ԿԵԴՐՈՆԱԿԱՆՑԻ ԱՐՄԵՆԱԿ ԵՒ ԵՐԿԻՐՆԵՐՈՒ ՊԱՐՏՔԵՐԸ

0 0
Read Time:2 Minute, 21 Second

i kaghia

Մակար, ի Գաղիա,
Աշնանամուտի գիշերահաւասար, 2015

Կեդրոնականցի Արմենակ, շնորհիւ իր համակարգիչին, միայն հայկական հարցերով չի զբաղիր : Հետաքրքրութիւններ ունի: Ստեղները աջ եւ ձախ սեղմելով, գիւտեր կ’ընէ: Եթէ շարունակէ, շրջուն համայնագիտարան պիտի դառնայ:
Աշնան խաբուսիկ արեւ կար, երբ երկար ապրելու համար յանձնարարուած բոլոր դեղերը դեռ կուլ չէի տուած, Արմենակ եկաւ Էլպիսին հետ: Տերեւները չէին դեղնած: Երբ խելառ ամպ մը անցնէր, ցուրտը կը յուշէր, որ ձմեռը դրան ետին է:
Արմենակ ըսելիքի պակասէ տառապող խմբագիրի չի նմանիր: Ներածական չ’ըներ: Իր խօսքին ընդունելի կամ անընդունելի ըլլալու հոգը չունի:
Էլպիս պոլսական տեսակաւոր ձէթով ճաշեր բերած էր:
Քաղաքավարական «պէտք չկար մը ըսի», բայց գոհ էի:
Հիմա ո՞վ ժամանակ կը վատնէ այդպէս ճաշեր պատրաստելու համար:
Տիկինները «Սքայբ»ով տիեզերական զրոյցներ կ’ընեն Լոս Անճելըս. Պոլիս, Նոր Զելանտա, Փարիզ, Նիւ Եորք: Քոյր, դրացի, հարս, տալ, տարտղնուած են:
– Մակա՛ր, կը հետեւի՞ս աշխարհի եւ Հայաստանի տնտեսական կացութեան:
– Խելքս չի հասնիր, մանաւանդ երբ թիւերու ետին զերոները կը շատնան:
– Թերթը գրած է, որ մեր պզտիկ երկիրը հինգ միլեառ տոլար պարտք ունի:
– Կ’ըսեն, որ պարտքի դրամ կու տան հարուստներուն: Դրամ չունեցողին դրամատունը վարկ չի տար: Ուրեմն կացութիւնը լաւ է:
– Թերթը գրած էր, որ այս տարի այդ պարտքը աւելցած է 380 միլիոնով: Հայաստանի բնակիչը, նորածին, նուազագոյնով ապրող թոշակառու, 2.500 տոլար պարտք ունին:
– Մի՛ մտահոգուիր, Արմենակ: Չունեցողին ինչը կ’առնեն, ունեցողը արդէն ձեւը գիտէ չտալու: Հայաստանցիներ Զուիցերիա գումարներ ունին, «Գլէնդէլ» եւ «Նիցցա» տուներ ունին:
– Հայաստանով կը մտահոգուինք, գլխու պտոյտ կ’ունենանք մեծերու պարտքի թիւերը տեսնելով եւ կը մխիթարուինք:
– Ինչե՜ր տեսեր ես:
– Ֆրանսայի պէս մեծ եւ օրէնքով կառավարուող երկիր մը, քիչ առաջ 2089 միլիառ եւրօ պարտք ունէր: Հիմա աւելցած ըլլալու է: Երկվայրկեան որ կ’անցնի, պարտքը կ’աւելնայ 2665 եւրոյով… Իւրաքանչիւր բնակիչ, ծծկեր երեխայ, գործազուրկ, ծեր, կը ծնի 32.950 եւրօ պարտքով:
– Ուրեմն մենք հիմա, Մակարուհին եւ ես, 66.000 եւրօ պարտք ունինք:
– Մի՛ վախնար, Ամերիկացի մը 48.000 տոլար պարտք ունի: Հոս ոչինչ, դուք ալ ոչինչ: Իւրաքանչիւր երկվայրկեան որ կ’անցնի, Ամերիկայի պարտքը կ’աւելնայ 47.200 տոլարով, ամէն օր՝ 4 միլեառ:
– Արմենակ, գիշերները քնաբեր դեղ կ’առնե՞ս: Թիւերը զիս անհանգիստ ըրին: Քու խելքդ կը հասնի, քեզ միջազգային դրամատան տնօրէն թող կարգեն: Ցարդ կը յուզուէիր Հայաստանի պարտքով: Այդ պարտքը հինգ միլեառ էր: Հիմա երբ գիտես, որ Ֆրանսայի պարտքը 2070 միլեառ է, դուն քեզ հանգիստ զգայ: Ֆրանսացին եթէ հանգիստ կը քնանայ, դուն ալ քնացիր: Ուրեմն Հայաստան ապահով երկիր է, գաղթելու կարիք չկայ:
– Հայաստան քեզ քարոզիչ եթէ ղրկեն, հրաշք կը գործես, եթէ լսող գտնես:
– Արմենակ, դուն Ամերիկա շատ կ’երթաս կու գաս, Հայաստանցիները ինչո՞ւ կ’երթան Ամերիկա: Գիտե՞ն, որ այր, կին, զաւակ, թոռ, բարի գալուստի համար 48.000 տոլար պարտք պիտի ունենան:
Արմենակը եթէ Մ.Ա.Կ.-ի ընդհանուր քարտուղար կարգեն, մարդիկ տէր կ’ըլլան երկրին, կ’աշխատին եւ լաւ կ’ապրին: Օդանաւի եւ զէնքի դրամով լաւ կ’ապրին: Բանաստեղծի հայրենի երկրի կանչը չեն փոխարիներ Լոսական հոսհոսական երազով…
Մինչեւ Հելսինքի, Օքլանտ:
Հայերը եւ աշխարհի գոյնզգոյն գաղթականները…

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles