0
0
Սուրիահայ Օգնութեան Խաչը շարունակեց ու կը շարունակէ խնամատարական իր յանձնախումբին միջոցով 350-500 հայ ընտանիքներու ամսական հերթականութեամբ յատկացնել սննդակողովներու արկղեր: Սննդակողովներուն փոխարէն, բախումներու սաստկացած մէկ ամսուան ընթացքին, երթեւեկի հնարաւորութեան չգոյութեան պատճառով, մէկ անգամուայ համար Շրջ. Վարչութիւնը սննդակողովի փոխարէն համարժէք գումար յատկացուց իր նպաստընկալներուն:
Սուրիահայ Օգնութեան Խաչի Շրջ. Վարչութիւնը իր ջերմագին շնորհակալութիւնները կը յայտնէ Հ.Օ.Մ.-ի Կեդր. Վարչութեան, որ գթարար մօր նման, ամէն ջանք ի գործ դրաւ ու հեռաւոր ափեր ապրող մեր հայորդիներէն նուիրատուութիւններ ստանալով յատկացուց զայն Ս.Օ.Խ.-ի խնամատարական աշխատանքներուն` երկու հանգրուանով:
Շնորհակալութեան յատուկ խօսք ունինք նաեւ Սուրիահայ Երիտասարդական Միութեան «Արցախ» մասնաճիւղի երիտասարդներուն, որոնք Ս.Օ.Խ.-ի Նոր Գիւղի Ընկերաբժշկական կեդրոն ներկայանալով օժանդակեցին խնամատարական յանձնախումբի մեր ընկերուհիներուն` սննդակողովներու պատրաստութեան եւ ցրուումի աշխատանքներուն մէջ:
Սուրիահայ Օգնութեան Խաչը, հաւատարիմ իր առաքելութեան, կը շարունակէ ծառայել Հալէպի տագնապին ծանր հետեւանքները կրող մեր ընտանիքներուն:
