«Համազգային»-ի 26-րդ Ուսանողական Հաւաքի Աւարտ

0 0
Read Time:5 Minute, 39 Second

ԵՐԵՒԱՆ․- Յուլիս 19-ին աւարտեցաւ «Համազգային»-ի 26-րդ ուսանողական հաւաքը (ֆորում), որուն մասնակցեցան Հայաստանէն, Արցախէն եւ սփիւռքի տարբեր գաղութներէ ուսանողներ:
Շարունակելով, իրենց յայտագիրը, ընկերակցութեամբ Համազգայինի Երեւանի Գրասենեակի տնօրէն Ռուզան Առաքելեանի, Ֆորումականները այցելեցին Երեւանի Պետական Համալսարան։ Խումբը հանդիպում ունեցաւ պատմական գիտութիւններու դոկտոր, Երեւանի Պետական համալսարանի սփիւռքագիտութեան ամպիոնի վարիչ՝ Արման Եղիազարեանի հետ, որ անդրադարձաւ Համալսարանի հիմնադրութեան, պատմութեան եւ ստորաբաժանումներուն։ Ապա, Հայագիտական ամպիոնի հետազօտութիւններու փոխտնօրէն՝ Ալիք Ղարիպեան, առաջնորդեց Ֆորումականները համալսարանի թանգարան, ուր ուղեցոյցը հակիրճ ձեւով ներկայացուց այնտեղ գտնուող հարստութիւնները։ Ղարիպեան նաեւ ներկայացուց Հայագիտական ամպիոնն ու անոր առաքելական տարբեր աշխատանքները։
Աւելի մօտէն ծանօթանալու համար հայ ժողովուրդի մշակոյթի օրրանին՝ Հայկական երաժշտութեան, Ֆորումականները մեկնեցան Ջիւանու Անուան Աշուղական Դպրոց ու անոնց հոգիները ներշնչուեցան հայկական բարձրաճաշակ արուեստով։ Փրոֆ․ Թովմաս Պօղոսեան ներկայացուց հայ աշուղներու կենսագրականներն ու անոնց տարած սրբազան աշխատանքը, ինչպէս նաեւ՝ հայկական նուագարաններն ու անոնց արժէքները՝ մեր մշակոյթի ու ինքնութեան պահպանման կամուրջը ամուր պահելու համար։


Մշակոյթի արժէքներով լի օրը շարունակուեցաւ։ Ֆորումականները ուղղուեցան դէպի հայ երաժշտական արուեստի կարկառուն ներկայացուցիչի՝ Կոմիտաս Վարդապետի թանգարանը։ Այստեղ, Ֆորումականները ստացան Կոմիտաս Վարդապետի օրհնութիւնը՝ մօտէն ծանօթանալով անոր կեանքին ու հայ ժողովուրդին համար իր նուիրեալ աշխատանքներուն։
Յետմիջօրէին, Ֆորումականները այցելեցին Մայր Հայաստան եւ ունեցան ընկերային հաճելի պահ։
Յաջորդ օրը «Համազգային»-ի Կեդրոնական Վարչութեան ատենապետ Զաքար Քէշիշեան համառօտ ձեւով ներկայացուց միութեան գործունէութիւնը եւ բազմաբնոյթ աշխատանքները։ Անկէ ետք, Ֆորումականները այցելեցին Արարատի գիրկը բազմող Խոր Վիրապը՝ Գրիգոր Լուսաւորիչի նուիրուած նշանաւոր ուխտատեղին։
Ինչքան ալ ծանօթացանք հայ ստեղծագործ ճարտարապետ հանճարներու, սակայն ոչ մէկ կոթող այնքան կը ցայտեցնէր հայ ստեղծագործ հանճար մը, որքան՝ Զուարթնոցը։ Ֆորումականները առիթը ունեցան Զուարթնոցի հողին վրայ զգալու հայ արուեստագէտի շունչն ու հոգին։ Իր աւերակներով իսկ՝ զուարթնոցի ամէն անկիւն մնաց իւրաքանչիւր Ֆորումականի սրտին մէջ՝ որպէս հայ ճարտարապետական աշխարհի ներշնչման աղբիւր։

Յաջորդ այցելութիւնը ԹՈՒՄՕ կեդրոնն էր, ուր ֆորումականները ծանօթացան կեդրոնի տարբեր աշխատանոցներուն։
ֆորումականները ներկայ գտնուեցան Թաթուլ Ալթունեանի անուան երգի-պարի Պետական Համոյթի ձեռնարկին։ Համոյթը Ֆորումականներու սիրտն ու հոգին լեցուց հայկական երաժշտութեան ազգային սնունդով։
Ֆորումականները իւրայատուկ ոգիով ողջունեցին Սարդարապատը։ Սերունդ մը եւս կը քալէ այս ճանապարհէն։ Անոնք կը քալեն լուռ։ Անոնց փոխարէն կը խօսին յաղթանակի հայեացքներն ու հոգիները։ Ու յանկարծ կը հնչէ.
«Զանգեր ղօղանջէք,
Սրբազան քաջերին կանչէք
Այս արդար մարտին:
Սերունդներ դուք ձեզ ճանաչէք
Սարդարապատից»:
Այո՛, ցեղասպանութիւն ու շարունակաբար պատերազմ ապրող հայ ժողովուրդը ոչ միայն պիտի պահպանէ իր ինքնութիւնը, այլ ընդմիշտ պայքարելով պիտի տօնէ իր յաղթանակները:
Իրենց յարգանքի տուրքը մատուցեցին Մայիսեան հերոսամարտիկներուն, ապա հուժկու քայլերով մեկնեցան դէպի Ազգագրութեան Թանգարան, ուր ուղեցոյցը մանրամասնօրէն ներկայացուց Մայիսեան պետականակերտ հերոսամարտերը։
Ապա, Ֆորումականները հնարաւորութիւնը ունեցան շրջելու, դիտելու եւ մասնակիցը դառնալու Ռուբէն Նալպանտեանի Խաչքարերու Վարպետաց Դպրոցի արուեստին եւ աշխատանքներուն։ Անոնք կատարեցին լաւաշ թխելու եւ խաչքարի փորագրման իրենց առաջին փորձը, ապա ուղղուեցան դէպի Սուրբ Գայեանէ Վանք։
Երեկոյեան, ֆորումականները հանդիպում ունեցան «Պըրթ Ռայթ Արմենիա»-ի տնօրէն Սեւան Գապաքեանի հետ, որ ներկայացուց ծրագրի տարբեր գործունէութիւնները:
Ֆորումականները զրուցեցին Նժդեհ Մկրտիչեանի հետ։ Անոնք քննարկեցին ընկերային ցանցերը՝ 21-րդ դարու որպէս կարեւորագոյն տարր։ Նիւթը կը կեդրոնանար հայկական հարթակներուն ու անոնց դերակատարութիւններուն մասին՝ ընկերային ցանցերուն մէջ։

Յաջորդ օրը սկիզբ առաւ այցելութեամբ Մեսրոպ Մաշտոցի Անուան Մատենադարանը։ Ֆորումականները ուղեցոյցին հետ շրջեցան Մատենադարանի տարբեր բաժինները եւ ծանօթացան այնտեղ գտնուող հայկական զանազան հարստութիւններուն։
Ամենայն Հայոց Բանաստեղծի՝ Յովհաննէս Թումանեանի թանգարան այցելութիւնը յատկանշական պահ մըն էր։ Դպրոցական տարիներու սորված դասագիրքերէն դուրս, այսօր առիթ մըն էր վերապրելու ու վերակենդանացնելու Թումանեանը եւ աւելի մօէն ծանօթանալու անոր համամարդկային հոգիին, բարի սիրտին, հանճարեղ ստեղծագործութիւններուն ու պայծառ երեւակայութեան։ Մենք քաջ կը հաւատանք, որ Թումանեանի պէս հանճարեղ տիպարներ այս մութ աշխարհին մէջ պիտի ըլլան այն փարոսը, որ շարունակաբար պիտի լուսաւորէ մեր միտքերը։
Ապա, Ֆորումականները ուղղուեցան դէպի Հայաստանի Ամերիկեան Համալսարան, ուր հանդիպում ունեցան համալսարանի ընդունելութեան բաժնի պատասխանատու Մեղրի Խոշեանի հետ, որ ամփոփ ձեւով ներկայացուց համալսարանը։ Ապա անոնք այցելեցին Ֆորումի խորհրդանիշ՝ Սասունցի Դաւիթի արձանը, որուն քով լուսանկարուեցան։
Երեկոյեան, Ֆորումականները առիթը ունեցաւ հանդիսատեսը դառնալու Սօս Սարգսեանի Անուան Համազգայինի Թատրոնի՝ «Պյերետայի Քoղը» ներկայացումին։ Թատրոն, որ չմնաց բեմին վրայ, այլ տեղաւորուեցաւ իւրաքանչիւր հանդիսատեսի միտքին ու սրտին մէջ։ Ֆորումականները նաեւ իրենց մասնակցութիւնը բերին թատրոնի քննարկումին։

Յաջորդ օրը Ֆորումականները այցելեցին Սաղմոսավանք՝ ճարատարագէտ Աշոտ Գրիգորեանի հետ։ Ճարտարագէտը մանրամասն տեղեկութիւններով ու պատմութիւններով ներկայացուց վանքը շրջապատող իւրաքանչիւր անկիւնը, որմէ ետք անոնք ուղղուեցան դէպի Տառերու պուրակ։
«Արագածի լանջերին ծով ծովանանք, Դառնանք բարի դառնանք զօրեղ ուժ դառնանք» երգի ծափերով, Ֆորումակաները կէսօրին հասան Արագածի լանջը։ Բնութեան խօսող ջուրերու եւ լեռներու յուշիկ մեղեդիներուն հետ, Ֆորումականները պատրաստեցին իրենց ճաշը եւ Արագածի բնութեան գիրկը ունեցան ընկերային պահ։ Արագածի մաքուր օդը իրենց կուրծքերուն մէջ, Ֆորումականները այցելեցին նաեւ Ամբերդ եւ այնտեղ գտնուող Սուրբ Աստուածածին եկեղեցին, ուր ճարտարագէտ Աշոտ Գրիգորեան հակիրճ ձեւով ներկայացուց բերդին պատմութիւնը։
Յաջորդ առաւօտեան վաղ ժամերէն խումբը ուղղուեցաւ Օշական գիւղի Սուրբ Մեսրոպ Մաշտոց եկեղեցին, ուր Ֆորումականները այցելեցին Սուրբ Մեսրոպի շիրմաքարը եւ իրենց յարգանքի տուրքը մատուցեցին, ապա անցան շրջափակը, ուր կը գտնուին Մեսրոպեան Այբուբենի Խաչքարերը։ Օշականի Սուրբ Մեսրոպ Մաշտոց եկեղեցւոյ հոգեւոր Հայրը՝ Տեր Վազգէն Քահանայ Յովհաննիսեանը, ամփոփ ձեւով ներկայացուց Հայ գիրերու գիւտի եւ եկեղեցւոյ պատմութիւնը։

Կէսօրին Ֆորումականները հասան արհեստի ու արուեստի քաղաք՝ Գիւմրի, որ կ՚առանձնանար իր խոր գեղեցկութեամբ ու կը ներշնչէր հպարտութիւն: Աւելի լաւ ծանօթանալու համար Գիւմրիի շրջանին, պատմութեան, մշակոյթին եւ ժողովուրդին, մասնակիցները առիթը ունեցան շփուելու Գիւմրեցի ժողովուրդին հետ։ Անոնք երկու խումբի բաժնուելով շրջեցան տարբեր փողոցներ եւ տեղացիներէն խնդրեցին պատմել Գիւմրիի մասին դրուագներ։ Ժողովուրդէն ստացած գիտելիքները գրի առնելով, խումբերը ամբողջացուցին իրենց խմբային աշխատանքները ու վերադարձան հիւրանոց հանգստանալու։
Գիւմրիի սուրճին ու լաւաշին համն ու հոտը տարբեր էր այսօր։ Ֆորումականները մեծ խանդավառութեամբ ուղղուեցան դէպի Առաջնորդարան՝ Սուրբ Գրիգոր Լուսաւորիչ եկեղեցի, ուր Առաջնորդական տեղապահ՝ Հոգեշնորհ Տ. Նարեկ վրդ. Աւագեան, ջերմօրէն ընդունեց խումբս եւ համառօտ ներկայացուց եկեղեցւոյ պատմութիւնը։ Ապա, Ֆորումականները այցելեցին Հառիճի վանք։ Եկեղեցին, որուն գեղեցկութիւնը Աստուածային փառքով պսակուած էր, ջերմօրէն կ՚ողջունէր երիտասարդները։ Պարող ամպերու խումբին տակ լուսանկարուելով, Ֆորումականները շարունակեցին իրենց ճամբան մինչեւ Գիւմրիի Մայր Հայաստանի արձանը, ապա՝ Սեւ Բերդ։ Ֆորումականները Սեւ Բերդի սրահը ճոխացուցին իրենց սորված հայկական «Կարնոյ Քոչարի»-ով, «Խամխամա»-ով եւ «Թամզարա»-ով։
Հանրակառքը հասաւ Չերքեզի ձոր, որուն կանաչազարդ բնութիւնը հիւրընկալեց Ֆորումականները ճաշելու։ Աւելի ուշ, գաղութներու ծանօթացում տեղի ունեցաւ։ Իւրաքանչիւր շրջանի մասնակից ներկայացուց իր գաղութի կեանքը, գործող միութիւնները եւ զանազան աշխատանքները։
Գիւմրիի արեւը տխուր էր այսօր։ Խումբին յուզումնախառն հայեացքները ուղղուած այդ արեւին կը ճամբէին իր ջերմ բնութիւնն ու սիրելի հայրենակիցները։ Ընելու շատ բան կար տակաւին։ Օրուան ծրագիրը ակնթարթի մը պէս անցաւ …

Առաւօտ կանուխ Ֆորումականները մեկնեցան Յովհաննէս Շիրազի թանգարանը։ Ուղեցոյցը Շիրազի հարազատ սերունդէն էր։ Ան ոչ միայն կը նկարագրէր թանգարանը, այլ իր ապրած պատմութիւններով կը վերակենդանացնէր Շիրազի հոգին ու կը ներշնչէր Ֆորումականներս։ Շիրազեան բանաստեղծութիւններով ու անոր վեհանձն հոգիով, Ֆորումականները ճամբեցին Գիւմրին իրենց մէջ պահելով անթառամ յիշատակներ։
«Արագածը արքայական
Ոսկէ թագն է քո հողի,
Քո մի քարն էլ, Լենինական,
Աշխարհի հետ չեմ փոխի:
Դու իմ Գիւմրի-Լենինական դու իմ նոր,
Արագածին բազմած արծիւ փառաւոր»։
Կէսօրին, Ֆորումականները հասան Դիլիջան։ Երջանկութեամբ լեցուն բնութիւն մը կը կախարդէր բոլորին աչքերը։ Թռչուններու ուրախ մեղեդիներն ու պարող ծառերու ամբոխը մեզ կը շրջապատէր։ Լուսանկարներու տարափ մը կը տեղար բնութեան մէջ։ Այստեղ, Ֆորումականներու զուարճութեան վայրն էր։ Անկէ ետք, Ֆորումականները մեկնեցան Սեւան, ուր երգով ու պարով նաւարկեցին, ապա Երեւան վերադառնալով այս տարուան ծրագիրը գիրկընդխառն փակեցին։
Այս տարուան ծրագիրը իր աւարտին հասաւ, սակայն աւարտը նոր սկիզբ էր իւրաքանչիւրին համար։ Կապերը ամուր հաստատուած էին՝ հայրենիք վերադառնալու, հայրենիքով ապրելու, ու հայրենիքին մէջ նոր յիշատակներ սերմանելու համար։
Այս հաւաքներուն նպատակն է հայրենիքը աւելի մօտէն ծանօթացնել հայ ուսանողներուն, զանոնք հաղորդակից դարձնել ազգային ժառանգութիւններուն ու մշակոյթին, առիթ տալ համախմբուելու եւ միասնաբար պեղելու հայրենիքի գաղտնիքները:

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles