0
0
Մայիս 7-ի երեկոյեան, Համազգայինի Գրական Յանձնախումբի կազմակերպութեամբ, Ուտսայտի Հայ Կեդրոնին մէջ, տեղի ունեցաւ մեր մասնաճիւղի 31րդ տարեկան այս ձեռնարկը, որը տարիներէ իվեր կոչած ենք “Գրական Գոհարներ Եւ Գինի”: Ձեռնարկը միօրինակ չէ եղած, երբեմն նուիրուած է յատուկ թեմաներու, ինչպիսին է՝ մօր սէրը, հայրենիքի սէրը, ազատութեան սէրը…Եղեռնը ….եւայլն, երբեմն ալ զանազան գրողներու եւ բանաստեղծներու նուիրուած երեկոներ եղած են եւ անոնց արձակ կամ չափածոյ ստեղծագործութիւնները ներկայացուած են ընթերցումով կամ ասմունքելով: Մասնակցողներն ալ փորձած ենք հետզհետէ երիտասարդացնել, եւ ուրախ ենք ըսելու որ յաջողած ենք: Վերջին տասնամեակին, ելոյթ ունեցողները գրեթէ բոլորն ալ երիտասարդ սերունդէն եղած են:
Այս տարի “Գրական Գոհարներ Եւ Գինի” երեկոն նուիրուած էր մեր երգիծաբաններէն՝ Յակոբ. Պարոնեանին, Երուանդ Օտեանին եւ Լեռ Կամսարին: Արդէն Համազգայինի այս տարուայ դասախօսութիւններու շարքին՝ երեքն ալ ներկայացուած էին տարբեր երեկոներու ընթացքին: Ընկհ. Լիզա Եսայեան խօսած էր Պարոնեանի մասին, տիկ. Զարմինէ Պօղոսեան՝ Օտեանի մասին եւ Պրն. Ռուբէն Պարսումեան Կամսարի մասին: Տիկ. Զարմինէ Պօղոսեան, իր դասախօսութեան ընթացքին նշած էր թէ Օտեան այնքան հրաշալի էջեր ունի գրուած բայց ժամանակը չթոյլատրելուն համար պիտի չընթերցուէին, եւ շարունակեց՝ “Երանի առիթ ըլլայ օր մը հաւաքուինք եւ միասին ընթերցենք”: Անմիջապէս որոշեցինք մեր տարեկան “Գրական Գոհարներ Եւ Գինի” երեկոն յատկացնել Օտեանի ընթերցումներուն: Սակայն Տիկ. Պօղոսեան աւելցուց որ լաւագոյնը պիտի ըլլայ երեկոն նուիրել մեր երեք երգիծաբաններուն:
Համաձայնեցանք: Խնդրեցինք որ Օտեանէն ինք կատարէր գրութիւններու ընտրութիւնը եւ Սրբոց Նահատակաց Վարժարանի Տնօրէնուհիի հանգամանքով, իր ներկայ եւ անցեալին շրջանաւարտ աշակերտներուն մասնակից դարձնէր երեկոյին:
Պրն. Ռուբէն Պարսումեան, մեր տրամադրութեան տակ դրաւ Լեռ Կամսարի մասին իր ուսումնասիրութեամբ հաւաքած նիւթերը որմէ ընտրութիւններ կատարեցինք բծախնդրօրէն: Պարոնեանի պարագային խուսափեցանք իր այնքան տարածուած þþՄեծապատիւ Մուրացկաններէնþþ եւ Քաղաքավարութեան Վնասներէն: Պրպտեցինք եւ իր անծանօթ գրութիւններէն ընտրեցինք դիպուկ էջեր ընթերցանութեան համար:
Գրական Յանձնախումբի անդամներէն Ընկհ. Ժանէթ Մարգարեան բացման իր հակիրճ խօսքին մէջ անդրադարձաւ երգիծաբանութեան ժանրի մասին եւ նշեց թէ մեր այս երեք երգիծաբաններէն՝ Պարոնեան ձաղկեց Պոլսոյ հասարակական կեանքը: Հարուստները՝ “Ազգային Ջոջեր” կոչեց, իսկ դրամաշորթները “Մեծապատիւ Մուրացկաններ” կոչեց: Օտեան տեսաւ ու ապրեցաւ Եղեռնը եւ ծաղրեց մարդկային արատները իսկԿամսար ապրելով Բոլշեւիզմի լուծին տակ անխնայ քննադատեց ու այպանեց համայնավարութիւնը:
Ապա ընկհ. Րիթա Կիրակոսեան ընթերցեց Պարոնեանի եւ Կամսարի կենսագրականները եւ ընթացք տուաւ յայտագրի գործադրութեան:
“Գրական Գոհարներ Եւ Գինի” երեկոյին մասնակցողներէն ոմանք թէեւ աշխարհի տարբեր վայրերէ եկած էին, սակայն մեծ մասը ամերիկածին սերունդն էր, որոնք միօրեայ կամ ամենօրեայ հայկական դպրոցներ յաճախած էին, եւ կամ ինքնաշխատութեամբ սորված էին հայերէնը: Բոլոր մասնակցողները սահուն հայերէնով եւ հարազատ առոգանութեամբ կատարեցին ընթերցումները, մեծապէս տպաւորելով մեզ եւ գոհունակութեամբ լեցնելով մեր սրտերը:
Պարոնեանէն եւ Կամսարէն ընթերցումները կատարեցին՝ Հեղինէ Գրիգորեան (Հայաստան), Լիզա Եսայեան (Պէյրութ), Թամար Լագիսեան(Այնճար), Աւետիս Հաճեան (ՀալէպԱրժանթին ), Թամար Յարութիւնեան (Ա.Մ.Ն.), Մարիա Ներսէսեան (Ա.Մ.Ն.), Անահիտ ՈւղուրլեանՀաճեան(Ա.Մ.Ն.),Նորիքա Պոյաճեան(Ա.Մ.Ն.): Իսկ Սրբոց Նահատակաց Վարժարանի Տնօրէնուհի՝ Տիկ. Զարմինէ Պօղոսեանի համադրութամբ, Օտեանէն ընթերցումներ կատարեցին աշակերտներ՝ Կրէկորի Անտրեաբուլոս, Արթիւր Իբեք, Դալար Յովսէփեան եւ շրջանաւարտներ՝ Նազարէթ Մարգարեան եւ Թալին Նիկտէլեան, բոլորն ալ (Ա.Մ.Ն.):
Ապա ընկհ. Արմինէ Մինասեան, շատ հակիրճ կերպով, ներկայացուց մասնակցողները, նշելով իւրաքանչիւրի ծննդավայրը, յաճախած հայկական վարժարանը եւ ներկայի պաշտօնը:
Հաճելի եւ դաստիարակչական երեկոյ մը՝ իսկապէս: Կը գիտակցինք դժուարութիւնները որ կազմակերպողները կը դիմագրաւեն ընթերցման յարմար գրութիւններ ընտրելու աշխատանքին մէջ եւ մեր բազմազբաղ երիտասարդներէն գտնել անոնց որոնք կ°ուզեն եւ կրնան ժամանակ տրամադրել ընթերցելու:
Երեկոյի մեծագոյն առաւելութիւնը այն է, որ մասնակցողները եւ ունկնդիրները ծանօթացան հայ գրականութեան երեք երգիծաբաններու գործերուն, որ այլապէս, շատ հաւանական է առիթ պիտի չունենային:
