն յայտնած էր բոլոր անոնց, որոնք շարունակ գործի լծուած էին եւ պատճառ դարձած, որպէսզի ան կարենայ ազատ արձակուիլ եւ հաստատուիլ Հայաստան:
Նշենք, թէ Քալիֆորնիոյ նահանգապետ Կեւըն Նիւսըմ շարունակ ճնշումի տակ էր եւ քաջատեղեակ էր Հայոց ցեղասպանութեան ծալքերուն եւ հետեւանքներուն, նաեւ տեղեակ էր, թէ իր նահանգին հայութիւնը միաձայնութեամբ նեցուկ կը կանգնի Համբիկ Սասունեանը մարդասիրական նկատառումներով ազատ արձակելու պահանջին, պահանջ մը, որուն երկու առիթներով միաձայնութեամբ դրական պատասխան տուած էին Բանտարկեալներու ազատ արձակման տարբեր խորհուրդներ:
Այսպէս, Համբիկ Սասունեան կրցաւ իրականացնել իր կեանքը Հայաստանի մէջ շարունակելու երազը:
Հայ ժողովուրդին ուղղուած իր հետեւեալ պատգամին մէջ, Համբիկ Սասունեան յայտնեց.-
Սիրելիʹ հայրենակիցներ,
Ամենայն ուրախութեամբ կը գրեմ պատգամս ձեզի՝ Հայաստանէն։
Մօտաւորապէս 40 տարիներ անց, պատիւը ունիմ ըլլալու հայրենի հողին վրայ, խմելու հայրենի ջուրը, շնչելու օդը եւ զգալու ընտանեկան ջերմութիւնը։
Ձեր ցուցաբերած աջակցութիւնը տարիներու ընթացքին մնայուն կերպով քաջալերած է զիս եւ դրական ներդրում ունեցած է իմ դժուարագոյն օրերուս։
Խորին շնորհակալութիւններս կ՛ուզեմ յայտնել բոլոր անոնց, որոնք նամակցած են, այցելած են եւ ընդմիշտ պահած են զիս իրենց սրտերուն մէջ։
Վերջապէս հասած եմ տուն…
Սիրով՝
Համբիկ Սասունեան
