ՀԱԿԱՀԱՐՈՒԱԾՆ ԱՆԽՈՒՍԱՓԵԼԻ Է, ՈՐՈՎՀԵՏԵՒ ԴԱ Է ՊԱՏԵՐԱԶՄԻ ՎԵՐՍԿՍՈՒՄԸ ԿԱՆԽԵԼՈՒ ՄԻԱԿ ՄԻՋՈՑԸ

Գէորգ Դարբինեան ՝՝Երկիր՝՝ (յապաւումով) Ղարաբաղա-Ատրպէյճանական շփման գծում հայկական ուղղաթիռը ոչնչացնելու` Ատրպէյճանի աննախադէպ լկտի սադրանքից յետոյ Արցախի Հանրապետութեան Պաշտպանութեան Նախարար Մովսէս Յակոբեանը յայտարարեց, թէ պատասխանը չի ուշանալու եւ լինելու է անսպասելի, չափազանց ցաւագին: Ոչ ոք չի կասկածում նման հարուած հասցնելու` Արցախի Պաշտպանութեան բանակի կարողութեանը: Այն արդէն ապացուցուել է այս տարուայ Օգոստոսին: Բայց, զուտ մարտավարական առումով, որքանո՞վ է նպատակայարմար նման յայտարարութիւն անելը, եթէ իսկապէս նման հարուած հասցնելու ինչ-որ գործողութիւն է պատրաստւում: Յարձակման կամ հակայարձակման անցնող բանակի հրամանատարը չի կարող սեփական որոշումները մատնող ելոյթներ ունենալ` հակառակորդին դրդելով լինել առաւել զգօն եւ պատրաստ հակադարձման: Մնում էր միայն, որ Յակոբեանը նաեւ յայտարարէր, թէ որ ուղղութեամբ է լինելու հայկական զինուժի հարուածը, ինչ բնոյթի է լինելու, ինչպիսի զօրամաս է ներգրաւուելու դրանում եւ այլ մանրամասնութիւններ: Գուցէ Արցախի պաշտպանութեան նախարարը փորձում է նման կերպ բարձրացնել զինուորների եւ հասարակութեան ինքնավստահութի՞ւնը: Սակայն նման նախնական գործելաձեւերը վաղուց արդէն ոչ մի ազդեցութիւն հանրային գիտակցութեան վրայ չեն ունենում, քանի դեռ դրանք չեն դրսեւորւում յստակ գործողութիւններով: Եւ հիմա մնում է իսկապէս յուսալ, որ, չնայած սրան, անակնկալի ուժգնութիւնը կը ստացուի, որովհետեւ հուժկու հարուած հասցնելու այլընտրանք, կարծես, այլեւս չկայ: Օգոստոսեան դէպքերից յետոյ, երբ Ատրպէյճանի հասարակութիւնը կսկիծով սեփական զինուժի ղեկավարութեան անխոհեմ որոշումների ու քայլերի հետեւանքով կրած կորուստներն էր հաշւում, Պաքուն ստիպուած եղաւ մի տեւական ժամանակ հրաժարուել ռազմատենչ հռետորաբանութիւնից եւ սադրիչ գործողութիւններից: Փորձն արդէն ցոյց է տալիս, որ Ատրպէյճանը նման դէպքերում սթափւում է միայն ուժգին ապտակ ստանալուց յետոյ: Այլընտրանքը Պաքուին անընդհատ լկտիանալու հնարաւորութիւն տալն է, դրա հետեւանքը` նման ցաւոտ միջադէպերի կրկնութիւնը եւ յաճախակի դառնալը: Ու որքան էլ այս լարուած իրավիճակում նման պատասխանը պատերազմի վերսկսման նշան կարող է թուալ, իրականում հէնց դա է լայնամասշտապ պատերազմական գործողութիւններից խուսափելու միջոցը: Եւ այստեղ որեւէ ազդեցութիւն պէտք չէ ունենայ միջազգային հանրութեան հնարաւոր յարձակողական, դատապարտող դիրքորոշումը: Ոչ միայն այն պատճառով, որ իրենց անվտանգութիւնն ապահովելու հարցում թէ՚ Հայաստանը եւ թէ՚ Արցախն ունեն գերիշխանութեամ իրաւունքներ, այլեւ որովհետեւ միջազգային հանրութեան երկակի փորձաչափների վրայյ խարսխուած կարծիքը, Ատրպէյճանի սադրանքներին մշտապէս մատների արանքով նայող կեցուածքը վաղուց արդէն դարձել է հակամարտութեան գօտու ապակայունացման, Պաքուի լկտիացման ամենազգայուն գործօններից մէկը: Իրականում հայկական կողմի առաւել քան կոշտ արձագանգը կամ պատասխանը պէտք է նոյնչափ զգաստացնող լինի նաեւ միջազգային հանրութեան համար, որը ներկայումս տենդագին փորձում է զսպել հայկական կողմին նման հնարաւոր գործողութիւններից: Ողջ հարցն այն է, թէ ինչպիսի՞ն կարող է կամ պէտք է լինի այդ ``ապտակը``: Միջադէպից անմիջապէս յետոյ Պաքուն յայտարարեց, թէ հայկական ուղղաթիռը խոցուել է Ատրպէյճանի սահմանը հատելու եւ իր պաշտպանական դիրքերի վրայ յարձակման նշաններ ցուցադրելու պատճառով: Սակայն թէ՚ ուղղաթիռին հարուածելու մասին տարածուած տեսագրութիւնը եւ թէ՚ անկման վայրը փաստում են Պաքուի նման պնդումների անհեթեթութիւնը: Եթէ սա յստակ կանխամտածոըած, բայց չափազանց փնթի իրագործուած սադրանք չէր` ուղղուած բանակցային գործընթացի ներկայիս ընթացքը խաթարելուն, ապա առնուազն մատնում է Արցախի տարածքում հայկական բանակների համատեղ մասշտապային զօրավարժութիւններից նրանց խուճապը եւ իրարանցումը, որը կարող էր բերել առաջնագծի անկառավարելի եւ նման ելք ենթադրող գործողութիւնների: Մէկ բան բոլոր դէպքերում կարծես թէ դառնում է ակնյայտ: Պաքուի ներկայիս հակասական կեցուածքը եւ կայացրած` պարզապէս անլուրջ որոշումները ցոյց են տալիս, որ Ատրպէյճանը բոլոր դէպքերում բացարձակապէս պատրաստ չէր նման զարգացումների: Խնդիրն այն է, որ հասկանալով ուղղաթիռը խոցելու համար բերող հիմնաւորումների ուղղակի հակասումը սեփական պաշտօնական դիրքորոշմանը առ այն, որ Արցախը Ատրպէյճանական տարածք է, այսինքն` սահման, որպէս այդպիսին, պէտք է որ չլինէր, Պաքուն անմիջապէս շրջանառութեան մէջ դրեց մէկ այլ մօտեցում: Իբր, քանի որ Արցախը Ատրպէյճանի բռնագրաւուած տարածք է, ապա Պաքուն իրեն իրաւունք է վերապահում Արցախի օդային տարածքը հռչակելու ոչ թռիչքային հատուած, ինչի մասին, իբր, տեղեկացուել է նաեւ օդանաւային միջազգային կազմակերպութեանը: Սրանով, իհարկէ, Պաքուն, կամայ, թէ ակամայ, հաստատում է, որ ուղղաթիռը խոցուել է մինչեւ շփման գծին մօտենալը: Բայց եթէ շարժուենք այս տրամաբանութեամբ, ապա Ատրպէյճանի բանակի հակա-օդային պաշտպանութեան ուժերը պէտք է ոչ միայն խոցէին շփման գծին այդքան մօտեցած երկու ուղղաթիռներից մէկը, այլ երկուսը միաժամանակ, աւելին` ոչնչացնէին այս օրերին անցկացուող զօրավարժութիւնների ժամանակ օդ բարձրացող հայկական բոլոր ուղղաթիռները եւ գուցէ նաեւ ինքնաթիռները: Նման բան, սակայն, բնականաբար, չարուեց: Աւելին` Բաքուի այս նոր, անհեթեթ հիմնաւորման պարագայում ստացւում է, որ Ատրպէյճանը փաստացի պատերազմ է յայտարարում հայկական կողմին, քանի որ, ըստ այդ տրամաբանութեան, պէտք է հետայսու հարուածներ հասցուեն Արցախի օդային տարածքում սաւառնող բոլոր ռազմական օդանաւերին: Մինչդեռ արդէն օրուայ կէսին տեղեկատուութիւն տարածուեց, որ Արցախ է այցելել Հ.Հ. նախագահ, զինուած ուժերի գերագոյն-գլխաւոր հրամանատար Սերժ Սարգսեանը: Նախագահը, ընդ որում, Արցախ էր մեկնել ակնյայտօրէն Պաշտպանութեան Նախարարին պատկանող ուղղաթիռով: Եւ եթէ Պաքուն առաջնորդուէր իր տարածած վերոնշեալ յայտարարութեամբ, ապա պէտք է նաեւ Սերժ Սարգսեանին տեղափոխող ուղղաթիռը յայտնուէր ատրպէյճանական ուժերի թիրախում: Սակայն Սարգսեանը ոչ միայն հասել է Ստեփանակերտ, այլեւ նրա ուղղաթիռը վայրէջք է կատարել Ստեփանակերտի օդանաւակայանում: Այն նոյն օդանաւակայանում, որի շահագործումը կանխելու ուղղութեամբ արդէն տարիներ շարունակ կատաղի պայքար է մղում Ատրպէյճանը, ինչի պատճառով այդ օդանաւակայանի շահագործումը շարունակ ամենատարբեր պատրուակներով ձգձգւում է: Ուղղաթիռով Արցախ մեկնելու` Սերժ Սարգսեանի քայլը կարելի է ինչ-որ իմաստով նաեւ դիւանագիտական պատասխան համարել Ատրպէյճանի սադրիչ գործողութիւններին: Սակայն գուցէ շատ աւելի ճիշտ կը լինէր, եթէ նախագահը Ստեփանակերտ մեկնէր ոչ թէ ռազմական ուղղաթիռով, այլ քաղաքացիական ինքնաթիռով` կատարելով մօտ երեք տարի առաջ տուած այն խոստումը, թէ, ի հեճուկս Ատրպէյճանի բարձրացրած վայնասունի, ինքն է լինելու Երեւան-Ստեփանակերտ քաղաքացիական չուերթի առաջին ուղեւորը: Սա ոչ միայն կը նշանակէր Ստեփանակերտի օդանաւակայանի շահագործման մեկնարկ, այլեւ Պաքուին կը կանգնեցնէր էլ աւելի անհեթեթ վիճակի առջեւ: Առանց այն էլ Արցախի օդային տարածքը թռիչքազերծ գօտի յայտարարելու քայլը դիւանագիտական փակուղի է հէնց իր` Պաքուի համար: Եթէ հայկական կողմից այդ ``պայմանը`` խախտելու պատճառով պէտք է սկսուի պատերազմը, ապա պատասխանատուութեան ողջ բեռը մնալու է Ատրպէյճանի ուսերին:

Աղքատ… Մեծահարուստը, Կամ Վիթխարի ՄԵԾը՝ «Փեփէ» Մուխիքա

Ցեղասպանութեան Ընկերներ. Գերմանիան Ողջակիզումէն Ոչի՞նչ Սորված է

ՀԱԿԱՀԱՐՈՒԱԾՆ ԱՆԽՈՒՍԱՓԵԼԻ Է, ՈՐՈՎՀԵՏԵՒ ԴԱ Է ՊԱՏԵՐԱԶՄԻ ՎԵՐՍԿՍՈՒՄԸ ԿԱՆԽԵԼՈՒ ՄԻԱԿ ՄԻՋՈՑԸ

This story is FREE for you...

Leave a Reply

ԽՈՐԷՆ ԱՐՔ. ՏՈՂՐԱՄԱՃԵԱՆ՝ ՆԻՒ ՊՐԻԹԸՆԻ ՍՈՒՐԲ ՍՏԵՓԱՆՈՍ ԵԿԵՂԵՑՒՈՅ ՆՈՐ ՀՈՎԻՒ

This story is FREE for you...

Leave a Reply

Նմանատիպ Յօդուածներ

Փարիզի Մէջ Հանդիպում՝ Օլիվիէ Ֆօր – Իշխան Սաղաթէլեան

ՏՕՆԵՐՈՒՆ ՄԵԾԱԳՈՅՆԸ՝ ԹԱՐԳՄԱՆՉԱՑԸ

ԽՈՐԷՆ ԱՐՔ. ՏՈՂՐԱՄԱՃԵԱՆ՝ ՆԻՒ ՊՐԻԹԸՆԻ ՍՈՒՐԲ ՍՏԵՓԱՆՈՍ ԵԿԵՂԵՑՒՈՅ ՆՈՐ ՀՈՎԻՒ

Աղքատ… Մեծահարուստը, Կամ Վիթխարի ՄԵԾը՝ «Փեփէ» Մուխիքա

Ցեղասպանութեան Ընկերներ. Գերմանիան Ողջակիզումէն Ոչի՞նչ Սորված է