0
0
ԵՐԵՒԱՆ (“Արմէնփրես“, “Թերթ“).- Շաբաթասկիզբին, կատարուեցաւ Հայաստանի կառավարութեան արտակարգ նիստը, նախագահութեամբ Հ.Հ. նախագահ Սերժ Սարգսեանի:
Նիստին ընթացքին ընդունուեցաւ Հայաստանի Ազգային Ժողովի արտակարգ նստաշրջան գումարելու վերաբերեալ Հայաստանի կառավարութեան նախաձեռնութեան վերաբերեալ որոշումը, ըստ որուն, կառավարութիւնը կ՛առաջարկէ Հայաստանի Ազգային ժողովի նախագահին` Հայաստանի Ազգային ժողովի առաջին նստաշրջանի աւարտէն անմիջապէս ետք գումարել Հայաստանի Ազգային ժողովի արտակարգ նստաշրջան մը:
Նաեւ, վարչապետ Տիգրան Սարգսեան ներկայացուց Հայաստանի կառավարութեան ծրագիրը, որ արժանացաւ հաւանութեան: Սահմանուած կարգով, այդ ծրագիրը պիտի ներկայացուի Հայաստանի Ազգային ժողովին:
Նիստի աւարտին, Սարգսեան կոչ ուղղեց նոր ձեւաւորուածկառավարութեան անդամներուն` տրամադրուիլ ծանր, բայց պատուաբեր աշխատանքի եւ մաղթեց յաջողութիւն: Ըստ նախագահին, նախորդ տարիներուն ամէնէն կարեւոր ձեռքբերումը Հայաստանի տնտեսութեան կերպարանափոխումն է, որ տեղի ունեցաւ համաշխարհային տնտեսական ճգնաժամին յաջորդած դժուար ժամանակաշրջանին ընթացքին:
“Մենք Յեղափոխական Արդիւնքներ Կ՛ակնկալենք Կառավարութեան Աշխատանքէն: Կառավարութեան կազմին մէջ մենք յեղափոխական փոփոխութիւններ չենք կատարած, սակայն ասիկա չի նշանակեր, որ յեղափոխական արդիւնքներ չենք ակնկալեր գործադիրի աշխատանքէն: Տնտեսութեան կառուցուածքային փոփոխութիւնները, սեփական մարզին հետ աշխատելու նոր ոճը, տնտեսավարման գործընթացին մէջ պետութեան խթանիչ դերակատարութեան նկատելի աշխուժացումը կարելիութիւն տուած են ապահովելու թէ՛ նոր ներդրումներ ու արհեստագիտական լուծումներ, թէ՛ բաւականաչափ կայուն ընկերային քաղաքականութիւն…“, ըսաւ Սարգսեան, որ եզրակացուց թէ, այժմ բոլորին ուշադրութիւնը մասնաւորաբար պէտք է ուղղել դէպի գիւղը եւ գիւղացին: “Պէտք է օժանդակենք գիւղացիին` ստացուած բերքը հաւաքելու, պահելու ու սպառելու գործին մէջ: Հետեւողականօրէն կանգնեցէ՛ք գիւղացիի կողքին, եւ գիւղը կրկնակի արդիւնք կու տայ: Կը կարծեմ, որ իմ դրած խնդիրներս պարզ են բոլորին համար: Այդ յաջողութիւններով յառաջիկայ տարիներուն պիտի պայմանաւորուի շատ բան, եթէ չըսենք` ամէն ինչ…“, շեշտեց հանրապետութեան նախագահը:
