ՀԱՄԱՀԱՅԿԱԿԱՆ ԿԵՑՈՒԱԾՔ՝ ԹՈՒՐԵՒԱՏՐՊԷՅՃԱՆԱԿԱՆ ՃԱԿԱՏԻՆ ԴԻՄԱՑ

0 0
Read Time:1 Minute, 58 Second

Ա.Ա.

Ժողովուրդներու ինքնորոշման իրաւունքը եւ պետութիւններու հողային ամբողջականութեան պահպանումը ամրագրուած են Մ.Ա.Կ.-ի կանոնադրութեամբ եւ մաս կը կազմեն Միջազգային Օրէնքի հիմնարար սկզբունքներուն։ Թէեւ որոշումի մայրաքաղաքներուն համար պետութիւններու հողային ամբողջականութեան պահպանումը առաջնահերթ է ժողովուրդներու ինքնորոշման իրաւունքէն, արցախեան այսօրուան իրավիճակը հայութիւնը կը պարտադրէ չընկրկիլ եւ մէկ ու միացեալ ճակատով ներկայանալ միջազգային ընտանիքին, որպէսզի կարելի ըլլայ մտադրութիւնները եւ մօտեցումները փոփոխութեան ենթարկել՝ Արցախի բնիկ ժողովուրդին ինքնորոշման իրաւունքին գործադրութիւնը ապահովելու համար։
Հայաստանեան ընդդիմութեան հանրահաւաքէն բխած յայտարարութեան կէտերը շատ յստակ են եւ կրնան վերածուիլ քաղաքական վճռորոշ կեցուածքի մը հիմնարար սկզբունքներուն, որովհետեւ կը բացառեն Արցախի գոյութիւնը՝ Ատրպէյճանի իշխանութեան տակ, կը պահանջեն Արցախի եւ Հայաստանի միջեւ ցամաքային կապ մը, կը մերժեն Հայաստանի ինքնիշխան եւ անկախ տարածքներու հաշւոյն հարաւային կովկասեան հաղորդակցութեան ուղիներու տրամադրումը, ինչպէս նաեւ կը մերժեն հայեւթուրք յարաբերութիւններու կարգաւորում մը,եթէ հարցականի տակ պիտի դրուի հայ ժողովուրդին հայրենզրկման եւ ցեղասպանութեան իրողութիւնները։
Վերջին օրերու զարգացումները սակայն արցախցիներուն մտահոգութիւնները առաւել հիմնաւորեցին,մանաւանդ երբ ի մտի ունենանք, որ Ատրպէյճանի իշխանութիւնները կը շարունակեն անտեսել Երեւանի պաշտօնական առարկութիւնը, որ կը վերաբերի խաղաղութեան համաձայնագրի մը կնքման նպատակով ներկայացուած առաջարկին, որուն մէջ ոչ մէկ խօսք կայ Արցախի կարգավիճակին մասին։ Պաքու նաեւ կը շարունակէ պնդել, որ Լեռնային Ղարաբաղի տագնապը լուծուած է եւ կը շեշտէ, որ խաղաղութեան որեւէ համաձայնագրի շուրջ բանակցութիւններու հիմք պէտք է ունենալ հողային ամբողջականութեան փոխադարձ ճանաչման սկզբունքը։ Ասիկա բնականաբար կը նշանակէ Արցախը ճանչնալ իբրեւ Ատրպէյճանի մէկ մասը։
Արցախի դիմագրաւած վտանգին տարողութիւնը առաւել շեշտուեցաւ Պրիւքսէլի մէջ կայացած՝ Փաշինեան- Ալիեւ աւելի քան չորս ժամ տեւած հանդիպումէն ետք կատարուած պաշտօնական յայտարարութեան պատճառով, որովհետեւ ոչ մէկ բառ արտասանուեցաւ Արցախի տագնապին մասին, այլ Եւրոպական Խորհուրդի նախագահ Շարլ Միշէլ գերազանց եւ արդիւնաւէտ համարեց հանդիպումը, որ կայացաւ ատրպէյճանական զէնքին անմիջական սպառնալիքներուն տակ։ Պէտք չէ մոռնալ, որ ատրպէյճանական զօրամիաւորումները գրաւման տակ կը պահեն Հայաստանի ինքնիշխան տարածքներ, իսկ Արցախի ազատ շրջաններու բնակչութեան նկատմամբ ատրպէյճանական ճնշումները սովորական դարձած են։ Ոչ մէկ խօսք տագնապին գլխաւոր պատճառին՝ Արցախի վերջնական կարգավիճակին եւ արցախահայութեան ինքնորոշման իրաւունքին ամրագրման մասին, բնաւ լաւատեսական չէ։ Նաեւ պէտք է նկատել, որ Երեւանի պաշտօնական յայտարարութեան մէջ միայն կը նշուի, որ Փաշինեան անդրադարձած է ատրպէյճանական զօրամիաւորումներու վերջին գործողութիւններուն պատճառով Արցախի մէջ ստեղծուած իրավիճակին եւ խնդիրներուն։
Նման իրավիճակի մը մէջ, Արցախի տագնապին եւ համահայկական պահանջատիրական պայքարին դէմ ցցուած թուրքեւատրպէյճանական լուրջ եւ իրական վտանգը չէզոքացնելու հիմնարար սկզբունքները պէտք է որդեգրուին համահայկական մէկ ու միացեալ ճակատին կողմէ, որուն մղիչ ուժը եւ կեդրոնական առանցքը Երեւանի իշխանութիւնները պէտք է ըլլան։ Շատ յստակ է, որ այս ձեւակերպումէն տարբեր որեւէ մօտեցում, առաջադրանք կամ ծրագիր հայութեան ազգային շահերը լրջօրէն պիտի վտանգէ։

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles