ՀԱՂՈՐԴԱԳՐՈՒԹԻՒՆ.- Հ.Մ.Ը.Մ.-Ի ԿԵԴՐՈՆԱԿԱՆ ՎԱՐՉՈՒԹԵԱՆ Ա. ԼԻԱԳՈՒՄԱՐ

0 0
Read Time:2 Minute, 25 Second

homenetmenՀ.Մ.Ը.Մ.-ի նորընտիր Կեդրոնական վարչութիւնը իր քառամեայ նստաշրջանի (2015-2019) Ա. լիագումար նիստերը գումարեց 6-8 Դեկտեմբեր 2015ին, Երեւանի մէջ։
Ժողովը գլխաւորաբար կեդրոնացաւ Հ.Մ.Ը.Մ.-ի Պատգամաւորական 11րդ Ընդհանուր ժողովի որոշումներուն ու առաջարկներուն գործադրութեան ծրագիրներուն վրայ։
Կեդրոնական վարչութիւնը քննարկեց յառաջիկայ քառամեակի իր աշխատելաոճի ուղղութիւնները եւ աշխատանքներու ծրագրման ու հետապնդման բաժանում կատարուեցաւ անդամներուն միջեւ։
Ժողովը կեդրոնացաւ նաեւ սոյն քառամեակին զուգադիպող (2018-ին) միութեան 100-ամեակը արժանաւորապէս նշելու ծրագիրներուն վրայ՝ մարզական, սկաուտական եւ կազմակերպական բնագաւառներուն մէջ։
Քննարկուեցաւ նաեւ շրջանային եւ մեկուսի շրջաններու կազմակերպական գործունէութիւնը։ Կեդրոնական վարչութիւնը բիւրեղացուց իր մասնաճիւղերուն թիւը՝ վերցնելով այն մասնաճիւղերը, որոնք կազմալոյծ վիճակի մէջ եղած են տարիներ շարունակ։ Յետ բիւրեղացման, յստակացաւ, որ Հ.Մ.Ը.Մ.-ի աշխարհասփիւռ մասնաճիւղերուն թիւը 105 է։
Կեդրոնական վարչութիւնը անդրադարձաւ Եւրոպայի, Վրաստանի ու Ռուսաստանի մէջ նոր կազմաւորուող շրջաններու կազմակերպական իրավիճակին։ Լուսարձակի տակ առնուեցաւ 9 Դեկտեմբեր 2015ին ծրագրուած, Թիֆլիսի մէջ Հ.Մ.Ը.Մ.-ի մասնաճիւղին հիմնադրութիւնն ու խմբապետական գործուղումներու նախաձեռնելու անհրաժեշտութիւնը։ Մոսկուայի Մեկուսի շրջանը վերաշխուժացնելու կարելիութիւնները արծարծուեցան ու որոշուեցաւ գործուղումներով վերսկսիլ աշխատանքի։
Յառաջիկայ քառամեակի առաջնահերթութիւններէն մին նկատուեցաւ մշակումը դաստիարակչական ծրագիրներու, որոնք պիտի միտին զարգացնել ու միութենական ոգին զօրացնել միութեան շարքերուն մէջ։
Սկաուտական ծիրին մէջ շեշտը դրուեցաւ սկաուտական գիրքերու այժմէականացման ու արդի արհեստագիտութեան համապատասխանող տարբերակներ ունենալու հրամայականին վրայ։ Անհրաժեշտ նկատուեցան քոյր մասնաճիւղերու դրութեան աշխատանքը նոր մօտեցումով զարգացնելն ու միջազգային սկաուտական ծրագիրներու մէջ Հ.Մ.Ը.Մ.-ականներուն մասնակցութիւնը ապահովելը։
Տնտեսական բաժինով քննարկուեցան քառամեայ ծրագիրներու յաջողութեան համար նիւթականի ապահովման կարելիութիւնները՝ տնտեսական ծրագիրներու ճամբով։
Մարզական բաժինով անդրադարձ կատարուեցաւ Համա-Հ.Մ.Ը.Մ.-ական 10-րդ մարզախաղերու իրականացման համար ընձեռուած կարելիութիւններուն՝ մանաւանդ որ կը նախատեսուի մասնակիցներու թիւի յաւելում՝ նկատի ունենալով շրջաններուն մէկէ աւելի խումբերով ներկայանալու Պատգամաւորական ժողովի որոշումը։ Նաեւ որոշուեցաւ կեդրոնանալ շրջաններուն միջեւ մարզական ոգիի ամրապնդման վրայ։
Արհեստագիտական տեղեկատուութեանց բաժինով, նկատի ունենալով նախորդ քառամեակի իրագործումները, որոշուեցաւ շարունակել «Կուկըլ»ի հետ համագործակցութիւնը եւ կեդրոնանալ կայքի ու ընկերային ցանցերու միջոցով Հ.Մ.Ը.Մ.-ի աշխարհասփիւռ գործունէութեան տեղեկատուութիւնը փոխանցելու անհրաժեշտութեան վրայ։
«Մարզիկ» պաշտօնաթերթին գծով որդեգրուած որոշումներու քննարկման լոյսին տակ ծրագրուեցաւ եռամսեայ տպագրական թիւի կողքին «Մարզիկ»ի ելեկտրոնային տարբերակը ունենալ եւ ընկերային ցանցերու ու կայքին միջոցով թերթը երկլեզու դրութեամբ հասանելի դարձնել կարելի եղածին չափ մեծաթիւ ընթերցողներու։
Կեդրոնական Վարչութեան ուշադրութեան առարկան դարձաւ նաեւ Հ.Մ.Ը.Մ.-ի Սուրիոյ մասնաճիւղերու դժուար իրավիճակը՝ քաղաքական ու ապահովական պայմաններու բերումով։ Բարոյական եւ շրջաններու միջոցով նիւթական օժանդակութիւններու փոխանցումը անհրաժեշտութիւն նկատուեցաւ այս հանգրուանին։
Վարչական անդամներ պատրաստելու ու զանոնք աշխատանքի մղելու պարագան կազմակերպական առաջնահերթութիւն նկատելով՝ վարչութիւնը որոշեց անյապաղ ծրագրել ու գործադրել Միջդիւանական խորհրդաժողովը։
Ռազմավարական ծրագրաւորումի նախապէս որդեգրուած պատկերացումը պիտի գործնականացուի Կեդրոնական վարչութեան աշխատանքային տարբեր բնագաւառներուն մէջ՝ ծրագիրը միշտ այժմէականացնելու ու փորձառութեան հիման վրայ բարեփոխումներ կատարելու անհրաժեշտութիւնը նկատի ունենալով։
Կեդրոնական վարչութիւնը յստակացուց քառամեայ գործունէութեան ժամանակաշրջանի իր ծրագիրներու ժամանակացոյցը՝ հետեւեալ ձեւով.
Համա-Հ.Մ.Ը.Մ.-ական խմբապետական 7րդ համագումար – Յուլիս 2016
Միջդիւանական 9րդ խորհրդաժողով – Հոկտեմբեր 2016
Համա-Հ.Մ.Ը.Մ.-ական 10րդ մարզախաղեր – Յուլիս-Օգոստոս 2017
Միութեան 100ամեակի հանդիսաւոր նշում – 2018
Համա-Հ.Մ.Ը.Մ.-ական 11րդ բանակում – Օգոստոս 2018
Պատգամաւորական 12րդ Ընդհանուր ժողով – Սեպտեմբեր 2019

Երեւան, 10 Դեկտեմբեր 2015 Հ.Մ.Ը.Մ.-Ի
ԿԵԴՐՈՆԱԿԱՆ ՎԱՐՉՈՒԹԻՒՆ

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles